اتىراۋ پوليتسەيلەرى مەملەكەتارالىق ىزدەۋ جاريالانعان 45 جاستاعى رەسەيلىكتى ۇستادى, دەپ حابارلايدى Egemen.kz.
وبلىستىق پوليتسيا دەپارتامەنتىنىڭ ءباسپاسوز قىزمەتى تاراتقان اقپاراتقا سۇيەنسەك, قازىر «زاڭسىز كەلۋشى-2021» جەدەل پروفيلاكتيكالىق ءىس-شاراسى ءوتىپ جاتىر. كوشى-قون پوليتسياسىنىڭ قىزمەتكەرلەرى اتالعان ءىس-شارا اياسىندا بىرنەشە دەرەكتى انىقتادى.
«بيىلعى مامىر ايىندا رەسەي فەدەراتسياسىنىڭ ازاماتىنا سول ەلدىڭ قىلمىستىق كودەكسىنىڭ 157-بابىنىڭ 1-بولىگىمەن (اتا-انانىڭ سوت شەشىمى بويىنشا كامەلەتكە تولماعان بالالاردى, سونداي-اق ون سەگىز جاسقا تولعان مۇگەدەك بالالاردى ۇستاۋعا قاراجات تولەۋدەن قاساقانا جالتارۋى) مەملەكەتارالىق ىزدەۋ جاريالانعان. قازىر ۇستالعان ەر ادام شەكارا قىزمەتىنە تاپسىرىلدى», دەپ حابارلادى دەپارتامەنتتىڭ ءباسپاسوز قىزمەتى.
سونداي-اق جەدەل ءىس-شارا كەزىندە پوليتسەيلەر قۇرىلىس نىساندارىنا تەكسەرۋ جۇرگىزدى. اتىراۋ قالاسىنداعى «بەرەكە» شاعىن اۋدانىندا وزبەكستان رەسپۋبليكاسىنىڭ 52 ازاماتى قۇجاتسىز ەڭبەك قىزمەتىن زاڭسىز جۇزەگە اسىرىپ جۇرگەنى بەلگىلى بولدى. شەتەلدىك ازاماتتار اتىراۋ قالالىق پوليتسيا باسقارماسىنىڭ قابىلداۋ-تاراتۋ ورنىنا ورنالاستىرىلدى.