قوستاناي وبلىسىنا قاراستى دەنيسوۆ اۋدانىندا اۋىلدىق وكرۋگ اكىمدەرىنىڭ سايلاۋىنا سەگىز ۇمىتكەر تۇسكەن. ونىڭ ۇشەۋى «Nur Otan» پارتياسىنىڭ اتىنان قاتىسىپ جاتىر, دەپ حابارلايدى Egemen.kz.
تاۋەلسىزدىك تاريحىنداعى تۇڭعىش تىكەلەي سايلاۋعا دايىندىق بارىسىمەن تانىسۋ ماقساتىندا اتالمىش اۋدانعا ارنايى كەلگەن پارلامەنت ءماجىلىسىنىڭ دەپۋتاتى ەكاتەرينا سمىشلياەۆا ءوڭىر تۇرعىندارىمەن كەزدەسىپ, الداعى سايلاۋدىڭ ءمان-ماڭىزى جونىندە پىكىر الىستى. ە.سمىشلياەۆا اۋدانعا ساپارى بارىسىندا «Nur Otan» پارتياسىنىڭ اتىنان سايلاۋعا ءتۇسىپ جاتقان ۇمىتكەرمەن بىرگە بىرقاتار شارۋاشىلىقتاردى دا ارالادى.
دەنيسوۆ اۋدانىنداعى تەلمان اۋىلدىق وكرۋگىندە وتەتىن اكىم سايلاۋىنا تۇسكەن ەكى ۇمىتكەردىڭ ءبىرى - «Nur Otan» پارتياسىنىڭ مۇشەسى, اۋداندىق ءبىلىم ءبولىمى ادىستەمەلىك كابينەتىنىڭ مەڭگەرۋشىسى ارمان دابىلوۆ. ول وسى وڭىردەگى انتونوۆ اۋىلىندا تۋىپ-وسكەن. جوعارعى وقۋ ورنىن تامامداعان سوڭ, تۋعان جەرگە ورالىپ, ەڭبەك جولىن مۇعالىمدىكتەن باستاعان. ۇمىتكەر اكىم سايلاۋىنا شەن ءۇشىن ەمەس, تۋعان جەرگە بەل شەشىپ قىزمەت ەتۋ ماقساتىندا ءتۇسىپ جاتقانىن ايتادى.
«وسى وڭىردە كىندىك قانىم تامىپ, ەسەيىپ, ەر جەتتىم. سوندىقتان تەلمان اۋىلدىق وكرۋگىنىڭ تىنىس-تىرشىلىگى, مۇنداعى كوپتەن شەشىلمەي كەلە جاتقان كۇرمەۋلى ماسەلەلەر ماعان ەتەنە تانىس. ءوزىم ءبىلىم سالاسىندا جۇرسەم دە, كۇندەلىكتى تۇرمىس بارىسىندا مۇنداي جايتتارمەن بەتپە-بەت كەلىپ قالاتىن ساتتەر ءجيى كەزدەسەدى. بۇل, اسىرەسە, بالالار مەن سپورت الاڭدارىن سالۋ, مەكتەپ عيماراتتارى مەن جولداردى جوندەۋ ماسەلەلەرىنە قاتىستى. ءوزىمنىڭ بار كۇش-جىگەرىم مەن ءبىلىم-تاجىريبەمدى تۋعان جەردى كوركەيتۋگە, اۋىل تۇرعىندارىنىڭ ءومىر ساپاسىن ارتتىرۋعا جۇمسايمىن. «كەڭەسىپ پىشكەن تون كەلتە بولمايدى», اۋىل ءومىرىن جاقسارتۋعا قاتىستى كەز-كەلگەن ماسەلەنى جەرلەستەرىممەن اقىلداسا وتىرىپ, ءتيىمدى شەشۋ جولدارىن قاراستىرامىن», دەدى وكرۋگ اكىمىنە ۇمىتكەر ارمان دابىلوۆ.
ءماجىلىس دەپۋتاتى ەكاتەرينا سمىشلياەۆا مەن ارمان دابىلوۆ اۋىلدىق وكرۋگتەگى «اگروفيرما وليمپ» جاۋاپكەرشىلىگى شەكتەۋلى سەرىكتەستىگى ۇجىمىمەن كەزدەستى. مۇندا 70-كە جۋىق ادام جۇمىس ىستەيدى. ەڭبەككەرلەردىڭ كوبى اكىم سايلاۋىنا ءبىرىنشى رەت ءتۇسىپ جاتقان ۇمىتكەردى جاقسى بىلەتىن بولىپ شىقتى. ال ءماجىلىس دەپۋتاتى بيىل اۋىلدىق جەرلەردە العاش رەت وتەيىن دەپ وتىرعان تىكەلەي سايلاۋدىڭ ەلىمىزدىڭ ساياسي ومىرىندەگى ەڭ ەلەۋلى وزگەرىس ەكەنىن, مۇنىڭ اۋىلدى دامىتۋداعى ماڭىزى زور ەكەنىن اڭگىمەلەپ, ۇمىتكەرگە قولداۋ ءبىلدىردى.
«وسى اۋىلدىڭ ءتول پەرزەنتى ارمان دابىلوۆ سايلاۋعا «Nur Otan» پارتياسىنىڭ اتىنان ءتۇسىپ وتىر. ول وسى اۋىلدىڭ جەرگىلىكتى جەردەگى ماسەلەلەردى جەتىك بىلەدى, ويتكەنى ءوزىنىڭ تۋعان اۋىلى عوي. قالادا وقىپ, ءبىلىم الدى, اۋداندىق اكىمدىكتە جۇمىس ىستەدى, ءبىلىم سالاسىنىڭ بىلىكتى مامانى. وسى ءوڭىردىڭ تۇرعىندارىن دا جاقسى تانيدى. ەڭ باستىسى, ول زامانداستارى سياقتى قالاعا تۇراقتاپ قالعان جوق, سانالى تۇردە ءوز اۋىلىنا ورالىپ, ەڭبەككە ارالاستى. سوندىقتان ونىڭ وسى جولعى سايلاۋعا ءتۇسۋى دە كەزدەيسوق دۇنيە ەمەس», دەدى ە. سمىشلياەۆا.
كەزدەسۋ بارىسىندا «Nur Otan» پارتياسىنىڭ سايلاۋالدى باعدارلاماسىن ىسكە اسىرۋ بارىسى تالقىلاندى. ارمان دابىلوۆ ءوزىنىڭ سايلاۋالدى باعدارلاماسىنىڭ نەگىزگى باعىتتارى تۋرالى ايتىپ بەردى. اۋىل تۇرعىندارىنىڭ تاراپىنان كوپتەگەن تىلەكتەر مەن ۇسىنىستار دا ايتىلدى. حالىق قالاۋلىسى مەن ۇمىتكەرگە ءتۇرلى ساۋالدار قويىپ, تۇشىمدى جاۋاپ العان تۇرعىنداردىڭ دەنى الداعى ماڭىزدى ساياسي ناۋقانعا بەلسەندى قاتىساتىندارىن جەتكىزدى.
قوستاناي وبلىسى