اتىراۋدا بالالاردى سپورتقا تارتۋ ءۇشىن قوسىمشا 315 سەكتسيا اشۋ كوزدەلىپ وتىر, دەپ جازادى Egemen.kz.
وبلىستىق دەنە شىنىقتىرۋ جانە سپورت باسقارماسىنىڭ باسشىسى رينات يبراگيموۆتىڭ مالىمەتىنە سۇيەنسەك, سپورتتىق مەكەمەلەردە تۇراقتى شۇعىلدانۋشى جاسوسپىرىمدەردىڭ ۇلەسى مەكتەپ جاسىنداعى بالالار سانىنىڭ 16,5 پايىزىن قۇرايدى. جىل اياعىنا دەيىن بالالارعا ارنالعان تەگىن 315 قوسىمشا سەكتسيا اشىپ, شۇعىلدانۋشىلار سانىن 6500-گە جەتكىزۋ جوسپارلانعان.
«ەل تاۋەلسىزدىگىنىڭ 30 جىلدىعىنا وراي, «قازاقستان – سپورتتىق ۇلت» جوباسى اياسىندا 35 ءىس-شارا, ونىڭ ىشىندە تاەكۆوندو, بوكس پەن كيكبوكسينگتەن رەسپۋبليكالىق چەمپيوناتى, جەكپە-جەكتەن باتىس ايماقتىق كۋبوگى, كاسىپقويلار اراسىندا MFC حالىقارالىق ءتۋرنيرى ءوتتى. مەملەكەت باسشىسى حالىققا جولداۋىندا سپورت كلۋبتارىنىڭ قارجىسىن وڭتايلاندىرۋ, بالالار مەن جاسوسپىرىمدەر سپورتىنا ەرەكشە كوڭىل ءبولۋدى تاپسىرعان ەدى. وسىعان بايلانىستى كاسىبي كلۋبتار قارجىسى قىسقارتىلىپ, قوسىمشا 1000 بالا سەكتسيالارعا تارتىلدى» دەيدى رينات يبراگيموۆ.
ونىڭ ايتۋىنشا, جىل باسىنان بەرى وبلىس سپورتشىلارى ەل چەمپيوناتتارىنان 550 مەدال يەلەنگەن. سونداي-اق, 1 سپورتشى الەم چەمپيوناتىنان, 7 سپورتشى ازيا چەمپيوناتىنان, 7 سپورتشى الەم كۋبوگىنەن, 81 سپورتشى حالىقارالىق تۋرنيرلەردەن جەڭىمپاز نەمەسە جۇلدەگەر بولىپ ورالعان. كوماندالىق سپورت تۇرلەرىنەن اتىراۋلىق باسكەتبولشىلار ەل چەمپيوناتىنىڭ كۇمىس, ستريتبول كومانداسى التىن, ۆولەيبولدان جاستار كومانداسى, سۋ دوبى جانە «نارىن» ەرەسەكتەر كومانداسى قولا جۇلدەنى يەلەنگەن.
«مامان تاپشىلىعى ماسەلەسىن شەشۋ ماقساتىندا بىرقاتار جۇمىس اتقارىلدى. سوڭعى ءۇش جىلدا «دەنە شىنىقتىرۋ جانە سپورت» ماماندىعىنا بولىنگەن وبلىس اكىمى گرانتتارىنىڭ العاشقى تۇلەكتەرى 2022 جىلى سپورت مەكەمەلەرىنە كەلىپ, تۇراقتى جۇمىسقا ورنالاسادى» دەيدى رينات يبراگيموۆ.