اتىراۋ وبلىسىندا مال قىرىلىپ جاتقانى راس پا؟

اكىمنىڭ ايتۋىنشا, الەۋمەتتىك جەلىدە بىرنەشە اۋىلدا كانال سۋى تارتىلىپ, جىلقى مەن ءىرى قارا ءولىپ جاتقانى تۋرالى سۋرەتتەر جاريالانعان.

ء«بىز سول جازبا اۆتورىنان الەۋمەتتىك جەلىدەگى سۋرەتتەردى كىم جىبەرگەنىن, مال ءولىمى ناقتى قاي جەردە ورىن العانىن سۇرادىق. ەشقانداي جاۋاپ بولمادى. اۋدان اكىمىنىڭ ورىنباسارى ماماندارمەن بىرگە نارىن كانالىن, ماناشتاعى قازاندىقتى تەكسەردى. راس, اسىپ-تاسىپ جاتقان سۋ بولماعانىمەن, بىراق, مال سۋارۋعا جەتەرلىك. ال, جاپپاي قىرىلىپ جاتقان مال دەرەگى تىركەلگەن جوق. تەك كانالدىڭ باتپاعىنا باتىپ, نە اۋىرىپ ولگەن مالدىڭ ولەكسەسىن كەزدەستىرۋگە بولادى. ويتكەنى, سۋ قازاندىعىنان كوپتەگەن مال سۋ ىشەدى», دەيدى پولىمبەت حاسانوۆ.

ونىڭ ءمالىم ەتۋىنشە, اۋداندا شەشىمىن كۇتكەن ماسەلەلەر بار.

«اۋداننىڭ اۋماعى – شولەيتتى, جەرى قۇنارسىز, سورتاڭ. سوڭعى جىلدارى قار مەن جاۋىن-شاشىن از مولشەردە ءتۇستى. بىراق, بيىلعى كوكتەمدە جاڭبىر مول جاۋىپ, جايىلىمدىق جەرگە ىلعال ءتۇستى. قۇم وڭىرىنەن باسقا ەلدىمەكەندەر مالى كاسپي تەڭىزىنىڭ جاعالاۋى مەن جايىقتان باستاۋ الاتىن كانالداردان سۋ ىشەدى. ونداعى سۋ دەڭگەيى بىرقالىپتى. ايتسە دە, ماناش قازاندىعىنداعى سۋ دەڭگەيى تومەن. كانالدارعا ۇزاق ۋاقىت كۇردەلى جوندەۋ جۇرگىزىلمەگەن. سونىڭ ءبىرى – «قازسۋشار» مەكەمەسىنىڭ تەڭگەرىمىندەگى نارىن كانالى. اتالعان كانال ماحامبەت اۋدانىنداعى سارىتوعاي اۋىلىنان باستالىپ, يساتاي اۋدانىنداعى ءتورت اۋىلدىق وكرۋگ ارقىلى نارىن اۋىلدىق وكرۋگىنە دەيىن سوزىلادى. سوندىقتان, «بىرنەشە اۋىلدىڭ مالى قىرىلىپ جاتىر» دەگەن دايەكسىز اڭگىمە», دەيدى ول.