سوڭعى كەزدە كەدەندىك باجدار مەن سالىقتاردى تولەۋدەن بوساتىلعان ۋاقىتشا اكەلىنگەن كولىك قۇرالدارىن قازاقستان اۋماعىنا الىپ كەلۋ جاعدايى جيىلەپ كەتكەن, دەپ حابارلايدى Egemen.kz.
بۇل تۋرالى قر مەملەكەتتىك كىرىستەر كوميتەتىنىڭ ءباسپاسوز قىزمەتى اقپارات تاراتتى.
اتاپ وتەتىن جاعداي, كورسەتىلگەن اۆتوماشينالاردىڭ باسىم كوپشىلىگى ەۋرازيالىق ەكونوميكالىق وداقتىڭ (ەاەو) كەدەندىك اۋماعىنا ماڭعىستاۋ وبلىسى بويىنشا مەملەكەتتىك كىرىستەر دەپارتامەنتىنىڭ وتكىزۋ پۋنكتتەرى ارقىلى ۋاقىتشا اكەلىنىپ (ەاەو تاۋارلارى بولىپ ەسەپتەلمەيدى), كەدەندىك باقىلاۋدا بولادى.ەاەو كەدەندىك كودەكسىنىڭ 264-بابىنىڭ 6-تارماعىنا جانە 275-بابىنىڭ 2-تارماعىنا سايكەس ۋاقىتشا اكەلىنگەن كولىك قۇرالدارى دەكلارانتتىڭ (اكەلۋدى جۇزەگە اسىرعان تۇلعا) ءىس جۇزىندە يەلىگىندە جانە پايدالانۋىندا ەاەو كەدەندىك اۋماعىندا بولۋعا ءتيىس.
الايدا, بۇگىنگى تاڭدا قازاقستان اۋماعىنا ۋاقىتشا اكەلىنگەن كولىك قۇرالدارىنا قاتىستى كەدەندىك باجدار مەن سالىقتاردى تولەۋدەن, كەدەندىك تازارتۋدان جالتارىپ, مەملەكەتتىك تىركەۋگە قويىلىپ جاتقان فاكتىلەر انىقتالۋدا.
مىسالى, جەكە پايدالانۋعا ارنالعان شەتەلدىك كولىك قۇرالدارىن, شەتەل ازاماتتارى ءوز كولىك قۇرالدارىن اكەلگەن سوڭ, ءبىراز ۋاقىتتان كەيىن قر اۋماعىنان كەتىپ قالىپ جاتىر (نەگىزىنەن گرۋزيا مەن ءازىربايجان ازاماتتارى).
«بۇل كولىك قۇرالدارى تيەسىلى كەدەندىك باجدار مەن سالىقتاردى تولەۋسىز قازاقستان اۋماعىندا تىركەۋگە قويىپ, قازاقستان ازاماتىنا بەرۋ ماقساتىندا ەاەو اۋماعىنا اكەلىنگەنى تۋرالى پايىمداۋعا نەگىز بولاپ وتىر.
مەملەكەتتىك كىرىستەر كوميتەتى كەدەندىك باجدار مەن سالىقتاردى تولەۋسىز قازاقستان اۋماعىنا تىركەۋگە قويىلعان 156 كولىك قۇرالىن انىقتادى», دەلىنگەن حابارلامادا.
وسىعان بايلانىستى, قر مكك قازاقستانداعى بارلىق ازاماتقا ۋاقىتشا اكەلىنگەن كولىك قۇرالدارىن تەك كەدەندىك تازارتۋدان ءوتىپ, كەدەندىك باجدار مەن سالىقتاردى تولەگەننەن كەيىن عانا ساتىپ الۋعا جانە قازاقستان اۋماعىندا اتالعان كولىك قۇرالدارىن پايدالانۋعا بولاتىنىن ەسكەرتەدى.