الداعى جەكسەنبى, ياعني 25 شىلدەدە رەسپۋبليكامىزدىڭ اۋماعىندا اۋداندىق ماڭىزداعى قالالاردىڭ, اۋىلداردىڭ, كەنتتەردىڭ جانە اۋىلدىق وكۋرگتەردىڭ اكىمدەرىن تىكەلەي سايلاۋ وتەدى. وسىلايشا, بۇل كۇن دە تاۋەلسىز قازاقستاننىڭ 30 جىلدىق شەجىرەسىنە تاعى ءبىر تاريحي بەلەس رەتىندە جازىلاتىن بولادى.
ەسكە سالا كەتەيىك, اۋىل اكىمدەرىن تىكەلەي سايلاۋ ماسەلەسى – مەملەكەت باسشىسى قاسىم-جومارت توقاەۆتىڭ ساياسي رەفورمالارىنىڭ ماڭىزدى تۇستارىنىڭ ءبىرى. بۇل تۋرالى پرەزيدەنت ءوزىنىڭ «جاڭا جاعدايداعى قازاقستان: ءىس-قيمىل كەزەڭى» اتتى بىلتىرعى جولداۋىندا ايتىپ, تاپسىرما بەرگەنى بەلگىلى. تاياۋدا وسىعان وراي وتكىزگەن كەڭەستە دە «بۇل – ءبىز ءۇشىن ستراتەگيالىق ءمانى ايرىقشا مىندەت. ازاماتتارىمىز تۇڭعىش رەت جەرگىلىكتى اتقارۋشى بيلىكتىڭ باسشىسىن تىكەلەي سايلاۋ مۇمكىندىگىنە يە بولماق. ءبىز بۇعان بىرتىندەپ, جوسپارلى تۇردە كەلدىك», دەپ اتاپ كورسەتە وتىرىپ, الداعى ساياسي ناۋقاننىڭ ماڭىزىنا ەرەكشە توقتالعان بولاتىن.
راسىندا دا, ەل ىشىندە وسى ناۋقانعا ءجىتى دايىندىق جۇرگىزىلدى. اكىم سايلاۋى وتەتىن اۋىلدار ناقتىلاندى, ولاردىڭ سانى – 730. زاڭناماعا سايكەس سايلاۋالدى جۇمىستار اتقارىلدى. ال وتكەن 14 شىلدەدە اۋداندىق ماڭىزى بار قالالاردىڭ, اۋىلداردىڭ, كەنتتەردىڭ جانە اۋىلدىق وكرۋگتەردىڭ اكىمدىگىنە كانديداتتاردى تىركەۋ اياقتالىپ, ەل بويىنشا سايلاۋعا قاتىسۋ ءۇشىن جالپى 2582 ادام ءوز كانديداتۋراسىن ۇسىنعانى, ونىڭ 2297-ءسى نەمەسە 88,9%-ى قاجەتتى تىركەۋدەن وتكەنى بەلگىلى بولدى. بۇل تۋرالى پرەزيدەنتتىڭ كومەكشىسى ەرلان قارين Telegram ارناسىندا جازدى. سونداعى كەلتىرىلگەن دەرەكتەرگە قاراعاندا, ساياسي پارتيالاردان 878 ادام (38,2%) ۇسىنىلسا, تىركەلگەندەردىڭ 1419-ى نەمەسە 61,8%-ى ءوزىن ءوزى ۇسىنعاندار ەكەن. ياعني اكىم سايلاۋى ەل ازاماتتارىنىڭ تاراپىنان ەلەۋلى قىزىعۋشىلىق تۋدىرعان. وسىعان وراي, قازاقستان حالقى بۇل سايلاۋدى دا ابىرويمەن وتكىزىپ, ءاربىر سايلاۋشى ءوز تاڭداۋىن جاسايدى دەپ سەنەمىز. «Egemen Qazaqstan» گازەتى سايلاۋ بارىسىن ءجىتى نازاردا ۇستايتىن بولادى.