سولتۇستىك جانە وڭتۇستىك كورەيا وتكەن جىلدىڭ ماۋسىم ايىندا پحەنيان وشىرگەن سەنىم تەلەفونىن ءبىر جىلدان كەيىن قالپىنا كەلتىردى.
وڭتۇستىك كورەيا پرەزيدەنتى اكىمشىلىگىنىڭ مالىمەتىنشە, ەكى ەلدىڭ باسشىلارى سەنىمدى قالپىنا كەلتىرۋگە جانە قارىم-قاتىناستى جاقسارتۋعا كەلىسكەن. حابارلامادا سونداي-اق ولاردىڭ ءساۋىر ايىنان بەرى بىرنەشە حات الماسقانى ايتىلعان.
ەكى ەل اراسىنداعى ءساتسىز سامميتتەن كەيىن قارىم-قاتىناس ناشارلاپ, سولتۇستىك كورەيا 2020 جىلدىڭ ماۋسىمىندا سەنىم تەلەفونىن وشىرگەن-ءدى. كوپ ۇزاماي سولتۇستىك كورەيا بايلانىستى جاقسارتۋ ءۇشىن سالىنعان ورتاداعى شەكارا كەڭسەسىن جارىپ جىبەرگەن.
«ەل باسشىلارى اراسىنداعى كەلىسىمگە سايكەس سولتۇستىك پەن وڭتۇستىك كورەيا 27 شىلدەدە ساعات 10:00-دەن باستاپ, كورەيارالىق بايلانىس جەلىلەرىنىڭ جۇمىسىن قالپىنا كەلتىرۋ بويىنشا شارالار قابىلدادى», دەلىنگەن حابارلامادا.
وڭتۇستىك كورەيانىڭ بىرىكتىرۋ مينيسترلىگىنىڭ مالىمەتىنشە, ەكى تاراپتىڭ وكىلدەرى ءۇش مينۋت بويى تەلەفونمەن سويلەسكەن. مينيسترلىك تاعى ءبىر قوڭىراۋ سەيسەنبى كۇنى تۇستەن كەيىن جانە كۇن سايىن بولاتىنىن جەتكىزدى.
ەكى ەل اراسىنداعى بايلانىس 2018 جىلى وڭتۇستىك كورەيا پرەزيدەنتى مۋن چجە ين مەن سولتۇستىك كورەيا كوشباسشىسى كيم چەن ىن ءۇش رەت كەزدەسكەن كەزدە جاقسارا تۇسكەن. كەيىننەن كيم چەن ىن مەن سول كەزدەگى اقش پرەزيدەنتى دونالد ترامپ اراسىنداعى ەكىنشى سامميت ءساتسىز وتكەننەن كەيىن اراداعى بايلانىس بۇزىلا باستاعان. وڭتۇستىكتە شەكارا ارقىلى ۇگىت-ناسيحات تاراتقان توپتار انىقتالعاننان كەيىن قارىم-قاتىناس ءتىپتى ۋشىعا تۇسكەن. سونىڭ سالدارىنان سولتۇستىك كورەيا بارلىق اسكەري جانە ساياسي بايلانىس ارنالارىن, سونىڭ ىشىندە ەل باسشىلارى اراسىنداعى سەنىم تەلەفونىن ءوشىرىپ تاستاعان بولاتىن.