تۇركىستان وبلىسىنىڭ پوليتسەيلەرى جىل باسىنان بەرى ەسىرتكىگە بايلانىستى 260-تان استام قىلمىس دەرەگىن تىركەدى, دەپ حابارلايدى Egemen.kz وبلىستىق پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
تۇركىستان وبلىسى پد ەسىرتكى قىلمىسىنا قارسى ءىس-قيمىل باسقارماسى ەسىرتكى قۇرالدارىنىڭ زاڭسىز اينالىمىنا بايلانىستى قىلمىستاردىڭ الدىن الۋ بويىنشا جەدەل-پروفيلاكتيكالىق جانە رەيدتىك ءىس-شارالار جۇرگىزۋدە.
قابىلدانعان شارالاردىڭ قورىتىندىسى بويىنشا, 2021 جىلدىڭ باسىنان بەرى پوليتسەيلەر ەسىرتكىگە بايلانىستى 262 فاكتىنى, ونىڭ ىشىندە 138 قىلمىستى جانە 124 ەسىرتكى تاراتۋدى انىقتادى. ونىڭ ىشىندە ەسىرتكى ساتۋدىڭ - 42, ەسىرتكىنى اسا ءىرى مولشەردە ساقتاۋدىڭ - 12, كونتراباندانىڭ - 20, ەسىرتكى قۇرالدارىن ناسيحاتتاۋ جانە جارنامالاۋدىڭ - 2, ەسىرتكى ەگۋدىڭ - 60, پسيحوتروپتىق زاتتاردىڭ زاڭسىز اينالىمىنىڭ - 2 فاكتىسى تىركەلدى.
اتقارىلعان جۇمىس بارىسىندا 5 توننادان استام ەسىرتكى زاتى تاركىلەندى. ونىڭ ىشىندە, 5 توننا 85 كگ. ماريحۋانا, 526 گر. گاشيشا, 68 گر. گەروين جانە 18 گرامنان جوعارى سينتەتيكالىق ەسىرتكى تاركىلەنگەن.
تۇركىستان وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ جەدەل ۋاكىلدەرى اتاپ وتكەندەي, ەسىرتكىنىڭ تارالۋىنا قارسى كۇرەس جۇمىستارى الداعى ۋاقىتتا دا جالعاسا بەرمەك. بۇل باعىتتا جۇيەلى جۇمىس جۇرگىزىلىپ, ەسىرتكىسىز قوعامدى قالىپتاستىرۋ جونىندەگى ءىس-شارالار ىسكە اسىرىلاتىن بولادى.