تۇرعىنداردىڭ ءومىر ءسۇرۋ ساپاسىن جاقسارتۋ ماقساتىندا ءال-فارابي اۋدانىندا جولاۋشىلار حابى سانالاتىن 10 نۇكتەگە جاڭا ايالدامالار سالىنادى, دەپ حابارلايدى Egemen.kz شىمكەنت قالاسى اكىمدىگىنىڭ ءباسپاسوز قىزمەتىنە سىلتەمە جاساپ.
جاڭا ۇلگىدەگى ايالدامالار دەمەۋشىلەر تاراپىنان پايدالانۋعا بەرىلەدى.
وسىعان وراي ءال-فارابي اۋدانىنىڭ اكىمى راشيد مىڭباەۆ ينۆەستورلارمەن كەزدەسىپ, قۇرىلىس جوسپارىن پىسىقتادى. باستى ماقسات – قالا تۇرعىندارى مەن قوناقتارىنا مەيلىنشە جايلى جاعداي جاساۋ.
«اقىلدى» قالا اتانۋدىڭ العىشارتى – قاۋىپسىزدىك. سوندىقتان قوعامدىق ورىنداردى ءجىتى قاداعالاۋ ماقساتىندا ايالدامالارعا بەينەباقىلاۋ كامەرالارى ورناتىلادى.
سونداي-اق جولاۋشىلاردىڭ ەڭ باستى قاجەتتىلىكتەرى سانالاتىن كونديتسيونەر مەن wifi, تەلەفون قۋاتتاعىش قۇرىلعىسى, مارشرۋتتاردىڭ باعىتىن كورسەتەتىن جول كارتاسى دا قويىلادى.
جاڭا ۇلگىدەگى ايالدامالار الداعى ايدا حالىق يگىلىگىنە بەرىلەدى دەپ جوسپارلانۋدا.