مەملەكەتتىك گرانت رەسپۋبليكالىق كوميسسيا وتىرىسىنىڭ قورىتىندىسى بويىنشا تاعايىندالدى. كوميسسيا قۇرامىندا مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى, جۋرناليستەر, قازاقستان ستۋدەنتتەرىنىڭ اليانسى جانە «وتانداستار» قورىنىڭ وكىلى بولدى, دەپ جازادى Egemen.kz.
بيىل ء«بىلىم بەرۋ» جانە «دەنساۋلىق ساقتاۋ», سونىمەن قاتار اقپاراتتىق-كوممۋنيكاتسيالىق تەحنولوگيالار, قۇقىق, ديزاين, مەنەدجمەنت ءبىلىم بەرۋ باعىتتارى سۇرانىسقا يە. گرانتقا ۇمىتكەرلەر اراسىندا 8 مىڭنان استام «التىن بەلگى» يەگەرى, 800-دەن استام حالىقارالىق جانە رەسپۋبليكالىق وليمپيادا جەڭىمپازى, سونداي-اق رەسپۋبليكالىق جانە حالىقارالىق سپورتتىق جارىستاردىڭ 520 جەڭىمپازى بار. ۇپايلار تەڭ بولعان جاعدايدا, ولاردىڭ باسىم قۇقىعى بولدى.
ء«بىلىم جانە عىلىم مينيسترلىگى مەملەكەتتىك ءبىلىم گرانتتارى يەگەرلەرىنىڭ ساپالىق قۇرامىن جاقسارتۋ ماقساتىندا جۇمىس جۇرگىزىپ جاتىر. ءبىز بولاشاقتا پەداگوگ بولعىسى كەلەتىن تالاپكەرلەرگە قويىلاتىن تالاپتى كۇشەيتىپ جاتىرمىز. ۇلتتىق بىرىڭعاي تەستىلەۋدە پەداگوگيكالىق باعىتتار بويىنشا ءوتۋ بالى 75-كە دەيىن كوتەرىلدى. بۇل رەتتە ءبىز وڭ ءۇردىستى بايقاپ وتىرمىز — پەداگوگ بولۋعا نيەت بىلدىرگەن تۇلەكتەردىڭ سانى ارتىپ كەلەدى», دەپ اتاپ ءوتتى قر ءبىلىم جانە عىلىم ۆيتسە-ءمينيسترى قۋانىش ەرعاليەۆ.
ەستەرىڭىزگە سالا كەتەيىك, بيىل مەملەكەت باسشىسىنىڭ تاپسىرماسىنا سايكەس العاش رەت الەۋمەتتىك وسال ساناتتاعى بالالارعا كۆوتالار ءبولىندى. ياعني, كوپبالالى نەمەسە تولىق ەمەس وتباسىلاردان شىققان بالالار, سونداي-اق ەرەكشە ءبىلىم بەرۋ قاجەتتىلىگى بار بالا تاربيەلەپ وتىرعان وتباسىنان شىققان تۇلەك گرانت الۋدا باسىم مۇمكىندىككە يە بولدى.
«سونىمەن قاتار ءتيىستى كۆوتا بويىنشا گرانتتاردى جەتىم بالالار مەن ەتنيكالىق دياسپورا وكىلدەرى الدى. وسىلايشا, ازاماتتاردىڭ الەۋمەتتىك وسال ساناتىنداعى تالاپكەرلەر ءبىلىم بەرۋ گرانتتارىن بەرۋ كەزىندە ارتىقشىلىققا يە بولدى. ماسەلەن, پەداگوگيكالىق ماماندىقتارعا 11 مىڭعا جۋىق ءبىلىم گرانتى بولىنسە, ونىڭ مىڭنان استامىنا جەڭىلدىگى بار ساناتتاعى ازاماتتار يە بولدى», دەدى قر ءبىلىم جانە عىلىم ۆيتسە-ءمينيسترى.
ايتا كەتەيىك, پرەزيدەنتتىڭ تاپسىرماسى بويىنشا گرانتتىڭ جالپى سانى 5 مىڭعا ارتتى. ياعني, وتكەن جىلى 51 مىڭ گرانت بولىنسە, بيىل 56 مىڭعا دەيىن ۇلعايدى. ەندىگى كەزەكتە مەملەكەتتىك ءبىلىم گرانتى يەگەرلەرى وقۋعا قابىلدانۋ ءۇشىن جوعارى وقۋ ورنىنا 25 تامىزعا دەيىن قۇجات تاپسىرۋى ءتيىس.
مەملەكەتتىك گرانت تاعايىنداۋ ماسەلەسىنە قاتىستى بارلىق سۇراقپەن تومەندەگى نومىرلەرگە حابارلاسۋعا بولادى:
87172 695096
87172 695280
87172 695287
87172 695292
87172 695071
87172 742284
87172 742525
8 7172 741739