پارلامەنت سەناتىنىڭ دەپۋتاتتارى وڭىرلەردە تۇرعىندارمەن كەزدەسۋلەرىن جالعاستىرۋ ۇستىندە دەپ حابارلادى جوعارعى پالاتانىڭ ءباسپاسوز قىزمەتى.
رىسقالي ابدىكەروۆ قاراعاندى وبلىسىنداعى بالقاش قالاسىنداعى ورتا مەكتەپتىڭ قىزمەتىمەن جانە جاڭا وقۋ جىلىنا دايىندىق بارىسىمەن تانىستى. سونداي-اق كوپسالالى كورت پەن سپورت الاڭىن, سپورت زالى مەن وقۋ كابينەتتەرىن ارالاپ كوردى. سەناتور پاندىك كابينەتتەردى كومپيۋتەرلىك تەحنيكامەن جانە وقۋ ادەبيەتىمەن جابدىقتاۋ ماسەلەلەرىنە نازار اۋداردى. سونداي-اق وقۋ ورنىنىڭ قاسبەتىن جوندەۋ قاجەتتىگىن ايتتى.
قازىرگى كەزدە تاۋارلارعا, ونىڭ ىشىندە, ءبىرىنشى كەزەكتە قاجەت ونىمدەرگە باعانىڭ ءوسۋى تۇرعىنداردى تولعاندىرىپ وتىر. رىسقالي ابدىكەروۆ بالقاش قالاسىنداعى جاعدايدى جان-جاقتى زەردەلەۋ ءۇشىن الەۋمەتتىك دۇكەندەرگە باردى. بۇگىنگى تاڭدا قالادا 13 ازىق-ت ۇلىك پاۆيلونى مەن كوممۋنالدىق دۇكەن جۇمىس ىستەيدى. جەرگىلىكتى بيلىك پەن ولار الەۋمەتتىك ماڭىزى بار ونىمدەردىڭ باعاسىن ۇستاپ تۇرۋ بويىنشا مەموراندۋمعا قول قويعان بولاتىن. دەپۋتات اتقارىلىپ جاتقان جۇمىستاردى كۇشەيتۋ جونىندە بىرقاتار ناقتى ۇسىنىس ايتىپ, مۇنىڭ قالا تۇرعىندارى ءۇشىن اسا ماڭىزدى ەكەنىن اتاپ ءوتتى. اكىمدىك وكىلدەرىمەن كەزدەسۋ بارىسىندا بالقاش قالاسىندا كوممۋنالدىق بازار اشۋ تۋرالى دا ءسوز بولدى.
سەناتور قالا تۇرعىندارىمەن دە كەزدەسىپ, ولاردى تولعاندىراتىن ماسەلەلەردى, ەلدى مەكەننىڭ دامۋ كەلەشەگى جانە باسقا دا وزەكتى تاقىرىپتى تالقىلادى.
دانا نۇرجىگىتوۆا الماتى قالاسىندا بىرقاتار كەزدەسۋ وتكىزدى. ن.ساتس اتىنداعى بالالار مەن جاسوسپىرىمدەر مەملەكەتتىك اكادەميالىق ورىس تەاترىنداعى كەزدەسۋدە تەاتر ونەرىن دامىتۋدىڭ نەگىزگى ماسەلەلەرى كوتەرىلدى. سونداي-اق سەناتور تەاتر رەپەرتۋارىن جاقسارتۋ جانە شىعارماشىلىق ۇجىمدى قازىرگى زامانعى جاعدايعا وراي دامىتۋ جونىندە بىرقاتار ۇسىنىس ايتتى.
سەنات دەپۋتاتى ايگىلى تەاتر ترۋپپاسى مەن ۇجىمىنىڭ ەلباسى مەن مەملەكەت باسشىسىنىڭ مادەني جانە گۋمانيتارلىق ساياساتىن ىلگەرىلەتۋ ىسىنە قوسقان ماڭىزدى ۇلەسىن اتاپ ءوتتى.
دانا نۇرجىگىتوۆا ساپار بارىسىندا ALMAU ۋنيۆەرسيتەتى مەن الماتى مەملەكەتتىك ەنەرگەتيكا جانە ەلەكتروندى تەحنولوگيالار كوللەدجىندە بولدى. جۇزدەسۋلەر كەزىندە «جاس مامان» جوباسى تالقىلانىپ, جاس مامانداردىڭ ەڭبەك نارىعىنداعى حالىقارالىق تالاپتارعا سايكەستىگى ماسەلەسى ءسوز بولدى.
