نۇر-سۇلتاندا «بيزنەستىڭ جول كارتاسى-2025» باعدارلاماسى اياسىندا 68 جوبا قولداۋ تاپتى, دەپ حابارلايدى Egemen.kz.
مەملەكەتتىك گرانتتار شاعىن كاسىپكەرلىك سۋبەكتىلەرىنە تەك ەكونوميكانىڭ باسىم سەكتورلارىندا بەرىلەدى, وسىلايشا, ەگەر ەقجج كاسىپكەر ۇسىنعان حابارلامادا تىزبەگە ەنبەسە, جوبا قورعاۋعا جىبەرىلمەيدى.
كونكۋرستىق كوميسسيا وتىرىسىنىڭ قورىتىندىسى بويىنشا 68 جوبا ماقۇلداندى, ونىڭ ىشىندە حالىقتىڭ الەۋمەتتىك وسال توپتارىنا جاتاتىن كاسىپكەرلەردىڭ 23 جوباسى بار.
باعدارلامانىڭ شارتتارى بويىنشا بولىنگەن قاراجاتتىڭ 20%-ى ءحاوت-قا جاتاتىن شاعىن كاسىپكەرلىك سۋبەكتىلەرىنە مەملەكەتتىك گرانتتار بەرۋگە باعىتتالادى.
«Active life» جك «ينۆاستو» ءموبيلدى جىلجىمالى سەرۆيس ورتالىعى سياقتى الەۋمەتتىك ماڭىزى بار جوبالاردى اتاپ وتكەن ءجون, ولار نۇر-سۇلتان قالاسىنىڭ كەز كەلگەن جەرىنە كەلىپ, سول جەردە تەحنيكالىق كومەك كورسەتە الادى نەمەسە كۇردەلى جوندەۋ جۇرگىزىلگەن جاعدايدا ۋاقىتشا اربامەن قامتاماسىز ەتە الادى. سونداي-اق قازاقستاندا العاشقى وتاندىق ءوندىرىستىڭ ەكزوسكەلەتتەرىن شىعارۋدى جوسپارلاپ وتىرعان «Bars» جك «وتاندىق ەكزوسكەلەت ءوندىرىسى» يننوۆاتسيالىق بيزنەس-يدەياسى قولداۋ تاپتى.
ايتا كەتەيىك, وسى جىلدىڭ 28 ماۋسىمى مەن 12 شىلدەسى ارالىعىندا نۇر-سۇلتان قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى «بيزنەستىڭ جول كارتاسى 2025» بيزنەستى قولداۋ مەن دامىتۋدىڭ مەملەكەتتىك باعدارلاماسىنىڭ جۇمىس ورگانى رەتىندە «Qoldau» تسيفرلىق بيزنەس-پلاتفورماسى ارقىلى جاڭا بيزنەس-يدەيالاردى ىسكە اسىرۋ ءۇشىن مەملەكەتتىك گرانتتاردى بەرۋ كونكۋرسىنا شاعىن كاسىپكەرلىك سۋبەكتىلەرىنىڭ وتىنىمدەرىن قابىلدادى.
بارلىعى 335 ءوتىنىم كەلىپ ءتۇستى, مالىمەتتەر وڭدەلگەننەن كەيىن 177 جوبا قورعاۋعا جىبەرىلدى.