سارسەنبىدە تەل-اۆيۆتە بىرىككەن اراب امىرلىكتەرى ەلشىلىگىنىڭ اشىلۋ سالتاناتى ءوتتى, دەپ حابارلايدى Egemen.kz. بۇل جايىندا العاشقىلاردىڭ ءبىرى بولىپ انادولى اگەنتتىگى اقپارات تاراتتى.
سالتاناتتى راسىمگە يزرايل پرەزيدەنتى يتسحاك گەرتسوگ قاتىستى.
ديپلوماتيالىق ميسسياسى زور عيماراتتىڭ ەسىگىندەگى قىزىل لەنتانى پرەزيدەنت گەرتسوگ پەن ءباا-ءنىڭ يزرايلدەگى ەلشىسى مۇحاممەد ماحمۋد ءال-حادج قيدى.
«ەلشىلىك تەك ديپلوماتتار ءۇشىن رەزيدەنتسيا عانا ەمەس, سونىمەن بىرگە قارىم-قاتىناستى, سەرىكتەستىك پەن ديالوگتى نىعايتۋعا ارنالعان الاڭ», دەدى ەلشى ءسوز اراسىندا.
ال يزرايل پرەزيدەنتى بۇرىندارى تەل-اۆيۆتە ءباا تۋىن كورۋ الىس ارمان بولىپ كورىنگەنىمەن, بۇگىندە بۇل شىندىققا اينالعانىن اتاپ ءوتتى.