اعا لەيتەنانت اردانا بوتاي سۋ-30سم كوپفۋنكتسيونالدى جويعىشىنىڭ ەكيپاج كومانديرى رەتىندە العاشقى جەكە ۇشۋىن ورىندادى, دەپ حابارلادى قورعانىس مينيسترلىگىنىڭ ءباسپاسوز قىزمەتى.
ەلىمىزدىڭ قارۋلى كۇشتەرى اۋە قورعانىسى كۇشتەرىنىڭ باس قولباسشىسى اۆياتسيا گەنەرال-لەيتەنانتى نۇرلان ورمانبەتوۆ دەربەس ۇشۋعا رۇقسات بەرەتىن پراكتيكالىق ەمتيحاندى قابىلدادى.
– قازاقستان رەسپۋبليكاسى قارۋلى كۇشتەرىنىڭ تاريحىندا سۋ-30سم جاۋىنگەرلىك ۇشاعىندا ەكيپاج كومانديرى رەتىندە دەربەس ۇشۋدى العاش رەت ايەل ادام ورىندادى. ونىڭ بۇعان جاقسى دايىندالعانىن, كوك اسپاندى باعىندىرۋعا دەگەن ۇمتىلىسىن, جويعىش ۇشقىش رەتىندە مەملەكەتىمىزدىڭ اۋە شەبىن كۇزەتۋدەگى مىندەتتەردى ورىنداپ جۇرگەنىن اتاپ وتكەن ءجون. ول جاۋىنگەرلىك اۆياتسياداعى ايەلدەردىڭ ەرلەرمەن تەڭ دارەجەدە كۇردەلى مىندەتتەردى ورىنداي الاتىنىن دالەلدەدى, – دەدى اۆياتسيا گەنەرال-لەيتەنانتى نۇرلان ورمانبەتوۆ.
قازاقستانداعى اسكەري اۆياتسيانىڭ جالعىز ايەل ۇشقىشى قاراعاندى اۆيابازاسىندا قىزمەت ەتەدى. بىرنەشە اي بويى اردانا تالدىقورعان قالاسىنداعى اۆياتسيا بازاسىندا ارنايى وقۋدان ءوتتى.
– سۋ-30سم ۇشاعىمەن جەكە ۇشۋ – مەن ءۇشىن كاسىبي تۇرعىدا قالىپتاسۋعا جاساعان ۇلكەن قادام. الداعى ماقساتىم – ۇشۋ تەحنيكاسىن جاقسارتۋ جانە جەر ۇستىندەگى, اۋەدەگى ماقساتتارعا جانە توپتىق ۇشۋلارداعى جاۋىنگەرلىك قولدانۋعا رۇقسات الۋ ءۇشىن ءارى قاراي دايارلىق باعدارلاماسى بويىنشا ماشىقتانۋ داعدىلارىن پىسىقتاۋ, – دەپ اردانا بوتاي بولاشاققا ارنالعان جوسپارىن ءبولىستى.
اتالعان سۋ-30سم – كوپفۋنكتسيالى 4++ بۋىندى جويعىش ۇشاق. ول كەز كەلگەن اۋا رايى جاعدايىندا, كۇندىز-ءتۇنى ارەكەت ەتۋگە قابىلەتتى. اۋە بارلاۋىن جۇرگىزۋگە, اۋەدە, جەر ۇستىندە جانە تەڭىزدە نىسانداردى جويۋعا ارنالعان.
جوعارى مانەۆرلى جويعىش ۇشاقپەن ۇشۋعا رۇقسات الۋ ءۇشىن ۇشقىش بىرنەشە اي بويى تەوريالىق ءبىلىم الىپ, ارنايى سۋ-30سم ترەناجەرىندە جاتتىعادى, شتۋرمان رەتىندە ۇشادى. كوپتەگەن سىناق پەن ەمتيحاندى ءساتتى تاپسىرعان سوڭ عانا تاۋەلسىز ۇشۋعا رۇقسات الادى. اردانا بوتاي سونداي سىننىڭ بارىنەن سۇرىنبەي ءوتىپ, الدىنا قويعان ماقساتىن تاباندىلىقپەن ورىنداي ءبىلدى.