ورتالىق ازيا مەملەكەت باسشىلارىنىڭ كەزدەسۋى ايماقتىق ىنتىماقتاستىقتىڭ ساپالى جاڭا كەزەڭىنىڭ باستالعانىن بىلدىرەدى. حالىقارالىق تۇركى اكادەمياسى پرەزيدەنتى دارحان قىدىرالى وسىلاي مالىمدەدى, دەپ حابارلايدى Egemen.kz.
«ورتالىق ازيا مەملەكەت باسشىلارىنىڭ كەزدەسۋى ايماقتىق ىنتىماقتاستىقتىڭ ساپالى جاڭا كەزەڭىنىڭ باستالعانىن بىلدىرەدى. تاجىريبە كورسەتكەندەي, ءبىزدىڭ بىرلەسكەن كۇش-جىگەرىمىز جاھاندىق جانە ايماقتىق ماسەلەلەردى شەشۋگە ءتيىمدى اسەر ەتە الادى. حالىقارالىق تۇركى اكادەمياسىنىڭ ماقساتتارى مەن مىندەتتەرى تۇرعىسىنان, مەملەكەت باسشىلارىنىڭ بىرلەسكەن مالىمدەمەسىندە جان-جاقتى ىنتىماقتاستىقتى, ونىڭ ىشىندە عىلىم مەن ءبىلىم سالاسىن دامىتۋعا ورتاق مۇددە بىلدىرىلگەنىن جانە باۋىرلاس ەلدەردىڭ ودان ءارى جاقىنداسۋىندا ءوزارا مادەني-گۋمانيتارلىق ءىس-قيمىلدىڭ شەشۋشى رولىنە, عىلىمي ينتەگراتسيا مەن «عىلىمي ديپلوماتياعا» باسا نازار اۋدارىلعانىن ماڭىزدى قادام دەپ سانايمىز», دەدى تۇركى اكادەمياسى پرەزيدەنتى.
ول مەملەكەت باسشىلارىنىڭ مادەني-گۋمانيتارلىق جانە عىلىمي بايلانىستىڭ بىرىڭعاي الاڭىنا اينالۋى ءتيىس «ورتالىق ازيا: ورتاق تاريح جانە ورتاق بولاشاق» مادەني ديالوگ فورۋمىن قۇرۋ تۋرالى باستاماسىن ايرىقشا اتاپ ءوتتى. ونىڭ ايتۋىنشا, بۇل ستراتەگيالىق ماڭىزدى تاپسىرمادا جاستارعا ەرەكشە ءمان بەرىلىپ وتىر.
«تۇركى اكادەمياسى ورتالىق ازيا مەملەكەت باسشىلارىنىڭ باستاماسىن جوعارى باعالاپ ءارى قولداي وتىرىپ, بەلگىلەنگەن مىندەتتەرگە سايكەس ناقتى عىلىمي-گۋمانيتارلىق جوبالاردى جۇزەگە اسىرۋعا دايىن ەكەنىن بىلدىرەدى. اتاپ ايتقاندا, اكادەميا ورتاق تاريحتى زەردەلەۋگە جانە ايماق ەلدەرى باسشىلارىنىڭ بىرلەسكەن مالىمدەمەسىندە كورسەتىلگەن باۋىرلاس ەلدەر ءۇشىن ورتاق ماسەلەلەردىڭ جەمىستى جانە كونسترۋكتيۆتى شەشىلۋىنە بەلسەندى اتسالىسۋعا دايىن», دەدى دارحان قىدىرالى.
ونىڭ ايتۋىنشا, مەملەكەت باسشىلارىنىڭ بىرلەسكەن مالىمدەمەسىنىڭ ايماقتاعى ەلدەردىڭ كوپجاقتى جانە كەڭ اۋقىمدى ىنتىماقتاستىعى جانە باۋىرلاس حالىقتار اراسىنداعى بەكەم بىرلىك پەن كەلىسىمنىڭ بەلگىسى رەتىندە, بولاشاق بايلانىستارىمىزدىڭ بەرىك نەگىزى مەن مىزعىماستىعىن قامتاماسىز ەتەتىن قۇجات رەتىندە تاريحتان ءوز ورنىن الادى.