بۇل تۋرالى ادام قۇقىقتارى جونىندەگى ۋاكىل ەلۆيرا ءازىموۆا ىشكى ىستەر مينيسترلىگىنىڭ جانە وبلىستاردىڭ پوليتسيا دەپارتامەنتتەرىنىڭ وكىلدەرىمەن بىرلەسىپ وتكىزگەن ءباسپاسوز كونفەرەنتسياسىندا بەلگىلى بولدى, دەپ حابارلايدى Egemen.kz قر ادام قۇقىقتارى جونىندەگى ۋاكىلدىڭ ءباسپاسوز قىزمەتىنە سىلتەمە جاساپ.
جىل سايىن 23 تامىزدا بۇكىل الەمدە قۇل ساۋداسىنىڭ قۇرباندارىن ەسكە الۋ جانە ونى جويۋ حالىقارالىق كۇنى اتاپ وتىلەدى. بۇل جوبانى ىسكە اسىرۋدى اقش-تىڭ قازاقستان رەسپۋبليكاسىنداعى ەلشىلىگى دە قولدايدى.
«ادام ساۋداسىنىڭ فاكتىلەرىنە قارسى تابىستى ءىس-قيمىل جاساۋ ءۇشىن قازىرگى پروبلەمالاردى شەشۋ تاسىلدەرىن ساپالى وزگەرتۋ, ۋاكىلەتتى ورگانداردىڭ تىعىز ءوزارا ءىس-قيمىلى مەن جۇيەلى جۇمىسى, مەملەكەت پەن ازاماتتىق قوعامنىڭ كۇش-جىگەرىن شوعىرلاندىرۋ قاجەت. قازىرگى داعدارىس بارلىق ەلدەر مەن قوعامعا اسەر ەتتى. جاڭا جاعداي حالىقتىڭ وسال توپتارىنا, ونىڭ ىشىندە مىڭداعان ميگرانتتارعا دا تەرىس ىقپال ەتەدى. بۇعان تەك ولاردى جۇمىسقا ماجبۇرلەۋ عانا ەمەس, ورىندالعان جۇمىس ءۇشىن اقى تولەنبەۋى دە جاتقىزىلادى. وسىعان ۇقساس قىلمىستاردان زارداپ شەككەندەر مەملەكەت كەپىلدىك بەرگەن بوستاندىقتار مەن ادام قۇقىقتارىن تالاپ ەتۋ مۇمكىندىگىنەن ايىرىلادى. سوندىقتان ادام ساۋداسىنا بايلانىستى قىلمىستاردى انىقتاۋعا جانە تەرگەۋگە مۇقيات نازار اۋدارۋ كەرەك», دەدى ءباسپاسوز ءماسليحاتىندا ەلميرا ءازىموۆا.
ادام قۇقىقتارى جونىندەگى ۋاكىلدىڭ حابارلاۋىنشا, جىل باسىنان بەرى ىشكى ىستەر ورگاندارى ادام ساۋداسىنا بايلانىستى 87 قىلمىستىق ءىس قوزعادى.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ 2021 جىلعى ماۋسىمنىڭ باسىندا ادام قۇقىقتارىن كەپىلدى قورعاۋدى قامتاماسىز ەتۋ ماقساتىندا قابىلدانۋى قاجەت ءبىرىنشى كەزەكتەگى شارالار تۋرالى جارلىق قابىلدادى. قر ۇكىمەتى ءبىرىنشى كەزەكتەگى 26 شارا جوسپارىن ىسكە اسىرۋعا كىرىستى, ونىڭ ىشىندە 16 شارا ادام ساۋداسىنىڭ الدىن الۋ تەتىگىن زاڭنامالىق كۇشەيتۋ جانە زارداپ شەككەندەرگە كومەك كورسەتۋ جونىندەگى شارالاردى قوسا العاندا, 2021 جىلدىڭ سوڭىنا دەيىن اياقتاۋدى جوسپارلاپ وتىر.