سەناتور ق.ساتباەۆ اتىنداعى ۋنيۆەرسيتەتتىڭ كەلەسى وقۋ جىلىنىڭ باستالۋىنا دايىندىق دەڭگەيىمەن تانىسىپ, وقۋ كورپۋستارى مەن جاتاقحانالاردى ارالاپ كوردى. ۋنيۆەرسيتەت باسشىلىعىمەن كەزدەسۋ بارىسىندا دەپۋتات ۆاكتسينالاۋ پروتسەسىن ساپالى ۇيىمداستىرۋدىڭ ماڭىزدىلىعىن اتاپ ءوتتى.
دەپۋتات سونىمەن قاتار الماتى جەو-دا دا بولدى. كەزدەسۋ بارىسىندا ەل پرەزيدەنتىنىڭ جەو بلوكتارىنىڭ ءبىرىنىڭ جۇمىسىن 2023 جىلعا دەيىن گازعا كوشىرۋ جونىندەگى تاپسىرماسىنىڭ ورىندالۋ بارىسىمەن تانىستى. سونداي-اق قالدىقتاردى قايتا وڭدەۋ جونىندەگى جوبانى ىسكە اسىرۋ جانە وعان ينۆەستيتسيا تارتۋ ماسەلەلەرى تالقىلاندى.
ءلاززات سۇلەيمەن الماتى وبلىسىنا ساپارى بارىسىندا قاراتال اۋدانىنىڭ ۇشتوبە قالاسىنداعى ءىلياس ەسەنبەرلين جانە كەمەل توقاەۆ اتىنداعى جالپى ءبىلىم بەرەتىن مەكتەپتەردە بولىپ, وقۋ ورىندارىنىڭ ماتەريالدىق-تەحنيكالىق جابدىقتالۋىنا جانە قاۋىپسىزدىك ماسەلەلەرىنە نازار اۋداردى.
سەنات دەپۋتاتى جىلجىمالى مەديتسينالىق ۆاكتسينالاۋ كەشەنىنە كەلگەن ازاماتتارمەن كەزدەستى. اۋدان اكىمدىگىندە تۇرعىندارعا كورسەتىلەتىن مەملەكەتتىك قىزمەتتەر ساپاسىمەن تانىستى.
ء«بىرىنشى كەزەكتە, ءاربىر سالادا ازاماتتاردىڭ كونستيتۋتسيالىق قۇقىقتارىنىڭ قورعالۋى ماڭىزدى. پرەزيدەنت «حالىق ۇنىنە قۇلاق اساتىن مەملەكەت» تۇجىرىمداماسىن جاريا ەتكەنىن وزدەرىڭىز بىلەسىزدەر جانە ونى ىسكە اسىرۋ باسىم باعىت بولىپ وتىر. وسىعان بايلانىستى بيلىك ارقاشان حالىققا جاقىن بولىپ, ازاماتتاردىڭ پروبلەمالارىن ەستىپ قانا قويماي, ولاردى زاڭ اياسىندا شەشۋدىڭ بارلىق جولىن قاراستىرىپ, پارمەندى شارالار قابىلداۋعا ءتيىس. ءبىز دە وسى باعىتتا جۇمىس ىستەپ جاتىرمىز», دەدى ءلاززات سۇلەيمەن.
سەنات دەپۋتاتى وبلىس ورتالىعىنداعى قالالىق سوت, پروكۋراتۋرا, ىشكى ىستەر ءبولىمى جانە پرەزيدەنت جانىنداعى مەملەكەتتىك باسقارۋ اكادەمياسىنىڭ الماتى وبلىسى بويىنشا فيليالىنىڭ باسشىلارىمەن كەزدەسۋ وتكىزدى. وندا پرەزيدەنت قاسىم-جومارت توقاەۆتىڭ قازاقستان حالقىنا جولداۋىنداعى قۇقىق قورعاۋ ورگاندارى, پروكۋراتۋرا جانە سوت اراسىنداعى وكىلەتتىكتەر مەن جاۋاپكەرشىلىك اياسىن اجىراتا وتىرىپ, قىلمىستىق پروتسەستىڭ ءۇش بۋىندى ۇلگىسىن ەنگىزۋ جونىندەگى تاپسىرمالارىن ىسكە اسىرۋ ماسەلەلەرى تالقىلاندى. كەزدەسۋ بارىسىندا تىكەلەي سايلاۋ وتكىزىلگەننەن كەيىن اۋىلدىق وكرۋگ اكىمدەرىن وقىتۋ ماسەلەسى دە قارالدى.
ولگا بۋلاۆكينا شىعىس قازاقستان وبلىسىنىڭ بىرقاتار اۋدانىنداعى مەديتسينالىق مەكەمەلەردىڭ قىزمەتكەرىمەن كەزدەستى.
