ەكى مىڭنان استام قازاقستاندىق ۆاكتسينا العاننان كەيىن كوروناۆيرۋس جۇقتىردى. بۇل تۋرالى دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ توراعاسى ايجان ەسماعامبەتوۆا مالىمدەدى, دەپ حابارلايدى Egemen.kz.
«بۇگىنگى تاڭدا ەلىمىز بويىنشا ۆاكتسينا العاننان كەيىن 2 212 كوروناۆيرۋس جۇقتىرۋ جاعدايى تىركەلدى. سونىڭ ىشىندە ءبىرىنشى كومپونەتتەن كەيىن 1 308 جاعداي, ەكىنشى كومپونەنتتەن كەيىن 904 جاعداي انىقتالدى», دەدى كوميتەت توراعاسى.
سونداي-اق ول اتالعان ستاتيستيكانى ۆاكتسينالاردىڭ تۇرىنە ءبولىپ ايتىپ بەردى.
«ۆاكتسينالارعا جىكتەپ ايتساق, «سپۋتنيك V» بويىنشا 2 024 جاعداي انىقتالدى. ءبىرىنشى كومپونەنت – 1 190, ەكىنشى كومپونەنت – 834. QazVac بويىنشا 40 جاعداي تىركەلدى. سايكەسىنشە, 21 جانە 19. Hayat-Vax بويىنشا 140 (89/51) جانە CoronaVac بويىنشا 6 ادام ءبىرىنشى دوزادان كەيىن كوروناۆيرۋس جۇقتىرعان. وسىنىڭ ءبارىن قوسساڭىز 2 212 جاعداي شىعادى. بىراق بۇل مالىمەتتى ءابسوليۋتتى ساندار كولەمىندە قولدانۋ دۇرىس ەمەس دەپ ويلايمىن. بۇگىندە بىزدە 4 ميلليونعا جۋىق ادام ەكپە العان. سونىڭ 0,05 پايىزى ۆاكتسينا العاننان كەيىن اۋىرعان دەگەن ءسوز», دەدى ايجان ەسماعامبەتوۆا.