گايتيدىڭ وڭتۇستىك-باتىسىندا بولعان 7,2 بالدىق جەر سىلكىنىسىنەن شامامەن 1,2 ملن ادام, ونىڭ ىشىندە 540 مىڭ بالا زارداپ شەككەن. بۇل مالىمدەمەنى UNICEF ۇيىمى جاساپ وتىر.
اپات كەم دەگەندە 2 200-دەن استام ادامنىڭ ءومىرىن قيىپ, 6 900-دەن استام ادام جاراقات العان. زارداپ شەككەندەر سانى كۇن وتكەن سايىن ارتىپ بارادى. ىزدەۋ-قۇتقارۋ جۇمىستارىن جۇرگىزۋگە قاتتى جاڭبىردان بولعان سەلدەن جولداردىڭ جابىلىپ قالعاندىعى ۇلكەن كەدەرگى كەلتىرىپ وتىر. ال ەلدەگى اۋرۋحانالاردا ورىن جوق. دارىگەرلەردىڭ ءبىرى كەرەۋەتتەردىڭ بوس ەمەس ەكەنىن, ال پاتسيەنتتەردىڭ ەدەندە جاتقانىن ايتتى. ناۋقاستاردى وزگە تيىسىنشە جابدىقتالعان مەكەمەلەرگە ەۆاكۋاتسيالامايىنشا, ولاردىڭ كەم دەگەندە ۇشتەن ءبىرى اياق-قولىنان ايىرىلۋى نەمەسە ءتىپتى ءتىرى قالماۋى مۇمكىن.
سارسەنبىدە سويلەگەن سوزىندە گايتيدىڭ پرەمەر-ءمينيسترى اريەل گەنري حالىقتى «گايتيدى قالپىنا كەلتىرۋ ءۇشىن بىرىگۋگە» شاقىرىپ, ۇكىمەت زارداپ شەككەن اۋداندارعا كومەكتەسۋگە دايىن ەكەنىن ايتتى. شامامەن 135 مىڭ وتباسىنا زاردابىن تيگىزگەن جەراستى دۇمپۋلەرى سالدارىنان كەم دەگەندە 75 مىڭ ءۇي قيراعان.