ماڭعىستاۋ وبلىسى مۇنايلى اۋدانىنىڭ باتىر اۋىلىندا قوس بىردەي مەديتسينالىق ورتالىقتىڭ قۇرىلىسى باستالدى, دەپ حابارلايدى Egemen.kz قازاقپارات-قا سىلتەمە جاساپ.
باتىر اۋىلدىق وكرۋگىنىڭ اكىمى ساۋىت ايتباەۆتىڭ ايتۋىنشا, قازىر 15 مىڭعا جۋىق تۇرعىنى بار اۋىلدا جالعىز دارىگەرلىك امبۋلاتوريا قىزمەت ەتەدى. ال جەرگىلىكتى حالىق سانى كۇن سايىن ارتىپ كەلەدى. سوندىقتان مەديتسينا نىسانى بۇل اۋىلعا اسا قاجەت.
«ەكى بىردەي دەنساۋلىق ساقتاۋ عيماراتىنىڭ قۇرىلىسىنىڭ جۋىردا قولدانىسقا بەرىلەتىنى ءبىزدىڭ اۋىل تۇرعىندارى ءۇشىن قۋانىشتى حابار. اتالعان ورتالىقتار اۋىلىمىزدىڭ «استانا» شاعىن اۋدانىندا سالىنىپ جاتىر. ءبىرىنىڭ اۋماعى 300 شارشى مەتر, ەكىنشىسى 500 شارشى مەتردى قۇرايدى. بىرەۋى 7000 تۇرعىنعا قىزمەت كورسەتسە, كۇنىنە 100-گە جۋىق ادامدى قابىلداي الادى. ال ەكىنشى ورتالىق 15 000 ادامعا مەديتسينالىق قىزمەت ۇسىنا الادى, تاۋلىگىنە 300 بەن 500 ارالىعىنداعى ازاماتتى قامتيدى. قۇرىلىس جۇمىسى اياقتالسا, 100-گە جۋىق مامان جۇمىسپەن قامتىلماق», دەدى اۋىلدىق وكرۋگىنىڭ اكىمى ساۋىت ايتباەۆ.
ايتا كەتەيىك, جاڭا نىساندار قازان جانە قاراشا ايلارىندا قولدانىسقا بەرىلەدى دەپ جوسپارلانىپ وتىر.