بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى ءمالىم ەتتى, دەپ حابارلايدى Egemen.kz.
اتىراۋ قالاسىنداعى ەمحانانىڭ ەكى مەدبيكەسى پاتسيەنتتەردىڭ ۆاكتسينا العانى تۋرالى جالعان اقپاراتتى ەنگىزگەنى انىقتالىپ وتىر.
«پوليتسيا دەپارتامەنتى مەن وبلىستىق پروكۋراتۋرا قىزمەتكەرلەرىنىڭ بىرلەسكەن جەدەل ءىس-شاراسى كەزىندە 1989 جانە 1993 جىلى تۋعان ەكى مەدبيكە ۇستالدى. ولار ۆاكتسينانىڭ ءار كومپونەنتىنە 50 مىڭ تەڭگە, ەكى كومپونەنت ءۇشىن 100 مىڭ تەڭگەنى بانكتىك ەسەپشوتىنا اۋدارتىپ وتىرعان. اقشاسىن اۋدارعان تۇرعىندار ەمحاناعا كەلىپ, ۆاكتسينا الماي-اق ۆاكتسينا پاسپورتىن الىپ جۇرگەن. مەدبيكەنىڭ ءبىرى جالعان اقپاراتتى جۇيەگە ەنگىزىپ, ەكىنشىسىنىڭ ۆاكتسينا سۇيىقتىعىن قۇيتىرقى ارەكەتپەن پاتسيەنتكە ەكپەگەنى انىقتالدى», دەپ حابارلادى دەپارتامەنتتىڭ ءباسپاسوز قىزمەتى.
قازىر كۇدىكتى مەدبيكەلەرگە قاتىستى قر قىلمىستىق كودەكسىنىڭ 206-بابىنىڭ 1-بولىگىمەن سوتقا دەيىنگى تەرگەۋ ءجۇرىپ جاتىر.