اتىراۋدا «اجەتحاناعا بايلانعان مۇگەدەك بالالار» تۋرالى ۆيدەوعا تۇسىنىك بەرىلدى, دەپ حابارلايدى Egemen.kz.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى الفيا تولەعاريەۆانىڭ ايتۋىنشا, بۇل ۆيدەونى بيىلعى جىلدىڭ 8 ساۋىرىندە شارۋاشىلىق بيكەسى تۇسىرگەن.
«باسقارما باسشىلىعى اتالعان ۆيدەوعا بايلانىستى №3 وبلىستىق ارناۋلى الەۋمەتتىك قىزمەت كورسەتۋ ورتالىعىنىڭ قىزمەتكەرلەرىمەن جيىن وتكىزىپ, تۇسىنىك جۇمىستارىن جۇرگىزدى. ءتيىستى باقىلاۋ جۇرگىزبەگەن ورتالىق ديرەكتورىنا «قاتاڭ سوگىس» بەرىلىپ, تارتىپتىك جازا قولدانىلدى», دەدى الفيا تولەعاريەۆا.
ماۋسىم ايىندا وبلىستىق پروكۋراتۋرا ورتالىقتاعى بالالاردىڭ قۇقىقتارىن قورعاۋ زاڭدىلىعىنا كەشەندى تەكسەرۋ جۇرگىزگەن. وبلىس اكىمىنىڭ ءبىرىنشى ورىنباسارى مەن ۇەۇ وكىلدەرى ورتالىقتاعى قىزمەت كورسەتۋ بارىسىمەن تانىسقان.
سونداي-اق وبلىس اكىمىنىڭ ورىنباسارى مەن كامەلەتكە تولماعان بالالاردىڭ قۇقىعىن قورعاۋ جونىندەگى كوميسسيا پروكۋراتۋرا, دەپۋتاتتار, مەملەكەتتىك ورگاندار وكىلدەرىنىڭ قاتىسۋىمەن كوشپەلى وتىرىس وتكىزگەن. كوميسسيا مۇشەلەرى ورتالىقتى ارالاپ, بالالاردىڭ جاعدايىمەن, تاماقتانۋ جايىمەن ءجىتى تانىسقان.
الفيا تولەعاريەۆانىڭ ايتۋىنشا, ورتالىقتا م ۇلىك ۇرلىعى ورىن الىپ, وعان شارۋاشىلىق بيكەسىنىڭ قاتىسى بارى انىقتالعان.
«قولدانىستاعى زاڭناماعا سايكەس, شارۋاشىلىق بيكەسى ءىستىڭ ءمان-جايى انىقتالعانعا دەيىن قىزمەتتەن ۋاقىتشا شەتتەتىلدى. قازىر ول ورتالىقتىڭ قىزمەتكەرى ەمەس. ورتالىق ۇجىمى ونىڭ ۇستىنەن وبلىس پروكۋرورىنىڭ اتىنا ۇجىمدىق ارىز جازدى. ارىزدا ونىڭ قىزمەتتىك ەتيكانى ساقتاماۋى, ۇرلىققا بارعانى, جالا جابۋ مەن باسقا دا زاڭبۇزۋشىلىقتار تۋرالى ايتىلعان. قازىر اتىراۋ قالالىق پوليتسيا باسقارماسى تارالعان بەينەجازباعا قاتىستى تەكسەرۋ جۇرگىزۋدە», دەيدى الفيا تولەعاريەۆا.