اللو, اللو, بۇل سەنبىسىڭ, قارت سولدات!
“ ميلليونداردىڭ قانىمەن, كوز جاسى, قاسىرەتىمەن كەلگەن ۇلى جەڭىستىڭ 65 جىلدىعى جاقىنداپ كەلە جاتقانى ءار جەرلەردەگى يگى شارالاردان, ساۋاپتى باستامالاردان اڭعارىلادى. تاريح ەشقاشان ۇمىتپايتىن, تارام-تارام تاعدىرلاردى مايداننىڭ تەزىنە سالىپ, ءتىپتى ءبۇتىن ءبىر اۋلەتتى ءۇرىم-بۇتاعىمەن جۇتىپ قويعان سوعىس ىلاڭىن 65 جىل تۇگىلى التى عاسىردان كەيىن دە ۇمىتۋ مۇمكىن ەمەس. سول مايدان ازابىن ارقالاعانداردى ۋاقىت ايالاپ جاتقانى بۇگىنگە بارشامىزعا مەدەت.
ءساۋىردىڭ سوڭعى كۇندەرىندە ءبىر ءىس ساپاردىڭ ءساتى ءتۇسىپ, ماسكەۋ قالاسىندا بولعانىمىز بار ەدى. قاھارمان قالا بۇل كۇندەرى بارىن سالىپ, قارت سولداتتارىن الاقانعا سالىپ ايالاۋ ءۇشىن ۇلى مەرەكەگە دايىندالىپ جاتقان جايى بار ەكەن. قىزىل الاڭدى بىلاي قويعاندا, ماسكەۋدىڭ ءاربىر كوشەسى مەيرام الدىندا جاسارىپ, جاسىل جەلەكتەرگە, القىزىل گۇلدەرگە بولەنە باستاعان. قالانىڭ باستى عيماراتتارىنىڭ ءبارى كۇردەلى جوندەۋدەن, ارلەۋدەن وتكىزىلۋدە. كۇن سايىن كرەمل تۇبىندە تىنباي مەرەكەلىك شەرۋدىڭ دايىندىقتارى ءجۇرىپ جاتىر.
ال سول قاندى قىرعىندا قازاقتىڭ قانشاما بوزداعىنىڭ سۇيەگى قالدى. ۇلى وتان سوعىسىنان كەڭەس وداعى رەسپۋبليكالارىنىڭ بىردە ءبىرى قالىس قالعانى جوق. ءاربىر وتباسىنىڭ باس كوتەرەر ازاماتتارىنىڭ ءبارىن مايدانعا الىپ, بۋىنى قاتپاعان بوزبالانى, بەلى مايىسقان بويجەتكەندەردى تىلدىڭ جۇمىسىندا ءتورت جىل قاتارىنان تيتىقتاتقان, ودان كەيىن دە اۋىرتپالىعى ارىلماعان سۇم سوعىستىڭ جاراسى جازىلا قويماس.
تاريحتىڭ ەنشىسىنە تيگەن قاسىرەتتى سوعىستى كەيىنگى بۋىن ەستەلىك رەتىندە ءبىلىپ, كىتاپتان وقىپ, كينودان كورگەنىمەن, وسى ويراندى ءوز باسىنان وتكىزگەن ارداگەر بۋىننىڭ ازايىپ كەلە جاتقانى دا از ايتىلمايدى. سەلدىرلەنىپ بارا جاتقان ورماننىڭ كارى ەمەنى سەكىلدى قارت مايدانگەرلەردى قادىرلەۋ ەڭ قاستەرلى پارىزدارىمىزدىڭ قاتارىندا بولسا, ول دا زاڭدىلىق. اقىن راسۋل عامزاتوۆتىڭ “وتكەنگە توپىراق شاشساڭ, بولاشاق ساعان تاس اتادى” دەگەن ءتامسىلىنە سالساق, بۇل پارىز عانا ەمەس ۇرپاقتاردىڭ ارداگەرلەر, اعا بۋىن الدىنداعى قارىزى دا!..
ەندەشە ءبىزدىڭ رەسپۋبليكامىزدا دا ۇلى وتان سوعىسى ارداگەرلەرىن ايالاپ, ۇلى جەڭىستىڭ 65 جىلدىعىن ءوز دارەجەسىندە وتكىزۋ ءۇشىن تىنباي جاسالىنىپ جاتقان شارالار لەگى جەتكىلىكتى.
باستى شارالاردان بولەك, ەلىمىزدەگى ۇلتتىق كومپانيالار, بەتكە ۇستار ۇيىمدار دا وسى ۇردىسكە ىلەسىپ, ۇلى وتان سوعىسى ارداگەرلەرىنە ءوز ءىلتيپاتتارىن كورسەتۋگە ىقىلاستى بولىپ جاتقانى قۋانتادى. مۇنى ءبىر جاعىنان, قارجىلى مەكەمەلەردىڭ الەۋمەتتىك جاۋاپكەرشىلىگى دەگەننەن گورى, ادامگەرشىلىكتى ىزەرلەگەن ءۇردىسى دەسەك تە بولادى.
