«استانا وپەرا» تەاترىنىڭ جاڭا ماۋسىمى – 30 تامىزدا كونستيتۋتسيا كۇنىنە ارنالعان مەرەكەلىك كونتسەرتپەن اشىلادى. تەاتردىڭ توعىزىنشى ماۋسىمىندا كورەرمەنگە ورەلى ونەر ۇجىمى بىرقاتار وپەرا جانە بالەت پرەمەرالارى مەن گاسترولدىك قويىلىمدار, سونداي-اق مازمۇندى اۆتورلىق كونتسەرتتەر مەن شىعارماشىلىق كەشتەر ۇسىنىپ وتىر.
اتالعان ونەر ورداسىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆ تەاتر ماۋسىمىنىڭ اشىلۋى الدىمەن ارتىستەر مەن كورەرمەندەر ءۇشىن مازمۇندى مەرەكە ەكەنىن اتاپ ءوتتى.
– بۇل ماۋسىمدى ەلىمىزدەگى جاڭا احۋالعا بەيىمدەلگەن جاعدايدا باستاپ, بارلىق سانيتارلىق تالاپتى ساقتايمىز. تەاتر ۇجىمى ۆاكتسينا العان, سەبەبى ءبىز وزىمىزگە عانا ەمەس, كورەرمەندەردىڭ دە دەنساۋلىعىنا الاڭدايمىز. جاڭا ماۋسىمنىڭ العاشقى جارتىسىندا بەس پرەمەرا ۇسىنىلادى. بۇل وپەرا جانە بالەت ترۋپپاسىنا ايتارلىقتاي سالماق بولماق, ويتكەنى ونىمەن بىرگە رەپەرتۋار قورىنداعى سپەكتاكلدەر دە قويىلادى. سونىمەن بىرگە كورنەكتى تۇلعالاردىڭ شىعارماشىلىعىنا ارنالعان مەرەيتويلىق كەشتەر مەن اتا-انالارعا دا قىزىقتى بالالار رەپەرتۋارىن كەڭەيتۋدى جوسپارلاپ وتىرمىز, − دەگەن ول, ءسوزىن ودان ءارى جالعاپ, توعىزىنشى ماۋسىمدا – جۇرتشىلىققا بالەت ارتىستەرىنىڭ جاڭا ەسىمدەرىن اشىپ, قىسقا ۇزىلىستەن كەيىن ساحنادا پريما-بالەرينا ءمادينا باسباەۆا ونەر كورسەتەتىنىن جەتكىزدى.
سونداي-اق الداعى 2 جانە 3 قىركۇيەكتە استاناعا شىمكەنت وپەرا جانە بالەت تەاترى گاسترولدىك ساپارمەن كەلىپ, تاسقىن جارمۇقامەتتىڭ قاسيەتتى جاننىڭ كوركەم بەينەسى سيپاتتالعان «دومالاق انا» وپەراسىن قويادى. ودان كەيىن مادەنيەت جانە سپورت مينيسترلىگى جانە تەاتردىڭ تۇراقتى باس دەمەۋشىسى Halyk Bank قولداۋىمەن «استانا وپەرانىڭ» قويىلىمدار كەزەگىن Piccolo تەاترى جوباسىنىڭ اياسىندا «د.چيماروزانىڭ «جاسىرىن نەكە» وپەراسى جالعاستىرادى. جەتكىنشەكتەرگە ارنالعان م.مينكوۆتىڭ «سيقىرلى مۋزىكا نەمەسە وپەرانى بىرگە جاسايىق» جانە ا.بايعوجاەۆتىڭ ليبرەتتوسىنا قويىلعان ج.داستەنوۆتىڭ «قاڭباق شال» اتتى العاشقى قازاق بالالار وپەراسىنىڭ پرەمەراسى دا كورەرمەن كوڭىلىنەن شىعادى دەگەن ويدامىز.
سونىمەن قاتار ونەرسۇيەر قاۋىم ۆ.ا.موتسارتتىڭ مۋزىكاسىنا قويىلعان يرجي كيلياننىڭ «التى بي» جانە ديۋلا حارانگوزونىڭ حورەوگرافياسىنداعى تيبور كوچاكتىڭ مۋزىكاسىمەن ورىلگەن «اقشاقار مەن جەتى ەرگەجەيلى» سپەكتاكلدەرىن تاماشالايدى.
ال تاۋەلسىزدىگىمىزدىڭ وتىز جىلدىعىنا ورايلاستىرىلىپ ساحنالاناتىن كورنەكتى كومپوزيتور ەركەعالي راحماديەۆتىڭ «الپامىس» وپەراسى جاڭا ماۋسىمنىڭ تۇعىرلى تۋىندىسى سانالماق.