قوستاناي وبلىسىندا ەكى جاستاعى بالا تەرەڭدىگى سەگىز مەتر بولاتىن سۋ قۇدىعىنا قۇلادى. بۇل تۋرالى قر توتەنشە جاعدايلار مينيسترلىگىنىڭ رەسمي وكىلى تالعات ءۋالي مالىمدەدى, دەپ حابارلايدى Egemen.kz.
وقيعا 10 تامىز كۇنى قوستاناي وبلىسىنىڭ سادچيكوۆكا اۋىلىندا ساعات 17.25-تە بولعان. قۇتقارۋشىلار ساعات 17.54-تە كەلگەن كەزدە بالا ەسىن ءبىلىپ جاتقان.
«قۇتقارۋشىلار ءمان-جايدى باعالاعاننان كەيىن, بالاعا زيان كەلتىرمەي, قۇدىققا پاراللەل شۇڭقىر قازۋدى باستادى. ول 3,5 مەتر تەرەڭدىكتە بولدى. قۇتقارۋشىلار بالانى قۇدىقتان ساعات 19.20-دا شىعارىپ, مەديتسينالىق كومەك كورسەتۋ توبىنا تاپسىردى», دەدى تالعات ءۋالي.
وقيعا ورنىندا جەدەل قۇتقارۋ جاساعىنىڭ 9 قىزمەتكەرى مەن 2 تەحنيكا جۇمىس ىستەدى. اۋىل تۇرعىندارى دا كومەككە كەلدى.
توتەنشە جاعدايلار مينيسترلىگى بالالاردى ۇلكەندەردىڭ قاراۋىنسىز قالدىرماۋعا شاقىرادى.