وسىنداي يگى ىستەردى جالعاستىرىپ جاتقانداردىڭ اراسىندا ۇلتتىق بايلانىس وپەراتورى – “قازاقتەلەكوم” اق دا بار. ءاربىر كومپانيا مۇنداي ساۋاپتى شارالارعا ءوز قىزمەت قىرىنان كەلىپ جاتقانى دا كوڭىل توعايتادى.
ماسەلەن, “قازاقتەلەكوم” ەلىمىزدەگى بارشا ۇلى وتان سوعىسى ارداگەرلەرىنە “تارلان” تەلەفون كارتاسىن سىيعا تارتپاق. قارت مايدانگەرلەرگە بەرىلەتىن بۇل سىيلىقتىڭ دا وزىندىك سيمۆوليكالىق ەرەكشەلىگى بار. سول سولداتتاردىڭ كەشەگى قان مايداندا تولارساقتان سۋ كەشىپ, مۇز جاستانىپ, جازدىڭ اپتابىندا, قىستىڭ ايازىندا سۇم سوعىستىڭ ازابىن بىرگە كورگەن دوستارى بۇگىن تمد ەلدەرىنىڭ ءار تۇكپىرىنەن تابىلادى. ادام ءبىر بىرىمەن از كۇن ساپارالاس بولسا دا باۋىر باسىپ, جولداس بولىپ قالاتىن كەزدەرى بولادى. ال جىلدار بويى وتان ءۇشىن سوعىسىپ, ارتتا قالعان بالا-شاعا, ەل ءۇشىن جاۋمەن الىسقان جاۋىنگەردىڭ مايداندا تاپقان دوستارىنىڭ ءجونى ءبىر بولەك. توبەدەن وق اتقىلاپ, جەرگە قان سورعالاپ جاتقاندا جانىڭا دەمەۋ, يىعىڭا سۇيەۋ بولعان جانداردى شەت-شەگى قايدا ەكەنى بەلگىسىز ۋاقىت تا ۇمىتتىرا الماس.
مەرەكەلى كۇندەردە مايدانداستارمەن تەلەفون ارقىلى تىلدەسىپ, كەشەگى كۇندەردى, جەڭىستىڭ قۋانىشىن قاۋقىلداسىپ ەسكە العانعا نە جەتسىن. الىستاعى اعايىنمەن سويلەسىپ, حال سۇراسقان دا ءبىر داۋرەن. ال, “قازاقتەلەكوم” سىيلاعان “تارلان” كارتاسىمەن قازاقستاننان سىرت ەلدەرگە بايلانىسقا شىعۋعا بولادى. بۇل كارتانى ارداگەرلەر كەز كەلگەن ۋاقىتتا, جىل بويى پايدالانا بەرۋگە بولادى.
جانە مۇنان دا بولەك, 7, 8 جانە 9 مامىر كۇندەرى “قازاقتەلەكوم” ءوزىنىڭ بارلىق ابونەنتتەرىنە قازاقستان ىشىندەگى قالاارالىق بايلانىستارعا جەڭىلدىكتەر بەرمەك بولىپ وتىر. ساعات ءتىلى تۇنگى 24.00-ءدى سوققان ساتتەن باستاپ ۇشكە دەيىنگى جەڭىلدىكتەر 15 پايىز بولادى. تۇنگى ۇشتەن تاڭعى التىعا دەيىنگى تەلەفون بايلانىسى 60 پايىزعا ارزاندايدى. ال تاڭ اتىسىمەن, ياعني التىدان كەيىن تۇنگى 23.00-گە دەيىنگى ارزانداتۋلار 7,8 مامىردا 10 پايىزدى قۇراسا, 9 مامىر كۇنى بۇل ارالىقتاعى بايلانىس 25 پايىزعا ارزانداعالى وتىر.
سول سياقتى ۇلى جەڭىس قارساڭىندا “قازاقتەلەكوم” كومپانياسى وزدەرىندە تىركەلگەن ۇلى وتان سوعىسى ارداگەرلەرى مەن مۇگەدەكتەرىنە جانە ولارعا تەڭەستىرىلگەن جاندارعا اتاۋلى سىيلىقتار بەرمەك.
مۇنان دا بولەك ۇلى جەڭىستىڭ قارساڭىندا ۇلتتىق بايلانىس وپەراتورى ەلىمىزدىڭ بارلىق ايماقتارىندا ءوز ەسەپتەرىندە تۇرعان ۇلى وتان سوعىسى ارداگەرلەرىمەن جانە تىلدا ەڭبەك ەتكەن جاندارمەن سالتاناتتى كەزدەسۋلەر وتكىزۋدى ۇيعارىپ وتىر.
قانشاما قارت مايدانگەرگە وزىندىك قۋانىش سىيلاپ ءوتۋدى كوزدەيتىن وسىناۋ شارالار لەگىنە “قازاقتەلەكوم” كومپانياسى شامامەن 29 ميلليون تەڭگە جۇمساماق.
ايناش ەسالي, الماتى.