مەملەكەت باسشىسى قاسىم-جومارت توقاەۆتىڭ بىلتىرعى حالىققا جولداۋىندا بەرگەن تاپسىرماسىنا سايكەس ەلىمىزدە العاش رەت اۋىل اكىمدەرىنىڭ سايلاۋى ءوتتى. كەشە شىعىس قازاقستان وبلىسىندا 300-دەن استام بايقاۋشى باقىلاۋدا ۇستادى. باستى ماقسات – سايلاۋ ۇدەرىسىنىڭ اشىق, تازا جانە زاڭ اياسىندا ءوتۋىن قاداعالاۋ بولدى.
بايقاۋشىلار بۇل جۇمىستى اسقان ىنتامەن اتقاردى دەپ ويلايمىن. ولاي دەيتىنىم, اۋىلدىڭ ەرتەڭگى ءومىرى, ءال-اۋقاتى بۇگىنگى سايلانعان ۇمىتكەردىڭ جۇمىسىنا, ىسكەرلىگىنە, تاجىريبەسىنە بايلانىستى بولماق. وسى سايلاۋ ءبىر جاعىنان اكىمدەردىڭ حالىق الدىنداعى جاۋاپكەرشىلىگىن ارتتىرسا, ەكىنشى جاعىنان حالىقتىڭ قوعامداعى ماسەلەلەرگە ارالاسىپ, بەلسەندى بولۋىنا جول اشادى.
بايقاۋشىلار ارناۋلى وقىتۋدان ءوتىپ, زاڭ نورمالارىمەن, مۇمكىن بولاتىن جاعدايلارمەن تانىستى. ولاردى سايلاۋ سالاسىندا 15 جىلدان استام تاجىريبەسى بار ماماندار دايارلادى. ايتا كەتەرلىگى, بايقاۋشىلاردى نەعۇرلىم جەرگىلىكتى تۇرعىندار اراسىنان تارتتىق. ولار بۇگىن بايقاۋشى بولعانىمەن, ەرتەڭ سول اۋىلدا قاراپايىم تۇرعىن رەتىندە ءومىر سۇرەدى. سوندىقتان سايلاۋدىڭ بۇرمالاۋسىز وتۋىنە مۇددەلى بولدى.
ولاردىڭ ايتۋىنا قاراعاندا, ءبارى زاڭعا سايكەس ءوتتى. سانيتارلىق نورمالار ساقتالعان, كوميسسيا مۇشەلەرى ءوز جۇمىستارىن دۇرىس اتقاردى. ەشقانداي زاڭبۇزۋشىلىق تىركەلگەن جوق.
اياۋجان ءاشىموۆا,
«پارتيالىق ەمەس بايقاۋ ورتالىعى» رەسپۋبليكالىق قوعامدىق بىرلەستىگى وبلىستىق فيليالانىڭ توراعاسى
شىعىس قازاقستان وبلىسى