اۋىل اكىمدەرىن تىكەلەي سايلاۋ بۇكىل ەل ءۇشىن ايتۋلى وقيعاعا اينالادى. مۇنداي پىكىردى قازاقستان رەسپۋبليكاسى پرەزيدەنتىنىڭ كومەكشىسى, ۇلتتىق كەڭەستىڭ حاتشىسى ەرلان قارين ساراپتامالىق تالقىلاۋدا ايتتى, دەپ حابارلايدى Egemen.kz.
ونىڭ ايتۋىنشا, بۇگىندە اۋىل اكىمدەرى اكىمدىك كورپۋسىنىڭ 90%-دان استامىن قۇرايدى. «قازاقستان حالقىنىڭ 40 پايىزدان استامى اۋىلدا تۇرادى. سوندىقتان اۋىل اكىمدەرىن سايلاۋ ناۋقانى ماڭىزدى وقيعا بولعانى ءبىر بولەك, بۇل شىن مانىسىندە ازاماتتار مەن مەملەكەتتىڭ, بيلىك پەن قوعامنىڭ اراسىنداعى قارىم-قاتىناستىڭ جاڭا پرينتسيپتەرىنىڭ ورنىققانىن اڭعارتادى.
وسى رەفورمالار قالاي ىسكە اسادى؟ بولاشاقتا تاعى قانداي باستامالاردى جۇزەگە اسىرا الامىز؟ ءبىزدىڭ ماقساتىمىز - وسى سۇراقتار اياسىندا مۇمكىندىگىنشە پىكىر الماسۋ. بۇگىنگى كەزدەسۋدە ءبىزدىڭ ارىپتەسىمىز اندرەي چەبوتارەۆتىڭ دايىنداعان ساراپتامالىق بايانداماسىن تىڭدادىق. بۇل باياندامادا سوڭعى ەكى جىلدا جاريالانعان بارلىق ساياسي باستامالار تالدانىپ جۇيەلەنگەن. سونىمەن قاتار, پرەزيدەنت تاراپىنان ادام قۇقىعى ماسەلەسىنە قاتىستى ءبىرشاما ماڭىزدى ماسەلەلەر دە كوتەرىلگەن. وسىنداي كەزدەسۋلەردىڭ ناتيجەسىندە بۇگىن, مىنە, وسى ۋاقىتقا دەيىن تالداپ قانا قويماي, بولاشاقتا اتقارىلاتىن باسقا دا رەفورمالاردى پىسىقتاۋ مۇمكىندىگى تۋدى», دەدى ەرلان قارين.