قالادا ىندەت جۇقتىرعاندار سانى ارتۋىنا بايلانىستى سيدنەيدەگى كارانتين تاعى ءبىر ايعا سوزىلدى.
ماۋسىمنىڭ اياعىنان باستاپ اۋستراليانىڭ ەڭ ۇلكەن قالاسى دەلتا شتامىنا بايلانىستى قاتاڭ لوكداۋندا وتىر. بيىل سيدنەيدەگى ەڭ كۇردەلى كەزەڭدە 2500-دەن استام ادام ۆيرۋس جۇقتىردى. پرەمەر-مينيستر گلەديس بەرەجيكليان كارانتيننىڭ جوسپارلانعانداي, جۇمادا اياقتالمايتىنىن مالىمدەدى. قايتا قاۋىپسىزدىك شارالارى قاتاڭداي ءتۇستى. ەندى دۇكەنگە بارۋ ءۇشىن 10 كم-دەن ارتىق جۇرۋگە بولمايدى.
ۆيكتوريا مەن وڭتۇستىك اۋستراليا ايماعى سارسەنبىدە ىندەت جۇقتىرعاندار سانى ازايعاننان كەيىن كارانتيننەن شىقتى. الايدا سيدنەي ءۇشىن بۇل مۇمكىن بولماي تۇر. قالانىڭ بەس ميلليون تۇرعىنى وسىعان دەيىن قالىپتى ءومىر سالتىن جۇرگىزگەن ەدى.
پاندەميا كەزىندە اۋستراليا شەكاراسىن جاۋىپ, كەلگەن جولاۋشىلاردى كارانتيندە ۇستاپ, ىندەتتىڭ ورشۋىنە جول بەرمەگەن. الايدا ۆيرۋستىڭ جاڭا شتامى تاراعان كەزدە شتات باسشىلارى ىندەتپەن كۇرەسۋ ءۇشىن قاتاڭ شارالاردى بىردەن ەنگىزۋگە ءماجبۇر بولدى.
ساراپشىلار سيدنەيدەگى شەكتەۋلەر قىركۇيەككە دەيىن نەمەسە ودان ءارى دە جالعاسۋى مۇمكىن دەگەن بولجام ايتىپ وتىر. ەل بيلىگى ناۋقاستار سانى نولگە جاقىنداعاندا عانا قايتا اشىلامىز دەيدى. مۇنداي ەركىندىكتى شەكتەيتىن شارالارعا قارسى بولعان بىرنەشە مىڭ ادام دەمالىس كۇندەرى سيدنەي, مەلبۋرن جانە باسقا قالالاردا نارازىلىق شەرۋلەرىن وتكىزدى.