ءبىلىم جانە عىلىم مينيسترلىگى جاڭا وقۋ جىلىنا دايىندىققا قاتىستى ۇسىنىستار ازىرلەدى. وسىعان سايكەس وڭىرلەردە دايىندىق جۇمىستارى جۇرگىزىلىپ جاتىر, دەپ حابارلايدى Egemen.kz بعم ءباسپاسوز قىزمەتىنە سىلتەمە جاساپ.
وسىعان بايلانىستى, جەرگىلىكتى اتقارۋشى ورگانداردىڭ ءبىلىم باسقارمالارى وقۋ ورىندارىندا سانيتارلىق نورمالاردىڭ ساقتالۋىنا ەرەكشە نازار اۋدارىپ, باقىلاۋى قاجەت. بارلىق مەكتەپتەردە قىزمەتكەرلەر مەن ءبىلىم الۋشىلاردىڭ تەمپەراتۋراسىن ولشەۋ, قاۋىپسىزدىك شارالارىن ساقتاي وتىرىپ, كابينەتتەردىڭ اۋاسىن زارارسىزداندىرۋ (كۆارتستاۋ) جانە دەزينفەكتسيالاۋ شارالارىن جۇرگىزۋ كەرەك. ءبىلىم بەرۋ ۇيىمدارى دەزينفەكتسيالاۋ قۇرالدارىمەن قامتاماسىز ەتىلۋى ءتيىس.
جالعاسىپ جاتقان شەكتەۋ شارالارى كەزىندە وقۋ ورىندارىنىڭ سىيىمدىلىق قۋاتى مەن ءبىلىم الۋشىلاردىڭ سانىنا قاراي اۋىسىم مەن جۇمىس رەجيمىن الدىن الا انىقتاپ, الەۋمەتتىك قاشىقتىقتى ساقتاي وتىرىپ, وقۋ پروتسەسىن ۇيىمداستىرۋ ماڭىزدى.
اكىمدىكتەردىڭ ءبىلىم باسقارمالارى مەن مەكتەپ اكىمشىلىكتەرى بالالاردىڭ دالىزدەر مەن بۋفەتتەردە جينالۋىن بولدىرماۋ ءۇشىن ۇزىلىستەردى ءار ءتۇرلى ۋاقىتتا وتكىزۋدى ۇيىمداستىرۋى قاجەت. سونداي-اق ءبىلىم الۋشىلار مەن قىزمەتكەرلەر اراسىندا ماسكا تاعۋ رەجيمىن ساقتاۋدى قامتاماسىز ەتۋ كەرەك. ءبىر سىنىپ ءبىر كابينەتتە وقۋى ءتيىس.
ء«اربىر اكىمدىكتىڭ ءبىلىم باسقارماسى مەن ءبىلىم بەرۋ ۇيىمدارىنىڭ پاندەميا كەزىندە سانيتارلىق تالاپتاردى ساقتاي وتىرىپ, كەزەكشى سىنىپتار مەن مەكتەپتەردىڭ جۇمىسىن ۇيىمداستىرۋدا تاجىريبەسى بار. دەگەنمەن, كۇندىزگى وقۋ پروتسەسىن ۇيىمداستىرۋ ماسەلەسىنە ۇلكەن جاۋاپكەرشىلىكپەن قاراۋ كەرەك. باستىسى – بالالاردىڭ دەنساۋلىعى. سوندىقتان ءار سىنىپ باسقا كابينەتكە اۋىسپاي, ءوز كابينەتىندە وقيدى. وقۋشىلار دا مۇعالىمدەر سياقتى بەتپەردە كيەدى. ۇزىلىستەر ءار ءتۇرلى ۋاقىتتا بولادى, قاجەت بولعان جاعدايدا قوسىمشا اۋىسىمدار ەنگىزىلەدى. كىرەبەرىستە تەمپەراتۋرانى ولشەيتىن جانە دەزينفەكتسيالىق قۇرالداردىڭ بولۋى مىندەتتى. سونداي-اق وقۋشىلاردىڭ ءبىلىم ولقىلىقتارىن تولتىرۋ بويىنشا پەداگوگتەردىڭ كولەمدى جۇمىس جۇرگىزۋى ماڭىزدى», دەدى بعم مەكتەپكە دەيىنگى جانە ورتا ءبىلىم كوميتەتى توراعاسىنىڭ ورىنباسارى جومارت قارامباەۆ.
سونىمەن قاتار ساباق كەستەسى سانيتارلىق تالاپتاردى ەسكەرە وتىرىپ جاسالۋى كەرەك. ءبىلىم بەرۋ ۇيىمدارى بۇقارالىق, مادەني جانە سپورتتىق ءىس-شارالاردى وتكىزۋدى شەكتەۋى قاجەت. ءداستۇرلى وقىتۋ فورماتىندا مەكتەپ فورماسى بۇرىنعىداي ساقتالادى.
سانيتارلىق قىزمەتتىڭ تالابى بويىنشا الداعى وقۋ جىلىندا مەكتەپتەردى اشۋ شارتتارىنىڭ ءبىرى – مۇعالىمدەر مەن قىزمەتكەرلەردى ۆاكتسيناتسيالاۋ.
ءبىلىم بەرۋ ۇيىمدارىن ءداستۇرلى فورماتقا قايتارۋ ەلدەگى سانيتارلىق-ەپيدەميولوگيالىق جاعدايعا بايلانىستى بولاتىنىن ايتا كەتەيىك. وقىتۋ فورماتى تۋرالى شەشىمدى كوروناۆيرۋستىق ينفەكتسيانىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيا, ەلدىڭ باس مەملەكەتتىك سانيتاريالىق دارىگەرى جانە وڭىرلەردىڭ باس سانيتارلىق دارىگەرلەرى قابىلدايدى.
«وتكەن جىلى وقىتۋ فورماتى ەپيدەميولوگيالىق جاعدايعا بايلانىستى وزگەرىپ وتىرعانى ەستەرىڭىزدە بولار. كەيبىر وقۋشىلار قاشىقتان ءبىلىم الدى, ءبىر بولىگى ارالاس فورماتتا وقىدى. ەپيدەميولوگيالىق جاعداي جەڭىلدەپ, ءداستۇرلى وقۋعا مۇمكىندىك بولعان كەزدە كەيبىر وقۋشىلار كەزەكشى سىنىپتارعا باردى. ياعني, ەلدە جاپپاي قاشىقتان وقىتۋ بولعان جوق. ءىس جۇزىندە ورتا ەسەپپەن 4000-عا جۋىق شاعىن اۋىلدارداعى مەكتەپتەر جىل بويى ءداستۇرلى فورماتتا وقىتىلدى. ءداستۇرلى فورماتتا وقيتىنداردىڭ جالپى سانى كەزەكشى سىنىپتاردى قوسا العاندا ءبىرىنشى توقساندا 1 ملن بالا بولسا, ءتورتىنشى توقساندا 2 ملن بالاعا دەيىن جەتتى», دەدى جومارت قارامباەۆ.
1 قىركۇيەكتە 3,5 ملن-نان استام بالا ءۇشىن 7 475 مەكتەپ اشۋ جوسپارلانعان. قازىر مەكتەپتەردە جوندەۋ جۇمىستارى جۇرگىزىلىپ جاتىر. ولاردىڭ بارىسىن اكىمدىكتەردىڭ ءبىلىم باسقارمالارى باقىلايدى. بارلىق ءبىلىم بەرۋ ۇيىمدارىندا جوندەۋ جۇمىستارى اياقتالادى, سونىڭ ىشىندە 263 مەكتەپ كۇردەلى جوندەۋدەن وتەدى.