قازاقستان حالقىنىڭ بىرلىگى مەرەكەسى قارساڭىندا وبلىس اكىمى سەرگەي دياچەنكونىڭ قاتىسۋىمەن كىشى اسسامبلەيا مۇشەلەرىنىڭ دوڭگەلەك ۇستەل باسىنداعى ءماجىلىسى وتكىزىلدى. وبلىستىڭ جاڭا باسشىسى ەلىمىزدەگى قۋاتتى قوعامدىق ۇيىمنىڭ قازاقستان دامۋىنداعى ۇلەس-قارىمىن جوعارى باعالاپ, الداعى بىرلەسىپ اتقارار جۇمىس جوسپارلارىن تالقىعا سالدى.
بيىل ءوزىنىڭ 20 جىلدىعىن اتاپ وتەتىن ەتنومادەني بىرلەستىكتەر اسسامبلەيانىڭ قىزمەت اۋقىمىن كەڭىتۋدە ايرىقشا بەلسەندىلىك تانىتتى. ولار دوستىق پەن ىنتىماق نەگىزى مەملەكەتتىك قۇندىلىقتارعا قۇرمەت سەزىمىن قالىپتاستىرۋدا دەپ بىلەدى جانە وسى باعىتتا بەلسەندى ءىس-قيمىلداردىڭ ۇيىتقىسى سانالادى. اسسامبلەيا قىزمەتىن جانداندىرۋعا اكىمدىك تاراپىنان جان-جاقتى قولداۋ كورسەتىلەتىندىگىنە ريزاشىلىق ءبىلدىرىلدى. ماسەلەن, وتكەن جىلى بۇل ماقساتقا 46 ميلليون تەڭگە جاراتىلسا, 2010 جىلدىڭ بيۋدجەتىندە ونى 52,4 ميلليون تەڭگەگە ۇلعايتۋعا شەشىم قابىلدانىپ وتىر. اسسامبلەيانىڭ جاستار قاناتى دا ونەگەلى ىستەردىڭ جارشىسىنا اينالا ءبىلدى. قازىر كوكشەتاۋدىڭ 26 مەكتەبىندە جاستار ۇيىمى جۇمىس اتقارادى. وبلىس اكىمى بۇل باعىتتا “نۇر وتان” حدپ وبلىستىق فيليالىمەن تىعىز بايلانىس ورناتۋ قاجەتتىگىن ەسكە سالدى.
وبلىستىق كورەي ەتنومادەني بىرلەستىگىنىڭ جەتەكشىسى مويسەي چجەن اقساقال ەلباسى ن.نازارباەۆتىڭ جۋىرداعى كورەياعا ساپارى قازاقستاندىق وتانداستارىن قۋانىشقا بولەپ, ەرتەڭگى كۇنگە سەنىمىن ۇشتاعانىن اتاپ ءوتتى. ول كىشى اسسامبلەيانىڭ جاڭا توراعاسى, ەلىمىزگە بەلگىلى قوعام قايراتكەرى س.دياچەنكونىڭ دوستىق بايراعىن جەلبىرەتۋدەگى قىزمەتىنە تابىستار تىلەدى.
چەشەن-ينگۋش بىرلەستىگىنىڭ توراعاسى گەريحان يانديەۆ ەلىمىزدەگى ءدىني قاۋىمداستىقتار اراسىنداعى بايلانىستاردىڭ الەمدىك ۇلگىسى قالىپتاسقاندىعىن ماقتانىشپەن تىلگە تيەك ەتسە, نەمىس ەتنومادەني بىرلەستىگىنىڭ ءتورايىمى قازاقستاننىڭ الەمدىك جوعارى بەدەلىنىڭ ارقاسىندا شەت ەل قاۋىمداستىعىنىڭ بىزگە قىزىعۋشىلىق تانىتىپ, ارنايى گرانتتار بولە باستاعانىن اتاپ كورسەتتى. ۇلتتىق بىرلەستىكتەردىڭ عىلىمي ۇيلەستىرۋشىسى نينا ميتچينوۆا, وبلىستىق مۇراعات ديرەكتورى الەكساندر پولوجەنتسوۆ ەتنوس وكىلدەرىنىڭ وقۋى, جاستارعا ءبىلىم گرانتتارىنىڭ ءبولىنۋى, ايماقتىق سەمينارلارعا قاتىسۋ, ۇلتتىق ونەر ماماندارىنىڭ تاپشىلىعى ماسەلەلەرىن كوتەردى.
كەزدەسۋ جۇرتتى ەلەڭ ەتكىزگەن وقيعامەن اياقتالدى. وبلىستىق كاباردين-بالكار ەتنومادەني بىرلەستىگىنىڭ باسشىسى, ەڭبەك ەرى يبراگيم جانعورازوۆ اقساقال ءوزى باسقاراتىن جشس قاراۋىنداعى 160 ورىندىق بالالار باقشاسىن, اۋىلدىق-دارىگەرلىك امبۋلاتوريا مەن اسحانا عيماراتتارىن كوممۋنالدىق مەنشىككە تەگىن وتكىزەتىنىن مالىمدەدى.
وبلىس اكىمى س.دياچەنكو ۇلتتىق بىرلەستىكتەردىڭ بىرنەشە وكىلىن جەكە سۇراقتارى بويىنشا قابىلدادى.
باقبەرگەن امالبەك, اقمولا وبلىسى.