قوستاناي وبلىسىنىڭ اكىمدىگىندە ىندەتتىڭ الدىن الۋ جونىندەگى جەدەل شتابتىڭ كەزەكتى وتىرىسى ءوتتى. جيىن بارىسىندا تامىز ايىنىڭ بىرىنەن باستاپ بۇرىن الىنىپ تاستالعان شەكتەۋلەردىڭ ءبىرازىن ەكى اپتا مەرزىمگە قايتا ەنگىزۋ تۋرالى شەشىم قابىلداندى.
وڭىردە Ashyq جوباسىنا قاتىسىپ جاتقانىنا قاراماستان, دەمالىس جانە مەرەكە كۇندەرى ادام كوپ جينالاتىن بىرقاتار نىساننىڭ جۇمىسىنا شەكتەۋ قويىلاتىن بولدى. 1 تامىزدان وڭىردەگى مادەني نىساندار, تەاترلار مەن كينوتەاترلاردىڭ جۇمىسى توقتايدى. ال قوعامدىق تاماقتانۋ ورىندارى جۇمىس كۇندەرى ساعات 20.00-گە دەيىن عانا جۇمىس ىستەيدى. سونداي-اق كولەمى 2 مىڭ شارشى مەتردەن اساتىن ازىق-ت ۇلىكتەن باسقا تاۋارلار ساتاتىن ساۋدا ورتالىقتارىنىڭ, اشىق جانە جابىق بازارلاردىڭ, ساۋنا, سپا-ورتالىقتار مەن باسسەيندەردىڭ, تەرموپاركتىڭ جانە جابىق سپورت نىساندارىنىڭ جۇمىسى شەكتەلەدى.
«قۇرمەتتى وبلىس تۇرعىندارى, وزدەرىڭىزدى كۇتىپ, جاقىندارىڭىزدىڭ دەنساۋلىعىنا جاۋاپكەرشىلىكپەن قاراۋلارىڭىزدى, ىندەتكە قارسى ءىس-شارالاردىڭ تالاپ-ەرەجەلەرىن ساقتاۋعا جانە COVID-19-عا قارسى ۋاقتىلى ۆاكتسينالاۋدان وتۋگە كەڭەس بەرەمىن», دەدى وبلىس باسشىسى ارحيمەد مۇحامبەتوۆ.
شتاب وتىرىسىندا وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ر.ايتباەۆتىڭ, ارقالىق جانە رۋدنىي قالاسى مەن جىتىقارا اۋدانى اكىمدەرىنىڭ ەسەبى تىڭدالدى. سونداي-اق مونيتورينگتىك توپتاردىڭ جۇمىسى تالقىلاندى. مونيتورينگتىك توپ وكىلدەرىنىڭ سوزىنشە, 1 ماۋسىم مەن 25 شىلدە ارالىعىندا وڭىردە 4 724 رەيدتىك ءىس-شارا وتكىزىلىپ, كارانتين تالاپتارىن بۇزۋدىڭ 190 دەرەگى انىقتالعان.
وڭىردەگى ەپيدەميالىق احۋال جاقسارعان جاعدايدا تامىزدىڭ 14-ىنە قاراي شەكتەۋ شارالارىن قايتا جەڭىلدەتۋ تۋرالى ماسەلە قارالادى.
قوستاناي وبلىسى