جارىلىستان زارداپ شەككەندەردىڭ جاعدايى قالاي؟

«بۇگىنگى كۇنى تاراز قالالىق №1 كوپبەيىندى اۋرۋحاناسىندا جاراقات العان 28 ناۋقاس بار. ولاردىڭ جاعدايى قالىپتى. ونىڭ ىشىندە تورتەۋىنىڭ جاعدايى ورتاشا اۋىر دەپ باعالانىپ وتىر. ولار جانساقتاۋ بولىمىندە جاتىر. بىراق ومىرلەرىنە ەشقانداي قاۋىپ ءتونىپ تۇرعان جوق. سوڭعى ءۇش كۇن بويى كورسەتىلىپ جاتقان مەديتسينالىق كومەكتىڭ ارقاسىندا جاعدايلارىنىڭ جاقسارىپ كەلە جاتقانىن بايقاپ وتىرمىز», دەدى جامبىل وبلىسى دەنساۋلىق ساقتاۋ باسشىسى اسەت قاليەۆ.

العاشقى كۇنى جانساقتاۋ بولىمىنە جاراقات العان 6 ناۋقاس تۇسكەن. بۇگىندە ولاردىڭ ەكەۋى بولىمشەگە اۋىستىرىلدى.

«ناۋقاستاردىڭ جاراقاتتارىن ەمدەۋگە مەكەمەدە ءدارى-دارمەكتەر, تاڭۋعا ارنالعان مەديتسينالىق بۇيىمداردىڭ قورى جەتكىلىكتى. بارلىعى دارىگەرلەردىڭ باقىلاۋىندا. ءبىرىنشى كۇنى جاعدايدى ەسكەرە وتىرىپ, ۇلتتىق ورتالىقتان بىلىكتى مامانداردى شاقىردىق. ولار كەلىپ كەتتى. ءبىزدىڭ جاساپ جاتقان ەم-دومىمىزبەن ولار كەلىستى. الداعى ۋاقىتتا ەمدىك جۇمىستاردى جالعاستىرا بەرەمىز», دەدى  دارىگەر.

اسەت قاليەۆ جانساقتاۋ بولىمىندە ەم قابىلداپ جاتقان ناۋقاستارعا قانداي دياگنوز قويىلعانىن دا ايتىپ بەردى.

«اۋرۋحانادا قوسالقى جاراقاتتار العان ناۋقاستار دا جاتىر. ولار كۇيىك شالعان, سۇيەگى سىنعان, جارالارى بار ەم الۋشىلار. اۋرۋحاناعا تۇسكەن كەزدە جاراقات سالدارىنان ولاردا شوك بولعان», دەدى ول.

اۋرۋحاناعا باستاپقى كەزدە 98 ادام تۇسكەن. بايزاق اۋدانىنداعى اۋرۋحانا مەن قالالىق اۋرۋحاناعا مەديتسينالىق كومەككە جۇگىنگەن پاتسيەنتتەردىڭ جالپى سانى 105-ءتى قۇراپ وتىر.