قازاقستاندىق دزيۋدوشى يسلام بوزباەۆ توكيو وليمپياداسىندا ەكىنشى اينالىمدا جەڭىلىپ قالدى, دەپ حابارلايدى Egemen.kz ۇوك ءباسپاسوز قىزمەتىنە سىلتەمە جاساپ.
ەرلەر اراسىندا 90 كەلىگە دەيىنگى سالماق دارەجەسىندە سىنعا تۇسكەن ول ءبىرىنشى اينالىمدا برازيليالىق رافاەل ماكەدومەن كەزدەستى. وتانداسىمىز قارسىلاسىن نەبارى 31 سەكۋندتا «يپپون» ۇپايىمەن جەڭىپ, كەلەسى اينالىمعا شىقتى.
ەكىنشى اينالىمدا ازىربايجاندىق قارسىلاسىن ۇتا المادى. ءمامادالى مەحديەۆپەن وتكەن كەزدەسۋ قوسىمشا ۋاقىتقا (گولدەن سكور) دەيىن سوزىلدى. قوسىمشا ۋاقىتتا وتانداسىمىزدىڭ قارسىلاسى ءادىس جاساپ, «ۆازار» ۇپايىمەن يسلام بوزباەۆتى ۇتتى.
وسىلايشا, دزيۋدودان قازاقستان قۇراما كومانداسى توكيو وليمپياداسىن ءبىر قولا جۇلدەمەن اياقتادى. ەل قورجىنىنا قولا جۇلدەنى ەلدوس سمەتوۆ ۇتىپ العان بولاتىن.