الماتى قالاسىندا قاجىلىققا باراتىن ادامدارعا جالعان ۆاكتسينا پاسپورتىن راسىمدەگەن تۋريستىك كومپانيا انىقتالدى. بۇل تۋرالى ىشكى ىستەر مينيسترلىگىنىڭ ءباسپاسوز وكىلى شۇعىلا تۇرلىبەك مالىمدەدى, دەپ حابارلايدى Egemen.kz.
ىشكى ىستەر مينيسترلىگىنىڭ ءباسپاسوز وكىلى شۇعىلا تۇرلىبەكتىڭ ايتۋىنشا, الماتى قالاسىندا قاجىلىققا باراتىن ادامدارعا جالعان ۆاكتسينا پاسپورتىن راسىمدەگەن تۋريستىك كومپانيا انىقتالدى.
«مەملەكەت باسشىسى قاسىم-جومارت توقاەۆ كوروناۆيرۋسپەن كۇرەسۋدىڭ بىردەن-ءبىر جولى ءارى سەنىمدى ءادىسى ۆاكتسينا ەكەنىن اتاپ وتكەن بولاتىن. كەي ازاماتتار قازىرگى جاعدايدى پايدالانىپ, تابىس تابۋعا تىرىسىپ ءجۇر. ولار پتر تەستىلەۋ قورىتىندىسى مەن ۆاكتسينا پاسپورتىن قولدان جاساپ ساتادى. وسىلايشا ۆيرۋستىڭ تارالۋىنا سەبەپكەر بولادى. جىل باسىنان بەرى ىشكى ىستەر ورگانداردى پتر تەستىلەۋ قورىتىندىسى مەن ۆاكتسينا پاسپورتىن قولدان جاساۋدىڭ, سونداي-اق, ولاردى پايدالانۋدىڭ 30 جاعدايىن تىركەدى», دەيدى شۇعىلا تۇرلىبەك.
ىشكى ىستەر قىزمەتكەرلەرى ينتەرنەت جەلىسىندە مونيتورينگ جۇرگىزۋ كەزىندە دەرەكتەر بازاسىندا رەسمي تىركەلمەگەن انىقتامالاردى نەمەسە ۆاكتسينا پاسپورتتارىن دايىنداۋ تۋرالى جالعان ۇسىنىستاردى انىقتاپ وتىرادى.
«مىسالى, الماتى قالاسىندا قاجىلاردىڭ ساۋد ارابياسىنا كەتۋىن راسىمدەۋ كەزىندە ۆاكتسينا پاسپورتىن جاپپاي دايىنداۋعا قاتىسى بار تۋريستىك كومپانيا انىقتالدى. قازىر سوتقا دەيىنگى تەرگەۋ جۇرگىزىلىپ جاتىر. ءتىنتۋ كەزىندە ۇيىمداستىرۋ تەحنيكاسى, مورلەر جانە بلانك ونىمدەرى الىنىپ, سوت ساراپتامالارى تاعايىندالدى. جالعان قۇجات دايىنداعانى ءۇشىن 4 جىلعا دەيىن باس بوستاندىعىنان ايىرۋ, ال ونى پايدالانعانى ءۇشىن 40 تاۋلىككە دەيىن قاماۋعا الۋ تۇرىندەگى قىلمىستىق جاۋاپكەرشىلىك قاراستىرىلعان. قۇقىق قورعاۋ قىزمەتكەرلەرى ينتەرنەتتەگى پتر-تەست انىقتاماسى مەن ۆاكتسينا پاسپورتىن ۇسىناتىن حابارلامالاردى ءجىتى باقىلاۋعا العان.ء بىز قازىردىڭ وزىندە ۋاكىلەتتى ورگانعا بۇعاتتاۋعا جاتاتىن وسىنداي 35 حابارلاندىرۋدى انىقتاپ, جولدادىق. ىشكى ىستەر مينيسترلىگى وسى ىندەتپەن بايلانىستى بارلىق قىلمىستىق كورىنىستەرگە ەرەكشە نازار اۋدارادى», دەيدى ىشكى ىستەر مينيسترلىگىنىڭ ءباسپاسوز وكىلى.