التىن تۇرماق, كۇمىستىڭ ءوزى ارمان بولعان وليمپيادا

ماسەلەنى شەشۋ جولى –

وتاندىق باپكەرلەرگە ارقا سۇيەۋ

سپورت جۋرناليستيكاسىندا جۇر­گەنىمىزگە ون جىلدان اسىپتى. بىلە­تىنىمىزدەن, بىلمەيتىنىمىز كوپ-اق. الايدا باقتيار ارتاەۆ ايتپاقشى, وليمپيادا كەزىندە كۇللى قازاق ساراپشى, باپكەر بولىپ كەتەدى. كەيبىرىنە بارەكەل­دى دەپ وتىراسىڭ. كەي پىكىر جاعاڭدى ۇستاتادى. ارينە, پىكىر الۋاندىعى – قوعامدىق دامۋعا سەرپىلىس بەرەتىن فاكتور. دەسەك تە, پىكىردىڭ دە «ەستىسى بار, ەسەرى بار». الەۋمەتتىك جەلىدەگى پىكىرلەرگە ىلەسە بەرەتىن بولساق, پرەزي­دەنت ايتقان بۇقارالىق سپورتتى دامىتۋ ارقىلى ۇلتىمىزدىڭ دەنساۋلىعىن جاقسارتۋىمىز, سپورت جۇلدىزدارىنىڭ جاڭا بۋىنىن تاربيەلەپ شىعارۋىمىز ەكىتالاي.

ءسوز جوق, توكيو وليمپيادا­سىندا سەگىز قولا مەدال جە­ڭىپ العان قازاقستان قۇراما­سى سپورت­شى­­لارىنىڭ جەتىستىگى بۇ­رىن­عى وليم­پيادالارعا قا­را­عان­دا وتە تومەن. الدىڭ­عى ويىن­داردا ۇلتتىق قۇراما­نىڭ قورجىنىندا كەمىندە ءبىر التىن بولدى. اتلانتا-1996 (3-4-4), سيدنەي-2000 (3-4-0), لوندون-2012 (3-1-7) جانە ريو-2016 (3-5-10) وليمپيادالارىندا قازاق­ستاندىق سپورتشىلار ءۇش التىن, بەيجىڭدە-2008 (2-3-4) – ەكى, افي­نادا-2004 (1-4-3) ءبىر التىن مەدال جەڭىپ الدى. ءتىپتى ريو-2016 وليم­پياداسىندا مەدالدار سانى جونىنەن قازاقستان­نىڭ سپورت تاري­حىندا رەكوردتىق كورسەتكىشكە يە بولدى.

ەندى اراعا بەس جىل سالىپ نەگە مۇنشاما تومەن ناتيجە كورسەتتىك؟ بۇل سۇراققا كورگەنىمىز بەن بىلگەنىمىزگە سۇيەنە وتىرىپ, وليمپيادانى ءبىر شولىپ ءوتۋدى ءجون سانادىق.

پاندەمياعا بايلانىستى كوپتەگەن ىرىكتەۋ ءتۋرنيرى وتپەگەندىكتەن,  توكيو وليمپياداسىنا قازاقستان قۇراماسى نەبارى 98 جولداما جەڭىپ الىپ,  تاعى ءبىر انتيرەكورد جاڭارتتى. بۇعان دەيىنگى سپورتشىلار سانى جونىنەن ەڭ تومەن دەپ ەسەپتەلىپ كەلگەن 1996 جىلعى اتلانتا وليمپياداسىندا بۇدان كوپ سپورتشى بارعان ەدى.

اۋىر اتلەتيكاداعى دوپينگ داۋىنا بايلانىستى توكيو وليمپياداسىندا ەرلەر سالماعى قىسقارعانىن بىلەسىزدەر. مۇنداي شەكتەۋ ءبىزدى دە اينالىپ وتپەدى. بۇرىن ءتورت ەر, ءتورت ايەل قاتىسا الاتىن باسەكەدە بۇل جولى قازاقستان قۇراماسى تەك ەكى عانا سپورتشىعا (1 ەر, 1 ايەل) سەنىم ارتتى. شەكتەۋگە قاراماستان, باپ­كەر­لەر تاڭداۋىمەن بارعان يگور سون مەن ءزۇلفيا چينشانلو قولا مەدال يەلەندى. ز.چينشانلونىڭ كۇمىس مەدالعا تالاسۋعا مۇمكىندىگى بار ەدى, الايدا تورەشىلەر ونىڭ بىرنەشە مۇمكىندىگىن ەسەپكە المادى.

