2021 جىلعى 21-23 ماۋسىم ارالىعىندا قازاقستاندىق توراعالىقتىڭ باستاماسى بويىنشا ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ (اوسشك) ارنايى جۇمىس توبى (اجت) مەن اعا لاۋازىمدى تۇلعالار كوميتەتىنىڭ (التك) كەزەكتى وتىرىستارى ءوتتى, دەپ حابارلايدى Egemen.kz.
اجت جانە التك وتىرىستارىندا كەڭەستىڭ ودان ءارى ينستيتۋتسيونالدىق دامىتۋ, سەنىم شارالارىنىڭ كاتالوگىن ءىس جۇزىندە ىسكە اسىرۋ, قۇقىقتىق بازاسىن جەتىلدىرۋ, اوسشك سەنىم شارالارىن جۇزەگە اسىرۋ جونىندەگى ءىس-شارالاردى وتكىزۋ قاعيداتتارى ماسەلەلەرى تالقىلاندى.
سونداي-اق ازيانىڭ الەمدەگى جاڭا ءرولى, جاھاندىق جانە وڭىرلىك ۇردىستەر, اوسشك ودان ءارى دامۋ پەرسپەكتيۆالارى تۋرالى پىكىر الماسىلدى.
التك توراعاسى - قازاقستان سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆ ءوز سوزىندە اوسشك قىزمەتىنىڭ ايتارلىقتاي جاندانعانى بايقالاتىنىن قاناعاتتانۋشىلىقپەن ايتىپ كەتتى. اتاپ ايتقاندا, ول اوسشك ىسكەرلىك كەڭەسى مەن جاستار كەڭەسى باسقارماسىنىڭ وتىرىستارىنىڭ, ەكونوميكالىق جانە ەكولوگيالىق ولشەمدەر شەڭبەرىندەگى بىرقاتار ءىس-شارالاردىڭ, سونداي-اق ەپيدەميولوگيالىق قاۋىپسىزدىك سالاسىنداعى كونفەرەنتسيانى قوسا العاندا, جاڭا سىن-قاتەرلەر مەن قاۋىپتەرگە قارسى كۇرەس سالاسىنداعى بىرقاتار ءىس-شارالاردىڭ ءساتتى وتكىزىلگەنىن ايتتى.
التك وتىرىسى بارىسىندا تۇرىكمەنستانعا اوسشك باقىلاۋشى مارتەبەسىن بەرۋ تۋرالى شەشىم قابىلداندى.
سونىمەن قاتار ءىس-شارا بارىسىندا بۇۇ باس حاتشىسىنىڭ ورىنباسارى - تەرروريزمگە قارسى كۇرەس باسقارماسىنىڭ باسشىسى ۆلاديمير ۆورونكوۆتىڭ كەڭەس شەڭبەرىندە تالقىلانىپ وتىرعان بۇۇ-نىڭ جاھاندىق كونترتەرروريستىك ستراتەگياسىن ىسكە اسىرۋ جونىندەگى اوسشك ءىس-قيمىل جوسپارىنىڭ ماڭىزدىلىعى تۋرالى بەينە ۇندەۋ جاسادى.
التك وتىرىسىنىڭ قورىتىندىسى بويىنشا 2021 جىلعى قازاندا وتەتىن اوسشك 6-شى مينيسترلىك كەزدەسۋى بارىسىندا بەكىتۋ ءۇشىن اوسشك دانالار كەڭەسى تۋرالى ەرەجە جوباسى كەلىسىلدى.