ەلوردادا ستۋدەنتتەرگە ارنالعان جاڭا جاتاقحانا اشىلدى

ەلباسى نۇرسۇلتان ءابىش ۇلى نازارباەۆ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىندە ستۋدەنت جاستاردىڭ ماسەلەسىنە ەرەكشە نازار اۋدارىپ, ءۇشىنشى باستاماسىندا 2022 جىلدىڭ سوڭىنا دەيىن ستۋدەنتتىك جاتاقحانالاردىڭ جاعدايىن جاقسارتۋ مەن وعان مۇقتاج جاستاردىڭ قاجەتتىلىكتەرىن وتەۋدى تاپسىرعان بولاتىن. وسىعان وراي بۇگىن ەلوردادا 680 ورىندىق جاتاقحانانىڭ اشىلۋ سالتاناتى ءوتتى. 

«بۇگىنگى كۇنى 63 مىڭنان استام ستۋدەنت جاتاقحاناعا مۇقتاج. مەكتەپ تۇلەكتەرىنىڭ باسىم بولىگى الماتى, نۇر-سۇلتان جانە شىمكەنت قالالارىنىڭ جوعارى وقۋ ورىندارىنا تۇسەتىندىكتەن, وسى قالالاردا ستۋدەنتتەر ۇيىنە دەگەن سۇرانىس ۇلكەن. بۇگىنگى كۇنگى قاجەتتىلىكتىڭ تەڭ جارتىسى الماتى قالاسىنا تيەسىلى. ال شىمكەنت قالاسى كەلەسى جىلى ستۋدەنتتەردىڭ بارلىعىن جاتاقحانامەن قامتاماسىز ەتەدى دەگەن ءۇمىت بار. مۇنداعى ستۋدەنتتىك جاتاقحاناعا قاجەتتىلىك 15 مىڭ ورىندى قۇرايدى», دەيدى بىلىم جانە عىلىم مينيسترلىگىنىڭ «قارجى ورتالىعى» اق پرەزيدەنتى اسقار يبراگيموۆ. 

ۋنيۆەرسيتەت رەكتورى مۇحتار بايجۇمانوۆتىڭ ايتۋىنشا, جاتاقحانا قۇرىلىسى وقۋ ورنىنىڭ قۇرىلتايشىسى, اكادەميك قۇرالبەك قۇلجانوۆتىڭ باستاماسىمەن سالىندى. قۇرىلىس 2019 جىلدىڭ مامىر ايىندا باستالعان. 

«وسى ورايدا بىزگە قولداۋ كورسەتكەن ءبىلىم جانە عىلىم مينيسترلىگىنە العىس بىلدىرەمىز. ستۋدەنتتەردىڭ الاڭسىز ءبىلىم الۋىنا جاعداي جاساۋ ۋنيۆەرسيەتتىڭ قۇرىلعان كۇننەن بەرگى ماقساتى بولاتىن. بۇگىنگى كۇنى ۋنيۆەرسيتەت ستۋدەنتتەر ءۇيى قۇرىلىسىمەن قاتار جابىق ستاديون قۇرىلىسىن دا اياقتاۋعا جاقىن. ماگيسترانتتار مەن اسپيرانتتارعا ارنالعان بولەك وقۋ عيماراتىن سالۋ دا جوسپارلانىپ وتىر», دەدى ول.

بەس قاباتتان تۇراتىن عيماراتتا ستۋدەنتتىك اسحانا, دەمالىس بولمەلەرى, ءار قاباتتا ءوز اس ءۇيى مەن جۋىنۋ بولمەلەرى, وقۋ زالدارى بار. ءبىر بولەمەدە ءتورت ستۋدەنت تۇراتىن بولادى. بارلىق بولمەلەر جاڭا تەحنيكا مەن قاجەتتى جيھازدارمەن جابدىقتالعان. ستۋدەنت ءۇشىن ەڭ ىڭعايلىسى - جاتاقحانانىڭ وقۋ كورپۋسىنىڭ جانىندا ورنالاسۋى. جاتاقحانانىڭ وڭ جاق كورپۋسىندا قىزدار, سول جاق كورپۋسىندا ۇلدار ورنالاساتىن بولادى. جاڭا ستۋدەنتتەر ۇيىندە مەديتسينالىق پۋنكت تە قاراستىرىلعان ەكەن.