جالپى, اتالعان سپورت تۇرىنەن قازاق­ستانعا تولىق ليتسەنزيا بەرگەننىڭ وزىندە سپورتشىلارىمىزدىڭ جەتىستىگى وزگەرە قويۋى ەكىتالاي. سوڭعى كەزدە قانشاما اۋىر جۇكتى باسىنان وتكەرگەن اۋىر اتلەتيكادان ءبىزدىڭ ەل ارتتا قالىپ بارادى. 2019 جىلى وتكەن الەم چەمپيوناتىنا بارعان قازاقستاندىقتار اراسىندا تەك يگور سون عانا مەدالمەن ورالدى. سون­دىقتان ەكى سپورتشى عانا بارىپ, ەكەۋى دە مەدالمەن قايتقاننىڭ ءوزى ازىرگە جاقسى ناتيجە.

اتتەگەن-ايى, كەزىندە دوپينگ داۋىنا قاتىسى بار دەپ كىنا تاققان باپكەر ەرجان بولتاەۆ قازىر وزبەكستان اۋىر اتلەتيكاسىنا ەڭبەگىن ءسىڭىرىپ ءجۇر. ونىڭ شاكىرتى اكبار جۋراەۆ وليمپيادا رەكوردىن جاڭارتىپ وزبەك حالقىنا التىن مەدال الىپ بەردى. ەندى وسىنداي باپكەرلەرگە ەلىمىز ارقا سۇيەيتىن كەز كەلدى. سونداي-اق كەزىندە الەم چەمپيوناتىندا اتوي سالعان جاسۇلان قىدىرباەۆ, الماس وتەشوۆ, ۆلاديمير سەدوۆ سەكىلدى بۇرىنعى سپورتشىلاردى دا اۋىر اتلەتيكاعا تارتۋ كەرەك سەكىلدى. ەڭ باستىسى, دوپينگ داۋىنا قايتا ۇشىراماس ءۇشىن قۇراماعا بىلىكتى دارىگەر شاقىرۋ كەرەك. ول ءبىرىنشى كەزەكتە تۇرعان وزەكتى ماسەلە.

بوكس دەرجاۆاسى بولۋ ءۇشىن نە ىستەۋ كەرەك؟

توكيو وليمپياداسىندا ارلەن لوپەس, حۋليو سەسار لا كرۋز سەكىلدى كۋبالىق بوكسشىلار بارلىق قارسىلاسىنان باسىم ءتۇسىپ, ەكى دۇركىن وليمپيادا چەمپيونى اتاندى. ال بىزدە ەكى دۇركىن وليمپيادا جەڭىمپازى جوق. سوندىقتان بىزگە بوكس دەرجاۆاسىمىز دەپ ايتۋ ازىرگە ەرتە. قازاقستاننىڭ بوكستان بۇرىن دا ۋىس-ۋىس التىن العان كەزى بولعان ەمەس. 2000 جىلى سيدنەي تورىندە 12 سالماق بويىنشا ەكى قازاق چەمپيون بولعاندا, كۋبانىڭ ءتورت بىردەي بوكسشىسى التىن مەدال جەڭىپ العان ەدى.

بۇگىندە ەرلەر بوكسى سەگىز سالماققا قىسقارعانىن بىلەسىزدەر. سونىڭ وزىندە كۋبا بوكسشىلارى ءتورت التىن الىپ, سيد­نەيدەگى جەتىستىگىن قايتالادى. بىراق كۋبالىقتاردى بۇگىندە بەيجىڭ وليم­پياداسىندا بىردە-ءبىر التىن الا المادى دەپ ايتپايدى. ەگەر ءبىز دە كە­لەسى وليمپيادادا كەز كەلگەن سپورت تۇرىنەن التىندى توپىرلاتىپ الىپ جات­­­ساق, قۇرا­مامىزدىڭ ساتسىزدىگى لەزدە ۇمى­تىلا­تىنى ءسوزسىز.

