ەلوردا مەكتەپتەرىندە وقۋ جىلى قالاي باستالادى؟

«بۇل وقۋ ورىندارىنا كارانتين كەزىندە وقۋ ۇدەرىسىن ءداستۇرلى فورماتتا جالعاستىرۋعا مۇمكىندىك بەرەدى», دەدى دەپارتامەنتتەگىلەر.

2021-2022 وقۋ جىلىندا بارلىق سىنىپ ءداستۇرلى فورماتتا وقيدى دەپ جوسپارلانعان. بۇل رەتتە, باسقارما مالىمەتىنشە, ءبارى قالاداعى ەپيدەميولوگيالىق جاعدايعا بايلانىستى.

«بارلىق ءبىلىم بەرۋ ۇيىمى نۇر-سۇلتان قالاسىنىڭ باس سانيتاريا دارىگەرىنىڭ قاۋلىسىنا سايكەس جۇمىس ىستەيدى. وقۋ كەزىندە مەكتەپتەردە كۇندەلىكتى دەزينفەكتسيا, تازالاۋ جۇمىستارى جۇرگىزىلەدى. مەكتەپكە كىرەبەرىستە وقۋشىلاردىڭ دەنە قىزۋى ولشەنەدى, جرۆي بەلگىلەرى بار وقۋشىلار وقۋعا جىبەرىلمەيدى», دەلىنگەن حابارلامادا.

مەكتەپتە الەۋمەتتىك اراقاشىقتىق ساقتالۋى كەرەك. ءار سىنىپقا ءبىر اۋديتوريا بولىنەدى. مەكتەپ وقۋشىلارىنا ارنالعان ءۇزىلىس ءارتۇرلى ۋاقىتقا بەلگىلەنەدى. وقۋ اۋىسىممەن جۇرگىزىلەدى. بالاباقشا سىنىپتارى مەن توپتارىنا 25 بالادان ارتىق جىبەرىلمەيدى.

سونىمەن قاتار, مۇعالىمدەر مەن مەكتەپ تەحنيكتەرى وقۋ ماۋسىمى باستالعانعا دەيىن ۆاكتسيناتسيادان ءوتۋى ءتيىس. مەكتەپتەردە بۇقارالىق ءىس-شارا وتكىزۋ شەكتەلەدى, ولار ساباق اراسىندا دەنە شىنىقتىرۋ ءساتىن وتكىزەدى, اسحانالاردىڭ جۇمىس كەستەسى بەلگىلەنەدى. سونداي-اق, مەكتەپتەردە مەديتسينالىق بولمە مەن وقشاۋلاۋ ورىنى قۇرىلادى.

مينيسترلىك اتا-انا دا, بالا دا ءداستۇرلى ءبىلىم بەرۋ فورماتىنا ورالعىسى كەلەتىنىن ايتتى.

«بىراق قازىر كوروناۆيرۋسقا بايلانىستى تۇراقسىزدىق بار. ءوز تاراپىمىزدان تاۋەكەلدەردى بارىنشا ازايتىپ, 1 قىركۇيەككە دەيىن مەكتەپتەردى اشۋ ءۇشىن قولدان كەلگەننىڭ ءبارىن جاسايمىز. بىراق ءبىز ەپيدەميولوگيالىق جاعداي ناشارلاعان جاعدايدا دايىن بولۋىمىز كەرەك. وندا ونلاين وقىتۋ فورماتىنا اۋىسامىز», دەدى باسقارماداعىلار.

سونداي-اق, ءبىلىم جانە عىلىم ءمينيسترى اسحات ايماعامبەتوۆ رەسپۋبليكالىق پەدكەڭەستە بارلىق مۇعالىمدى كوروناۆيرۋسقا قارسى ەكپە الۋعا شاقىردى.

ماۋسىمنىڭ باسىندا نۇر-سۇلتان قالاسىنىڭ اكىمى التاي كولگىنوۆ ەلوردادا پەداگوگتەردىڭ 40 پايىزدان استامى ەكپە العانىن مالىمدەدى.