قوستاناي اۋدانىنا قاراستى التىن دالا اۋىلىندا وسىدان ءبىر اي بۇرىن عانا جوندەۋدەن وتكەن كوشە اپاتتى جاعدايدا تۇر. بىلتىر بۇل ەلدى مەكەنگە ورتالىقتاندىرىلعان سۋ قۇبىرى تارتىلىپ, بيىل كوشەلەرى اسفالتتالعان.
الايدا تاقتايداي ءتۇزۋ كوشەنىڭ ەكى جيەگىنە جابىلعان بورپىلداق توپىراقتى جاڭبىر سۋى وپىرىپ شايىپ كەتىپ, جاڭا اسفالتتىڭ استىن ۇڭعي باستاعان. ەندى ءبىر قاتتى جاڭبىر جاۋسا, كوشەنىڭ كوشىپ كەتەتىن ءتۇرى بار.
قازىردىڭ وزىندە ىرسيىپ, اسفالتى اجىراي باستاعان اباي كوشەسىنىڭ شەتىندەگى قۇدىقتاردىڭ ماڭايىندا تەرەڭ شۇڭقىرلار پايدا بولا باستادى. كولىك پەن ادام ءتۇسىپ كەتپەۋ ءۇشىن تۇرعىندار ونىڭ ۇستىنە شىبىق قاداپ, كولىك دوڭعالاعىمەن جاۋىپ قويعان.
ساپاسىز جوندەلگەن جولدىڭ ەكى جاعىن قايتا كومىپ, ونى جاڭبىر سۋى شايىپ كەتپەيتىندەي ەتىپ دۇرىستاپ نىعىزداۋ تۋرالى ايتقان اۋىل تۇرعىندارى جەرگىلىكتى اكىمنەن ءالى جاۋاپ الا الماي وتىر.
ءبىز قوستاناي اۋدانى اكىمىنىڭ ورىنباسارى نازاربەك قوڭقاباەۆقا قوڭىراۋ شالىپ ەدىك, «بۇل جايدان حاباردارمىز. كوشەنىڭ ءبىر-اق جەرىن عانا جاڭبىر شايىپ كەتتى. بۇل تۇك ەتپەيدى. جوندەۋ جۇمىستارىن «ۋان» جشس جۇرگىزگەن. 2 جىلدىق كەپىلدىك مەرزىمى بار, وسى مەرزىم ىشىندە قالپىنا كەلتىرەدى. مەردىگەر ءوزى جىبەرگەن ولقىلىقتىڭ ورنىن تولتىرۋدان باس تارتسا, سوتقا بەرەمىز», دەگەن جاۋاپ الدىق.
جولدىڭ قازىرگى جاي-كۇيىن تۇرعىنداردىڭ ءبىرى سمارتفونعا ءتۇسىرىپ العان. بەينەجازبادا: «وسى اسفالتقا مەملەكەت قوماقتى قارجى جۇمسادى. ەرتەڭ جولدى سۋ شايىپ كەتسە, سول قىرۋار قارجى, ەرەن ەڭبەك زايا كەتەدى عوي!», دەيدى كەيىگەن تۇرعىن.