جاڭا باپكەر عالىمبەك كەنجەباەۆ كەلگەلى بوكستىڭ سالى سۋعا كەتتى دەۋگە بولادى. توكيو تورىندە سەگىز سالماق­تىڭ بارلىعىندا ءبىزدىڭ بوكسشىلار سىن­عا ءتۇستى. وكىنىشكە قاراي, ەكەۋى عانا قولا جۇلدەگە قول جەتكىزدى. ريو وليم­پياداسىمەن سالىس­تىرمالى تۇردە ايت­ساق, توكيو دوداسىندا تورەشىلەر ءادىل تورەلىك ەتتى دەۋگە بولادى. تەك ساكەن بي­بوسىنوۆتىڭ جەڭىسىن تارتىپ الدى دەمەسەڭىز, قالعاندارى دۇرىس. ايت­پاي كەتۋگە بولمايتىن تاعى ءبىر جايت, اۋستراليالىق تورەشى قازاقستاندىق بىر­دە-ءبىر بوكسشىعا جەڭىس بەرمەدى. ءتىپتى ساكەن بيبوسىنوۆ قارسىلاسىن «نوكداۋن» جاساعاننىڭ وزىندە كارل رۋحەن جەڭىستى بريتانيالىققا بەرىپ وتىردى. سوعان قاراپ كارلدىڭ قا­زاقستاندىقتارعا «كەگى» كەتكەن بە ەكەن دەگەن ويعا قالادى ەكەنسىڭ. تاعى دا ءبىر بايقاعانىمىز, ءبىزدىڭ بوكسشىلارىمىز العاشقى راۋندتا سىلبىر, اڭدىپ, «ۇيىقتاپ» ءجۇرىپ جۇدىرىقتاستى. ال قالعان ەكى راۋندتا عانا باپكەرلەردىڭ ء«ايت, ءايت» دەۋىمەن قارسىلاسىن قۋىپ جەتەمىن دەپ الەككە ءتۇسىپ جاتتى. بۇل ارنايى قۇرعان تاكتيكا بولسا, كەلەسىدە مىندەتتى تۇردە باسقا جوس­پار ويلاستىرعان ءجون. كوپ بوكسشىمىز قىسقا قاشىقتا جۇ­دىرىقتاسۋدى بىلمەي جاتتى. ونى دا ەسكەرۋ كەرەك.

جالپى, سوڭعى جىلدارى بوكس مانەرى قاتتى وزگەردى. بۇرىنعىداي جەلىپ ءجۇرىپ, تاكتيكالىق تۇرعىدان قارسىلاسىڭدى تۇقىرتا المايسىڭ. قازىرگى بوكس ناعىز توبەلەسكە اينالعان. ءتىپتى تورەشىلەردىڭ ءوزى توبەلەسكىش بوكسشىلارعا ءبىر بۇي­رەك­­تەرى بۇرىپ تۇراتىنىن سوناۋ ريو وليم­پياداسىنان بەرى بايقاپ ءجۇرمىز. بىراق مۇنى ەسكەرەتىن ءبىزدىڭ باپكەرلەر جوق. بوكسشىلارىمىز قارسىلاستارىنىڭ ادى­مىن اڭدىپ, بارلاۋ جۇرگىزەدى. ءسويتىپ ۋاقىتتىڭ قالاي زىمىراپ وتكەنىن دە اڭ­­عارماي قالادى. بۇل رەتتە كۋبا مەن رەسەي بوكسشىلارىن ايتپاعاندا برا­زيليا, وزبەكستان, فيليپپين, اقش بوكس­شىلارىنىڭ جانكەشتىلىگىن مىسالعا كەلتىرۋگە بولادى.

