پرەزيدەنتتىڭ كومەكشىسى ەرلان قارين Telegram كانالىندا 700-دەن استام اۋىلدىڭ اكىمى ءبىر ۋاقىتتا سايلاۋعا تۇسەتىنىن جازدى, دەپ حابارلايدى Egemen.kz.
«پرەزيدەنت باستاماشى بولعان ساياسي رەفورمالاردىڭ ەكىنشى جانە ءۇشىنشى پاكەتىن ءىس جۇزىندە جۇزەگە اسىرۋ باستالدى. ەلىمىزدىڭ بىرقاتار وڭىرىندە اۋىلدىق وكرۋگ اكىمدەرىن سايلاۋ كۇنى بەلگىلەنگەن. 25 شىلدەدە ءبىر مەزگىلدە 700-دەن استام اۋىل اكىمدەرىن سايلالانادى. قالعان اكىمدەردى سايلاۋ ولاردىڭ وكىلەتتىك مەرزىمى اياقتالعاننان كەيىن وتكىزىلەدى», دەپ جازدى ەرلان قارين.
پرەزيدەنت كومەكشىسى اتالعان ءتۇيىندى باستامانىڭ ىسكە اسۋىن ساياسي جاڭعىرۋدىڭ جاڭا كەزەڭىن ايعاقتايتىن وتە ماڭىزدى وقيعا رەتىندە باعالاپ وتىر.
«اۋىل اكىمدەرىنىڭ تىكەلەي سايلاۋىن وتكىزۋ جونىندەگى باستامانى العاش رەت مەملەكەت باسشىسى 2020 جىلعى 1 قىركۇيەكتە ءوزىنىڭ جولداۋىندا ايتقان بولاتىن. ال 2021 جىلدىڭ 24 مامىرىندا پرەزيدەنت قاسىم-جومارت توقاەۆ زاڭناماعا اۋىل اكىمدەرىن تىكەلەي سايلاۋدى ەنگىزۋگە مۇمكىندىك بەرەتىن تۇزەتۋلەردى كوزدەيتىن زاڭنامالىق اكتىلەرگە قول قويدى. 5 ماۋسىمنان باستاپ سايلاۋ زاڭناماسىنىڭ جاڭا نورمالارى كۇشىنە ەندى. ناتيجەسىندە ءبىر جىلدان از ۋاقىت ىشىندە بۇل باستاما جۇزەگە اسىرىلدى», دەيدى مەملەكەت باسشىسىنىڭ كومەكشىسى.
ونىڭ ايتۋىنشا, قاسىم-جومارت توقاەۆ باستاماشى بولعان ساياسي رەفورمالاردىڭ اياسىندا بۇگىننىڭ وزىندە 10 زاڭ قابىلدانعان. جىل سوڭىنا دەيىن بۇل باعىتتا تاعى بىرقاتار زاڭ قابىلداۋ جوسپارلانىپ وتىر.