پرەمەر-ءمينيستردىڭ ورىنباسارى رومان سكليار مۇددەلى مەملەكەتتىك ورگاندار مەن وڭىرلەر اكىمدىكتەرى وكىلدەرىنىڭ قاتىسۋىمەن مال ازىعىن دايىنداۋ ماسەلەلەرى بويىنشا شۇعىل كەڭەس وتكىزدى. بۇل تۋرالى اۋىل شارۋاشىلىعى مينيسترلىگىنىڭ ءباسپاسوز قىزمەتى حابارلادى.
اۋىل شارۋاشىلىعى مينيسترلىگىنىڭ ۇسىنىسى بويىنشا ۇكىمەت ءشوپ شابۋ ناۋقانىنا ارزانداتىلعان جانار-جاعارماي ماتەريالدارىنىڭ قوسىمشا كولەمىن بولۋگە وبلىس اكىمدىكتەرىنىڭ وتىنىمدەرىن ماقۇلداۋ تۋرالى شەشىم قابىلدادى. وسى اپتادا وڭىرلەرگە جانار-جاعارماي جەتكىزۋ كەستەسىن بەكىتۋ جوسپارلانۋدا. وبلىس اكىمدىكتەرىنە فەرمەرلەرگە 43,6 مىڭ توننا جەڭىلدەتىلگەن جانار-جاعارماي جەتكىزۋدى باقىلاۋ تاپسىرىلدى.
«قازاقستان تەمىر جولى» ۇك» اق 2021 جىلدىڭ 31 شىلدەسىنە دەيىن ءشوپ تاسىمالداۋ ءۇشىن رەسپۋبليكانىڭ بارلىق اۋماعىندا ۋاقىتشا جەڭىلدىكتەر ۇسىندى. تاسىمالداۋ قۇنى 77%-عا تومەندەتىلدى. بۇل شارا باتىس وڭىرلەرگە قوسىمشا مال ازىعىن جىلدام جەتكىزۋگە مۇمكىندىك بەرەدى.
جيىن بارىسىندا مال جانە قۇس شارۋاشىلىقتارى ءۇشىن جەمشوپ قورىن قالىپتاستىرۋ ماقساتىندا جەمدىك استىقتى قوسىمشا ساتىپ الۋ تۋرالى ۇسىنىس قارالدى. قازىر قارجىلاندىرۋ كوزدەرى تۋرالى ماسەلە زەرتتەلۋدە.
شاعىن جانە ورتا فەرمەرلىك شارۋاشىلىقتاردا جەمشوپ ءوندىرىسىن ىنتالاندىرۋ ماقساتىندا فەرمەرلەرگە جەمشوپ دايىنداۋ تەحنيكاسى مەن سۋارۋدىڭ ۇتقىر جۇيەلەرىن ساتىپ الۋ ءۇشىن «بايتەرەك» حولدينگىنە قوسىمشا قارجىلاندىرۋدىڭ تەتىكتەرىن ازىرلەۋ تاپسىرىلدى.
وڭىرلەردىڭ اكىمدىكتەرىنە مال ازىعى باعاسىنىڭ قولجەتىمدى بولۋىن تۇراقتى باقىلاۋ جانە اۋىل شارۋاشىلىعى وندىرۋشىلەرىمەن جانە قۇراما جەم كاسىپورىندارىمەن جەمدى قولجەتىمدى باعامەن ساتۋ تۋرالى مەموراندۋم جاساسۋ تاپسىرىلدى.