دەگەمەن دە بوكس ناتيجەسى ءساتسىز بولدى. ونى سەرىك ساپيەۆ تە ايتتى. ەندى ع.كەنجەباەۆقا بارلىعىن وزگەرتۋگە بولادى. وليمپياداعا اتتانار الدىندا «اقبۇلاق» وليمپيادالىق كەشەنىندە كارانتيندە بولعانىمىزدا «مەنمىن» دەگەن جاستارىمىزدىڭ ءوسىپ كەلە جاتقانىن كوردىك. وليمپيادا ءبىتتى, ەندى نە ىستەۋ كەرەك؟ ساكەن بيبوسىنوۆ, بەكزات نۇر­داۋلەتوۆ سەكىلدى بوكسشىلاردىڭ ءالى قۇ­راماعا بەرەرى كوپ. «پوتەنتسيالى» جوعارى جاستاردى تارتىپ, قالعان سال­ماقتى جاڭارتسا, قۇرامامىز ءالى تالاي رەت جەڭىسكە جەتەدى.

قۇر كەۋدە كەرە بەرۋگە بولمايدى...

قازاق بالۋان, باتىر حالىق دەپ ايتۋدان ءالى جالىقپايمىز. ارينە, داڭق­تى قاجىمۇقان بابامىزدان باستاپ, ابىلسەيىت ايحانوۆ, جاقسىلىق ۇشكەمپىروۆ سياقتى بالۋاندارىمىزدىڭ شوقتىعى بيىك. الايدا ەلىمىز ەگەمەندىگىن الىپ, جەكە مەملەكەت بولعالى بالۋاندارىمىز وليمپيا ويىندارىندا الا-قۇلا ونەر كورسەتىپ ءجۇر. سوندىقتان گرەك-ريم كۇرەسىنە ءبىر سىلكىنىس كەرەك. ايتپەسە, 1996 جىلعى اتلانتادا يۋري مەلنيچەنكو تاۋەلسىز قازاقستان تاريحىندا العاش­قىلاردىڭ ءبىرى بولىپ وليمپيادا التىنىن جەڭىپ الدى. وكىنىشكە قاراي, مەلنيچەنكونىڭ ءىزباسارلارى بۇدان كەيىن جەڭىس تۇعىرىنا كوتەرىلە المادى. 2004 جىلى افينادا گەورگي تسۋرتسۋميا قولدا تۇرعان وليمپيادا التىنىنان ايىرىلىپ كۇمىستى قاناعات تۇتسا, محيتار مانۋكيان قولا جۇلدە الدى. 2008 جىلى بەيجىڭ وليمپياداسىندا نۇرباقىت تەڭىزباەۆ كۇمىس مەدال جەڭىپ الدى. 2012 جىلى دانيال گادجيەۆ ۇزدىك ۇشتىكتەن كورىندى. ريو مەن توكيو وليمپياداسىندا باقتيار بايسەيىتوۆ باپتايتىن گرەك-ريم شەبەرلەرىنىڭ قورجىنى بوس قايتتى.

اسەت سەرىكباەۆ باپتايتىن ەركىن كۇ­رەس شەبەرلەرى بەس سالماقتا بەلدەسىپ, نۇريسلام ساناەۆ قولا جۇلدەگەر اتاندى. تاعى ەكى بالۋان ءۇشىنشى ورىن ءۇشىن كۇ­رەسىپ, وليمپيادانى بەسىنشى ورىنمەن اياقتادى. ناتيجە قاناعاتتانارلىق دەۋگە بولادى. 2016 جىلى ريو-دە-جانەيرودا وتكەن وليمپيادادا ەركىن كۇرەس بالۋاندارى التى سالماقتىڭ بەسەۋىندە جولداما الىپ تۇرىپ, جۇلدەسىز قايتقان ەدى.

