جاھانعا جايىلىپ, جەر جۇزىندەگى بارشا حالىقتى الاڭداتقان كوروناۆيرۋس ىندەتىمەن كۇرەس ءالى جالعاسۋدا. كارانتين كەزەڭىنە دە ەكى جىلعا جۋىقتادى. دەسە دە, باستى تالاپ قاۋىپتى ىندەتتەن بارىنشا قورعانىپ, قاۋىپسىزدىك شارالارىن قاتاڭ ساقتاۋ بولىپ وتىر.
بۇل كۇندە جامبىل وبلىسىنداعى بارلىق اۋرۋحانالار مەن ەمحانالار كۇردەلى جۇمىس كەستەسىنە اۋىستى. وڭىردە قاتاڭ كارانتين شارالارى ەنگىزىلدى. وسىنداي قيىن كەزەڭدە جەدەل جاردەم قىزمەتى تاۋلىك بويى كوپشىلىكتىڭ ءومىرىن ساقتاپ قالۋ ءۇشىن ەڭبەك ەتتى. ءبىر كۇندە جەدەل جاردەم قىزمەتىنە 1800-2000 قوڭىراۋعا دەيىن تۇسكەن. ايماقتاعى اق حالاتتى ابزال جاندار سىن ساعاتتا بارىنە دە ۇلگەرىپ, ناۋقاس جاندارعا مەديتسينالىق كومەك كورسەتتى.
ء«بىزدىڭ ستانسا – جامبىل وبلىسىنداعى ۇلكەن مەكەمەلەردىڭ ءبىرى. مۇندا قىزمەتكەرلەر دە وتە كوپ. ءبىر تاۋلىكتە وبلىس تۇرعىندارىنا 93 بريگادا قىزمەت كورسەتەدى. ال 93 كولىك جۇرگىزۋشى مەن 150 مەديتسينا قىزمەتكەرى كۇندىز-ءتۇنى اياعىنان تىك تۇرىپ, جانى قينالعاندارعا العاشقى كومەكتەرىن كورسەتىپ, قاجەت بولعان جاعدايدا اۋرۋحانالارعا جەتكىزەدى», دەيدى وبلىستىق جەدەل جاردەم ستانساسى باس دارىگەرىنىڭ ورىنباسارى كۇلزاحيرا قىزعاراەۆا.
سوڭعى تاۋلىكتىڭ وزىنە جەدەل جاردەم قىزمەتىنە 1800-دەن استام قوڭىراۋ تۇسكەن. جەدەل كورسەتىلگەن كومەكتىڭ ناتيجەسىندە 226 ادام كوروناۆيرۋس ينفەكتسياسىمەن جۇقپالى اۋرۋلار اۋرۋحاناسىنا جاتقىزىلعان. قازىرگى كەزدە وڭىردە 2 130 ناۋقاس ستاتسيونارلىق ەم قابىلداۋدا. دايىندالعان توسەكتىك ورىن 59 پايىزعا تولتىرىلعان. سونىمەن قاتار جانساقتاۋ بولىمشەسىندە 173 ناۋقاس ەمدەلۋدە. ايماقتاعى قابىلدانعان شارالاردىڭ ناتيجەسىندە قاۋىپتى ىندەتتەن جازىلىپ شىققاندار دا بار. ماسەلەن, جامبىل اۋدانىنىڭ تۇرعىنى, 62 جاستاعى ازامات يسمايل كامالوۆ وبلىستىق وڭالتۋ ورتالىعىنىڭ ينفەكتسيالىق ستاتسيونارىنا وكپەنىڭ 56 پايىزىنىڭ زاقىمدانۋىمەن, تىنىس الۋدىڭ قيىندىعىمەن كەلىپ تۇسكەن. مۇندا دا دارىگەرلەر اتالعان ازاماتتىڭ ءومىرىن ساقتاپ قالۋ ءۇشىن بارلىق قاجەتتى شارانى جاساعان. الايدا ناۋقاستىڭ كوروناۆيرۋس ىندەتىنە قارسى ۆاكتسينا الماعانى انىقتالعان. دەسە