اقمولا وبلىسىندا جاڭا وقۋ جىلى قارساڭىندا ءداستۇرلى تۇردە «مەكتەپكە جول» رەسپۋبليكالىق قايىرىمدىلىق اكتسياسى وتكىزىلەدى. مەملەكەتتىك ورگانداردىڭ, قوعامدىق ۇيىمداردىڭ, بيزنەستىڭ وكىلدەرى, ءوڭىردىڭ دەمەۋشىلەرى مەن مەتسەناتتارى بالالارعا كيىم, اياق كيىم, مەكتەپ كەرەك-جاراقتارىن ساتىپ الىپ, مەكتەپكە جينالۋعا بەلسەندى كومەكتەسەدى, دەپ حابارلايدى Egemen.kz وبلىستىق ىشكى ساياسات باسقارماسىنا سىلتەمە جاساپ.
ءىس-شارا ماقساتى - جاڭا وقۋ جىلىنا دايىندىق كەزەڭىندە جەتىم بالالار مەن اتا-اناسىنىڭ قامقورلىعىنسىز قالعان, از قامتىلعان جانە كوپ بالالى وتباسىلاردان شىققان بالالاردى قولداۋ. ءىس-شارا وبلىستىڭ بارلىق اۋداندارى مەن قالالارىندا وتكىزىلەدى.
ءبىلىم باسقارماسى اتاپ وتكەندەي, بۇگىندە اقمولا وبلىسىندا كوپبالالى جانە از قامتىلعان وتباسىلاردان شىققان 16 مىڭنان استام وقۋشى بار, ولاردىڭ 1123-ءى ءبىرىنشى سىنىپ وقۋشىلارى.
«20 تامىزداعى جاعداي بويىنشا «مەكتەپكە جول» اكتسياسى اياسىندا الەۋمەتتىك وسال وتباسىلاردان شىققان 12951 وقۋشىعا مەكتەپ فورماسى مەن كەڭسە جابدىقتارىن ساتىپ الۋعا كومەك كورسەتىلدى, سونداي-اق ءبىرىنشى سىنىپقا باراتىن 1046 وقۋشىعا كەرەك جاراقتار جينالدى», دەپ حابارلادى وبلىستىق ۆەدومستۆودان.
ايتا كەتسەك, اتا-انالار دا «مەنىڭ اتامەكەنىم» پورتالىندا كومەك الۋعا ءوتىنىم قالدىرا الادى. بۇل پلاتفورما كومەككە مۇقتاج ادامدار مەن قايىرىمدىلىق جاساۋشىلار اراسىندا تىكەلەي بايلانىس ورناتادى.