ەركىن كۇرەس بالۋاندارىنىڭ 1996 جىل­دان بەرگى ناتيجەلەرىنە كوز سالساق, تەك ريو وليمپياداسىندا عانا قور­جىنىمىزدىڭ بوس قايتقانىن بايقاۋعا بولادى. ماسەلەن, اتلانتاداعى العاشقى وليمپيادادا ماۋلەن مامىروۆ قازاق ەلىن قولا مەدالمەن قۋانتتى. ودان كەيىن سيدنەيدە يسلام بايرامۋكوۆ كۇمىس مەدال جەڭىپ السا, 2004 جىلى گەننادي لاليەۆ تاعى دا تۇعىر بيىگىنەن كورىنىپ, قازاقستان قۇراماسىنا كۇمىس مەدال سىيلادى. 2008 جىلى قىتاي استاناسىندا ماريد مۋتاليموۆ قولادان القا تاقتى. ارادا ءتورت جىل وتكەندە اقجۇرەك تاڭاتاروۆ پەن داۋلەت شابانباي لوندون تورىندە قولا مەدالدى قانجىعالارىنا بايلادى.

بۇل جەردە قىزدار كۇرەسى كوڭىلدەن شىقپادى. ريو-2016-دا ءبىر كۇمىس, ءبىر قولا مەدال جەڭىپ العان قىزدارىمىز بۇل جولى بارلىعى جۇلدەسىز قايتتى. نۇرلان امانقوسوۆ باپتايتىن قىزدار كۇرەسىنە شۇعىل تۇردە كەتكەن قاتەلىكتەردى سارالاپ, جەڭىسكە جەتەتىن جاڭا باعدارلاماعا كوشۋ كەرەك.

چەمپيوندارعا

ەسەسى كەتتى

سپورتتا كەيدە باعى مەن بابى قا­تار شاپپاسا, قانشا جەردەن تىرمىس­قا­نىمەن جەڭىس بۇيىرماي جاتادى. توكيو تورىندە سەگىز قولا مەدال العان سپورتشىلارىمىزدىڭ بەسەۋى باعى مەن بابى قاتار شاپقاندا, جەڭىمپاز اتانار ەدى. ولار چەمپيونداردان نە فيناليس­تەردەن ءسال عانا باسىمدىقپەن جەڭىلىس تاپتى.

وليمپيادادا قازاقستان قورجىنىنا سوڭعى سەگىزىنشى قولا مەدالدى كاراتەشى سوفيا بەرۋلتسەۆا سالدى. 61 كيلودان جوعارى سالماقتا سىنعا تۇسكەن ول جار­­تىلاي فينالدا ەگيپەتتىك فەريال اب­دەلازيزبەن كەزدەسكەن بولاتىن. اسا تارتىستى وتكەن جەكپە-جەكتە بەرۋلتسەۆا 4:5 ەسەبىمەن جول بەردى. ال مىسىرلىق كاراتەشى ءوز كەزەگىندە فينالدا جەڭىسكە جەتىپ, وليمپيادا چەمپيونى اتاندى.

بوكستان ساكەن بيبوسىنوۆتىڭ جاع­دايى دا وسىعان ۇقساس. ول جارتىلاي فينالدا بريتاندىق جالال يافايگە 2:3 ەسەبىمەن جول بەردى. بۇل كەزدەسۋ كوپكە دەيىن تال­قىلانعانىن بىلەسىزدەر. ساكەن­نىڭ جەكە باپكەرى, كوپتەگەن مامان بۇل جەكپە-جەكتە بيبوسىنوۆ جەڭىسكە جەتتى دەيدى. بىراق بولعان ءىس بولدى. سونىمەن ج.يافاي فينالدا فيلليپين بوكسشىسىنان باسىم ءتۇسىپ, وليمپيادا چەمپيونى اتاندى.

ەركىن كۇرەستە 57 كيلوعا دەيىنگى سال­ماقتا بەلدەسكەن نۇريسلام ساناەۆ­تىڭ توكيودا التىنعا تالاساتىنداي مۇمكىندىگى بولىپ ەدى. ول جارتىلاي في­نالعا دەيىن قارسىلاستارىنىڭ بار­لىعىن جەڭىپ كەلدى. بىراق فينالعا شىعار تۇستا ءۇندىستان بالۋانى راۆي كۋمارعا ەسە جىبەردى. كەزدەسۋدىڭ اياقتالۋىنا ءبىر مينۋت قالعانعا دەيىن ساناەۆ قارسىلاسىن 9:2 ەسەبىمەن باسىم تۇرعان. الايدا قار­سى ادىسكە ءتۇسىپ جارىس­تى ۋاقىتىنان بۇرىن اياقتادى.