دە, بۇگىندە اتالعان ازامات ناۋقاسىنان ايىعىپ, ۇيىنە قايتارىلعان. «پتر-تەست ەر ادامنىڭ كوروناۆيرۋس ىندەتىن جۇقتىرعانىن كورسەتكەن. ناۋقاستىڭ جاعدايىن بۋىن اۋرۋى مەن قان قىسىمىنىڭ جوعارىلاۋى ودان ءارى قيىنداتقان. ورتالىق دارىگەرلەرىنىڭ قامقورلىعى مەن بىلىكتىلىگىنىڭ ارقاسىندا جاعدايى جاقسارعان سوڭ, ەكى اپتادان كەيىن ناۋقاس ۇيىنە شىعارىلدى. اۋىر حالدە جەتكەن ناۋقاس اۋرۋحاناعا تىنىسىنىڭ تارىلۋىمەن تۇسكەن. دەرتكە شالدىققانداردى اۋرۋدان ايىقتىرىپ, ۇيىنە جەتكىزۋ – ءبىزدىڭ پارىز. اعزا تولىق قالپىنا كەلۋ ءۇشىن ودان ءارى وڭالتاتىن ەم-دوم جاساۋ قاجەت. اۋرۋ ايتىپ كەلمەيدى. ۇيدە سيمپتومسىز باستالىپ, اياق استىنان ءورشىپ كەتۋى مۇمكىن. سوندىقتان حالىق اۋرۋدان ساقتانۋعا سالعىرت, بەيجاي قاراماسا ەكەن», دەيدى ەمدەۋشى دارىگەرى اقمارال ق ۇلىمباەۆا.
جامبىل اۋدانىنىڭ تۇرعىنى يسمايل كامالوۆ تا بۇل كۇندە جاعدايىنىڭ جاقسى ەكەنىن ايتادى. دەگەنمەن ول كۇندەلىكتى تىرشىلىك قامىن كۇيتتەپ ءجۇرىپ قاۋىپتى ىندەتتەن ساقتانۋدى اسا قاپەرىنە الماعانىن دا جەتكىزدى. «اۋىر ناۋقاستان كەيىن ۇيگە امان-ەسەن ورالعانىما وتە قۋانىشتىمىن. كارانتينگە قاراماستان مەديتسينالىق بەتپەردە كيمەي كوشەدە ءجۇردىم, اراسىندا بازارعا دا باراتىنمىن. سودان اقىرى ىندەت جۇقتىرىپ, اۋرۋحانادان ءبىر-اق شىقتىم. اۋرۋحانادا 14 كۇن ەم قابىلدادىم. دارىگەرلەر مەنى اياققا تۇرعىزدى. ول كىسىلەرگە وتە ريزامىن. بارلىعى دا ءوز مىندەتىن كاسىبي دەڭگەيدە ورىنداپ, بىزگە جىلى شىراي تانىتىپ, ۇيدەگىدەي كۇتىم جاسادى. ورتالىقتا جۇمىس ىستەيتىن قىزمەتكەرلەرگە كاسىبي بىلىكتىلىگى مەن كورسەتكەن كومەگى ءۇشىن العىسىمدى بىلدىرەمىن», دەيدى ول.
سول سياقتى قاۋىپتى ىندەتكە شالدىققان بىرقاتار ازاماتتار دا ناۋقاسىنان ايىعىپ, ۇيلەرىنە شىعارىلعان. الايدا دارىگەرلەر تۇرعىندارعا ارقانى كەڭگە سالماي, قاۋىپسىزدىك شارالارىن قاتاڭ ساقتاۋدى مىندەتتەپ وتىر. سوڭعى تاۋلىكتىڭ وزىندە جەدەل جاردەم قىزمەتىنە 2 مىڭعا جۋىق قوڭىراۋدىڭ ءتۇسۋى ىندەتتىڭ ءورشىپ بارا جاتقانىن كورسەتەدى. ال ودان ساقتانۋ, ءوزىنىڭ دە, وزگەنىڭ دە قاۋىپسىزدىگىن ويلاۋ ءاربىر ازاماتتىڭ باستى مىندەتى بولۋى كەرەك.
جامبىل وبلىسى