مەملەكەت باسشىسى ەلىمىزدىڭ اگروونەركاسىپتىك كەشەنىنىڭ قازىرگى جاعدايى مەن ونىڭ تۇراقتى دامۋىنا باعىتتالعان شارالار تۋرالى ءمينيستردىڭ مىندەتىن اتقارۋشى ەربول قاراشوكەەۆتىڭ ەسەبىن تىڭدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ەربول قاراشوكەەۆ پرەزيدەنتتى وسىمدىك شارۋاشىلىعىن دامىتۋ, ونىڭ ىشىندە سۇرانىسقا يە اۋىل شارۋاشىلىعى داقىلدارىن ءوندىرۋ, تسيفرلاندىرۋ جانە ەگىنشىلىك تەحنولوگيالارىن ەنگىزۋ, تۇقىم شارۋاشىلىعىنىڭ زاماناۋي جۇيەسىن قۇرۋ جونىندەگى مىندەتتەر تۋرالى حاباردار ەتتى.
سالالىق ۆەدومستۆو باسشىسى مال شارۋاشىلىعىن دامىتۋ, ەگىستىكتەر مەن جايىلىمدارداعى وسىمدىكتەردىڭ تۇرلىك قۇرامىن باقىلاۋ ءۇشىن عارىشتىق مونيتورينگ پەن قاشىقتىقتان زوندتاۋدى پايدالانۋ جوسپارلارى تۋرالى باياندادى.
قاسىم-جومارت توقاەۆ مەملەكەتتىك قولداۋ شارالارى مەن سۋبسيديالاۋ تەتىكتەرىن جەتىلدىرۋ جونىندەگى جۇمىس, سونداي-اق ۆەتەرينارلىق قىزمەتتى, اگرارلىق عىلىمدى, كادرلار دايارلاۋ جۇيەسىن رەفورمالاۋ قارقىنىمەن تانىستى. سالانى رەفورمالاۋدىڭ نەگىزگى باعىتتارى اگروونەركاسىپتىك كەشەندى دامىتۋ جونىندەگى 2021-2025 جىلدارعا ارنالعان ۇلتتىق جوبا شەڭبەرىندە ىسكە اسىرىلاتىن بولادى.
كەزدەسۋ سوڭىندا مەملەكەت باسشىسى دايىن وڭدەلگەن ءونىم ءوندىرىسىن دامىتۋعا, ەگىن جيناۋ جۇمىستارىن ساپالى ءارى ۋاقتىلى جۇرگىزۋدى ۇيىمداستىرۋعا, الداعى قىس مەزگىلىندە مال شارۋاشىلىعى سالاسىن ازىقپەن قامتاماسىز ەتۋگە باعىتتالعان بىرقاتار تاپسىرما جۇكتەدى.