كاراتەشى دارحان ءاسادىلوۆتىڭ نەگىز­گى سالماعى 60 كيلو. اتالعان سالماق وليمپيادا باعدارلاماسىندا بولما­عان­دىقتان, جەرلەسىمىز 67 كيلودا جارىسقا ءتۇستى. سوعان قاراماستان ول ا توبىندا ۇز­دىك شىعىپ, جارتىلاي فينالدا فران­تسيا­لىق ستيۆەن دە كوستامەن كەزدەسكەن ەدى. ءسال عانا باسىمدىقپەن جەر­لەسىمىزدى فينالسىز قالدىرعان فرانتسۋز كاراتەشىسى ەلىنە التىن مەدالمەن قايتتى.

ال قازاقستانعا العاشقى قولا مەدالدى الىپ بەرگەن ەلدوس سمەتوۆتىڭ جارتىلاي فينالداعى جاپوندىق بالۋانمەن بەلدەسۋىن كوپ جانكۇيەر فينالدىق ايقاسقا بالاعان. سەبەبى ەكى سپورتشى اراسىنداعى بەلدەسۋدىڭ جەڭىمپازى تەك قوسىمشا ۋاقىتتا عانا انىقتالدى. وندا دا ەلدوس ءادىس جاسايمىن دەپ ءوزى «قاقپانعا» ءتۇسىپ قالدى. جاپون بالۋانى توكيودا توپ جاردى.

جەڭىل اتلەتتەر نەگە جەڭىل ەمەس؟

بۇعان دەيىن جەڭىل اتلەتيكانىڭ جە­تىستىگى ءبىر عانا ادامعا بايلانىس­تى ەدى. ءۇش وليمپيادادا ولجا سالعان ولگا رىپاكوۆا تۇڭعىش رەت توكيودا جۇل­دەسىز قالدى. توكيو وليمپياداسىندا بار-جوعى ون سپورتشىدان ءسال اساتىن جەڭىل اتلەتتەر باسقا وليمپيادالارعا قاراعاندا تىم از. كوممەنتاتور سەرگەي رايليان نورۆەگيالىق كارستەن ۆارحولم 400 مەتردى كەدەرگىلەر ارقىلى 45,94 سەكۋندتا جۇگىرىپ ءوتىپ, الەم رەكوردىن ورناتقانىن, ال قازاقستاندىق ميحايل ليتۆين 400 مەتردى «كەدەرگىسىز» 47,15 سەكۋندتا جۇگىرىپ وتكەنىن جازعان ەدى.

ەسەسىنە سپورتتىق گيمناستيكادان ميلاد كاريميدىڭ ونەر كورسەتۋى كوڭىلگە قونىمدى. جالعىز ءوزى جەتى جولداما جەڭىپ العان ميلاد وليمپيادانىڭ ىرىك­تەۋ سىنىندا ءۇش جاتتىعۋ بويىنشا فينالعا ءوتىپ, قازاقستاندا ءوشىپ بارا جاتقان بۇل سپورت ءتۇرىنىڭ بويىنا قان جۇگىرتكەندەي بولدى. ول العاشقى وليم­پياداسىندا بەسىنشى ورىن الدى. ميلادتىڭ بولاشاعى الدا دەپ بىلەمىز.

جەڭىل اتلەتيكادان ەلىمىزدىڭ قۇراما­سىندا سان بار دا, ساپاسى جاعى كۇماندى كورىندى. ەندى وسىنداي پروبلەمالاردان ارىلۋ ءۇشىن نە ىستەۋ كەرەك؟ ونى بىزدەن گورى, سپورتتىڭ ماڭىندا جۇرگەن ماماندار بىلسە كەرەك. بۇل سۇراقتىڭ جاۋابىن سولارعا قالدىرايىق.