سەنات دەپۋتاتى التاي اۋدانىنا بولعان كەزدە سەناتتىڭ زاڭ شىعارۋ قىزمەتى تۋرالى ايتا كەلىپ, مەديتسينا قىزمەتكەرلەرىنىڭ الەۋمەتتىك جانە ەڭبەك جاعدايلارىن جاقسارتۋعا تىكەلەي قاتىستى زاڭدار تۋرالى حاباردار ەتتى. ول ەل پرەزيدەنتىنىڭ جولداۋىن ىسكە اسىرۋدىڭ باسىم باعىتتارىنىڭ ءبىرى – پاندەميا سالدارىن ەڭسەرۋ جانە قازاقستاندىقتاردىڭ دەنساۋلىعىن نىعايتۋ ەكەنىن اتاپ ءوتتى.
«پاندەميا دەنساۋلىق ساقتاۋ جانە ءبىلىم بەرۋ سالاسىنداعى قازىرگى پروبلەمالاردى ايقىندادى جانە وسى سالالاردا جاڭا رەفورمالار جۇرگىزۋ قاجەتتىگىن كورسەتتى. قازىرگى كەزدە دارىگەر مامانداردىڭ جەتىسپەۋشىلىگى بايقالادى, وڭىرلەردە كادرلاردى وقىتۋعا گرانتپەن قارجىلاندىرۋ قاجەت. ۇلتتىڭ دەنساۋلىعى مەن ءال-اۋقاتى ءبىزدىڭ بولاشاعىمىز ەكەنىن جانە مەملەكەتتىڭ دامۋى سوعان بايلانىستى ءتۇسىنۋىمىز كەرەك», دەدى ولگا بۋلاۆكينا.
سەناتور كوروناۆيرۋس پاندەمياسىمەن كۇرەس كەزىندەگى دارىگەرلەردىڭ جۇمىسىنا باسا نازار اۋدارىپ, ولارعا قاجىرلى ەڭبەگى ءۇشىن العىس ايتتى, سونداي-اق ۆاكتسينالاۋ ماسەلەسىن تالقىلادى.
ولگا بۋلاۆكينا وڭىردەگى كوپبالالى وتباسىلاردىڭ تۇرعىن ءۇي ماسەلەلەرى قالاي شەشىلىپ جاتقانىمەن دە تانىستى. ول جۇزەگە اسىرىلىپ جاتقان ء«بىر قاباتتى شىعىس» جوباسىن جوعارى باعالادى. مەملەكەت-جەكەشەلىك ارىپتەستىك قاعيداتىنا نەگىزدەلگەن جوبا كوپبالالى وتباسىلاردىڭ تۇرعىن ءۇي جاعدايلارىن جاقسارتۋعا مۇمكىندىك بەرەدى. سەناتور بۇگىنگى تاڭدا كوپبالالى وتباسىلاردى تۇرعىن ۇيمەن قامتاماسىز ەتۋ – مەملەكەتتىڭ باسىم مىندەتتەرىنىڭ ءبىرى ەكەنىن اتاپ ءوتتى.
سەناتور فەرمەرلەرمەن كەزدەسۋ بارىسىندا جەرگىلىكتى شارۋالاردى تولعاندىرعان ماسەلەلەردى ءبىلدى. ولار اۋىل شارۋاشىلىعىن دامىتۋعا باعىتتالعان سۋبسيديالاردى ءبولۋ جۇيەسىن وزگەرتۋ قاجەتتىگىن ايتتى.
ولگا بۋلاۆكينا سونداي-اق قوعامدىق كەڭەستەر, ارداگەرلەر كەڭەسى, ەتنومادەني بىرلەستىكتەر مۇشەلەرىمەن دە كەزدەستى. بۇل كەزدەسۋلەردە اكىمدەردى سايلاۋ جانە قوعامدىق كەڭەستەردىڭ, قازاقستان حالقى وبلىستىق اسسامبلەياسىنىڭ, انالار مەن اقساقالدار كەڭەستەرىنىڭ جۇمىسى ماسەلەلەرى قارالدى. سونىمەن قاتار اۋرۋحانالاردى جابدىقتاۋ, دەنساۋلىق ساقتاۋدىڭ اقپاراتتىق جۇيەلەرىن ينتەگراتسيالاۋ جانە جەڭىلدىكتى ءدارى-دارمەكتەر بەرۋ ماسەلەلەرى دە كوتەرىلدى.
دەپۋتات ايماق تۇرعىندارى كوتەرگەن بارلىق ماسەلە ءوزىنىڭ الداعى زاڭ شىعارۋ قىزمەتىنىڭ ارقاۋىنا اينالاتىنىن ايتتى.