باتىس قازاقستان وبلىسىندا تاعى ءبىر ورمان ءورتى تىركەلدى, دەپ حابارلايدى Egemen.kz وبلىستىق تج دەپارتامەنتىنىڭ ءباسپاسوز قىزمەتىنە سىلتەمە جاساپ.
17 تامىز كۇنى ساعات 13.52-دە ورالعا قاراستى مەلوۆىە گوركي كەنتى اۋماعىندا 10 گەكتار جەردىڭ قۇرعاق ءشوبى مەن 10 گەكتار ورمان وتقا وراندى. جالىن اۋماعى 20 شارشى مەتر ساياجاي ءۇيىن شارپىدى.
ءورت سوندىرۋگە تج دەپارتامەنتىنىڭ 51 قىزمەتكەرى مەن 8 تەحنيكاسى, ورمان شارۋاشىلىعى مەكەمەسىنەن 15 ادام, 2 تەحنيكا جانە «جايىق تازا قالا» جشس-نەن 2 ادام, 2 تەحنيكا جۇمىلدىرىلدى. جالىن 18 تامىز كۇنى جەرگىلىكتى ساعات 21.26-دا اۋىزدىقتالدى.