قازاقستان سپورتىنىڭ بۇل كۇيى نەدەن؟ بوكس نەگە العاش رەت التىن تۇگىل, كۇمىس­سىز قالدى؟ بالۋان ەلمىز دەيمىز, نەگە كلاسسيكتەر العاشقى اينالىمنان اسا المايدى؟ وسىلاي سۇراقتار جالعاسىپ كەتە بەرەدى. ارينە, مۇنىڭ ءبارى قاراپايىم جانكۇيەر اينالىسا­تىن شارۋا ەمەس. ول ءۇشىن ارنايى سپورت ماماندارىنىڭ پىكىرىن بىلدىك. گازەتى­مىز­دىڭ الداعى سانىندا ۇسىناتىن بولامىز.

جاپونيا 27 التىن, 12 كۇمىس جانە 17 قولا مەدال الىپ, توكيو وليم­پياداسىندا ۇزدىك ۇشتىكتەن كورىندى. بۇل – تاماشا كورسەتكىش. ارينە, مۇنداي كەرە­مەت ناتيجەگە كۇنشىعىس ەلى بىردەن جەتكەن جوق. 2012 جىلى لوندون وليم­پياداسىندا مەدالدار سانى جونىنەن ۇزدىك وندىقتان كورىنبەگەننەن كەيىن, ناتيجەگە جەتۋ ءۇشىن ولار جىلدار بويى ەڭبەك ەتتى. سپورتتى دامىتۋمەن عىلىمي تۇر­عىدا اينالىستى. ءاربىر سپورتشىنىڭ نامىسىن وياتتى. قازىر دە سول باعىتپەن ءجۇرىپ جاتىر. دالەل رەتىندە ايتا وتى­رايىق. جەلاياق سپورتشىسى 22-ورىننان كورىنسە دە تەلەباعدارلامالارعا شا­قىرىپ, جاناشىرلىق تانىتىپ, قول­داۋ كورسەتكەنىن كوردىك. مۇنىڭ بار­لىعىن ولار نە ءۇشىن ىستەپ وتىرعانىن سۇرا­عانىمىزدا, ولار قولداۋى بار سپورت­شىنىڭ كوبىسى ءتۇپتىڭ تۇبىندە ەل نامىسىن ابىرويمەن قورعايتىنىنا سەنەدى. 2012 جىلدان بەرى ەتكەن ەڭبەك جەمىسىن بەرە باستادى. وسىدان بەس جىل بۇ­رىن جاپوندىقتار ريو-2016-دا ءوز تاريحىندا تۇڭعىش رەت 12 التىن مەدال جەڭىپ الدى. ال ءوز جەرىندەگى جەتىستىگىن جو­عارىدا ايتتىق.

مىنە, وسىنداي باعدارلاما بىزگە دە كەرەك سەكىلدى. افينا وليمپياداسىنىڭ چەمپيونى باقتيار ارتاەۆ ايتپاقشى, قازاقستاندا 19 ميلليون باپكەر بار, 19 ميلليون ساراپشى بار. ارينە, ءبىز سپورت مامانى ەمەسپىز. الايدا توكيو وليمپياداسى سپورتقا جاۋاپتى قۇزىرلى قۇرىلىمداردىڭ شىنايى سيپاتىن جانە قانداي دەڭگەيدە جۇمىس ىستەپ جاتقانىن كورسەتىپ بەرگەندەي. ناتيجەگە قاراپ شۇعىل تۇردە جۇيەلى ىزدەنىس پەن كەشەندى شەشىمدەر كەرەك ەكەنى بايقالادى. سپورت فۋنكتسيونەرلەرى ءۇش جىلدان كەيىن باستالاتىن پاريج وليمپياداسىنا دايىندىقتى بۇگىننەن باستاۋ كەرەك ەكەنىن جاقسى ءتۇسىنۋى كەرەك. مۇمكىن, چەمپيون­دارىمىز توكيو وليمپياداسىندا كەتكەن ەسەنى پاريجدەگى دودادا قايتارار. سوعان ۇمىتتەنەيىك.