2019 جىلى 25 پايىزعا ارتقان ۋچاسكەلىك پوليتسيا ينسپەكتورلارىنىڭ جالاقىسى كەلەر جىلى تاعى دا كوبەيمەك. بۇل جونىندە ءىىم-دە ونلاين وتكەن بريفينگتە اكىمشىلىك پوليتسيا كوميتەتى توراعاسىنىڭ ورىنباسارى الەكسەي ميليۋك مالىمدەدى.
سونداي-اق 1 قاڭتاردان باستاپ ۋچاسكەلىك پوليتسيا ينسپەكتورلارىنىڭ كومەكشىلەرىنە تۇرعىن ءۇيدى جالعا العانى ءۇشىن مەملەكەتتەن وتەماقى تولەنەدى. مۇنداي ماتەريالدىق كومەك ۋچاسكەلىك ينسپەكتورلاردىڭ وزدەرىنە 2019 جىلدىڭ شىلدەسىنەن باستاپ بەرىلىپ كەلەدى.
ا.ميليۋكتىڭ ايتۋىنشا, قازىر بۇل سالاعا كادرلاردى ىرىكتەۋ جانە جۇمىسقا ورنالاستىرۋ بويىنشا بىلىكتىلىك تالاپتارى كۇشەيتىلگەن.
بۇگىندە ۋچاسكەلىك ينسپەكتورلار قىلمىستىق ءىس جۇرگىزۋدى جۇزەگە اسىرىپ قانا قويماي, اكىمشىلىك قۇقىق بۇزۋشىلىقتاردىڭ 50-دەن استام قۇرامى بويىنشا ءوز بەتىنشە جازا قولدانا الادى.
ەڭ باستىسى – وسى قىزمەتتىڭ اجىراماس بولىگى رەتىندە ۋچاسكەلىك ينسپەكتوردىڭ كومەكشىسى مارتەبەسى زاڭدى تۇردە بەكىتىلىپ, ولار قازىرگى تاڭدا قىلمىستىق ىستەر بويىنشا ءىس جۇرگىزۋ شەشىمدەرىن قوسپاعاندا, ۋچاسكەلىك ينسپەكتوردىڭ بارلىق وكىلەتتىگىنە يە بولىپ وتىر. ءىىم-ءنىڭ ىشكى رەزەرۆى ەسەبىنەن بيىل شىلدە ايىنان باستاپ اۋىلدىق ۋچاسكەلىك پوليتسيا ينسپەكتورلارى ءۇشىن وسىنداي لاۋازىمداردى كەزەڭ-كەزەڭىمەن ەنگىزۋ باستالعان.
بۇل قىزمەتتىڭ ماتەريالدىق-تەحنيكالىق ماسەلەلەرىن شەشۋگە ەرەكشە ءمان بەرىلىپ وتىرعانىن ايتقان سپيكەر الداعى بەس جىلدا حالىق ءۇشىن ەڭ قولايلى ورىنداردا 78 ۋچاسكەلىك پوليتسيا پۋنكتىنىڭ سالىناتىنىن دا ايتىپ ءوتتى.
«قازىرگى تاڭدا اۋىلدىق جەرلەردەگى 1500-دەن استام ۋچاسكەلىك ينسپەكتور وزدەرىنىڭ قىزمەت كورسەتىلەتىن اۋماقتارىنان الىستا تۇرادى. كۇن تارتىبىندە وسى ءتۇيىندى وڭتايلى شەشۋ, ولاردى جۇمىس ورىندارىنا جاقىن ماڭعا كوشىرۋ ماسەلەلەرى پىسىقتالۋدا», دەدى ءىىم وكىلى.
جاقىندا «102» ارنايى ءموبيلدى قوسىمشاسى پايدالانۋعا بەرىلدى. بۇل قوسىمشا ارقىلى كەز كەلگەن ازامات اۋديو نەمەسە بەينەقوڭىراۋ ارقىلى پوليتسياعا حابارلاسىپ, قۇقىق بۇزۋشىلىقتىڭ فوتو جانە بەينەماتەريالدارىن جىبەرە الادى. ءسوزىنىڭ سوڭىندا ا.ميليۋك «قادامدىق قولجەتىمدىلىك» قاعيداتىن ىسكە اسىرۋ بويىنشا اتقارىلاتىن جۇمىستاردىڭ الداعى ۋاقىتتا دا جالعاساتىنىن ايتتى.