قازاقستان رەسپۋبليكاسىنىڭ ۇكىمەتى حالىقارالىك تۇركى اكادەمياسىنا قۇرىلتايشى مەملەكەتتەردىڭ ءبىرى رەتىندە ۇيىمنىڭ بيۋدجەتىنە مىندەتتى جارنا شاكىلىن بەكىتتى. بۇل تۋرالى ارنايى قاۋلىعا قازاقستان رەسپۋبليكاسىنىڭ پرەمەر-ءمينيسترى اسقار مامين قول قويدى, دەپ حابارلايدى Egemen.kz تۇركى اكادەمياسىنىڭ ءباسپاسوز قىزمەتىنە سىلتەمە جاساپ.
اتالعان قۇجاتقا سايكەس, قاۋلى كۇشىنە ەنگەن ساتتەن باستاپ, قازاقستان رەسپۋبليكاسىنىڭ ۇكىمەتى ونداعى ەرەجەلەردىڭ ورىندالۋىن قامتاماسىز ەتەدى.
ايتا كەتۋ كەرەك, 2020 جىلى 28 قاراشادا «مۇشە مەملەكەتتەردىڭ تۇركى اكادەمياسىنىڭ بيۋدجەتىنە مىندەتتى جارنالارىنىڭ شاكىلى تۋرالى» حاتتاما ىستامبۇل قالاسىندا ماقۇلدانعان بولاتىن. حالىقارالىق تۇركى اكادەمياسىنا مۇشە مەملەكەتتەر – ازەربايجان, قازاقستان, قىرعىزستان جانە تۇركيا تاراپتارى ءوزارا كەلىسكەن ۇلەستەر بويىنشا مىندەتتى جارنالار تولەيدى.
بۇعان كەيىن «مۇشە مەملەكەتتەردىڭ تۇركى اكادەمياسىنىڭ بيۋدجەتىنە مىندەتتى جارنالارىنىڭ شاكىلى تۋرالى» حاتتامانى ازەربايجان جانە تۇركيا رەسپۋبليكاسىنىڭ پرەزيدەنتەرى بەكىتكەن بولاتىن.