س.بايىشەۆ اتىنداعى اقتوبە ۋنيۆەرسيتەتىنىڭ 3-كۋرس ستۋدەنتى مۇحتار تۇلكىباەۆ ءوز ءومىرىن قاتەرگە تىگە وتىرىپ, قارعالى وزەنىنە باتىپ بارا جاتقان 28 جاستاعى ەر ادامدى قۇتقارىپ قالدى.
شىلدەنىڭ شىلىڭگىر ىستىعىندا كەشكىلىك دوستارىمەن بىرگە قارعالى وزەنىنىڭ جاعاسىندا سەرۋەندەپ جۇرگەن 20 جاستاعى مۇحتار وقيعاعا تاپ بولدى. وزەن جاعاسىندا ءبىر توپ ادامنىڭ سپيرتتىك ىشىمدىكتەر ءىشىپ وتىرعانىن كورەدى. سول جەردە توپتانىپ ماساڭ كۇيدە وتىرعان ەر ادامداردىڭ ءبىرى سۋعا شومىلماق بولادى. بەيتانىس سۋعا تۇسۋگە بارا جاتىپ, مۇحتار مەن دوستارىنان جاعادا وتىرعانداردى سىرتتاي باقىلاپ قويۋدى وتىنگەن ەكەن. الايدا ولاردان تاياقتاستام جەردە وتىرعان مۇحتار كوزىنىڭ قيىعىمەن ىشىمدىك ىشكەندەردى ەمەس, سۋعا سۇڭگىگەن جىگىتتى باعىپ وتىرعان. بەيتانىستىڭ سۋ بەتىنە قايتىپ شىقپاي قالعانىن بايقاعان ول ويلانباستان كومەككە ۇمتىلادى. بىرەر مينۋت ىشىندە قارعالى وزەنىنىڭ 4 مەتر تەرەڭدىگىنەن باتىپ بارا جاتقان جىگىتتى الىپ شىقتى. ءسويتىپ قاس-قاعىم ۋاقىت ىشىندە 20 جاستاعى مۇحتار وزىنەن 8 جاس ەرەسەك جىگىتتىڭ ءومىرىن قۇتقارىپ قالدى. قارعالى وزەنىنىڭ بويىنداعى شومىلۋعا تىيىم سالىنعان جەردە ىشىمدىك ىشكەندەردىڭ «ساياحاتى» وسىلايشا قايعىلى اياقتالا جازدادى.
مۇحتار سول جەردە دوستارىمەن بىرگە ەسسىز جاتقان ادامعا جەدەل جاردەم كەلگەنشە العاشقى مەديتسينالىق كومەك كورسەتىپ ۇلگەردى. ستۋدەنتتەر ناۋقاستى جاساندى دەم الدىرىپ, جۇرەك تۇسىن ۋقالادى. كوپ كەشىكپەي كەلىپ جەتكەن دارىگەرلەرگە قۇتقارىلعان, بىراق اۋىر كۇيدە جاتقان ناۋقاستى تاپسىرعاننان كەيىن ولاردىڭ يىقتارىنان اۋىر جۇك تۇسكەندەي بولدى. شومىلۋعا رۇقسات ەتىلمەگەن جەردە ماس كۇيىندە سۋعا تۇسكەن ەر ادام جەدەل جاردەم اۋرۋحاناسىنىڭ جانساقتاۋ بولىمىنە اۋىر حالدە جەتكىزىلىپ, ءبىراز كۇننەن كەيىن عانا ەسىن جيدى.
باتىل ستۋدەنت شىلدەنىڭ باسىندا بولعان وسى جاعدايدى ۇمىتىپ كەتسە دە, توتەنشە جاعدايلار دەپارتامەنتىنىڭ باسشىلىعى ۇمىتپاي, مۇحتار تۇلكىباەۆتى ۆەدومستۆولىق ناگرادامەن ماراپاتتاۋ تۋرالى مينيسترلىككە ءوتىنىش جولدادى.
اقتوبە وبلىسى