نۇر-سۇلتان قالاسىندا جەكە كومپانيا باسشىسى قىزمەتكەرلەرىنە پتر-تەستتىڭ جالعان انىقتاماسىن جاساعانى ءۇشىن جازالاندى, دەپ حابارلايدى Egemen.kz.
نۇر-سۇلتان قالاسىنداعى №2 ەسىل اۋداندىق سوتى جەكە كومپانيانىڭ باس ديرەكتورىنا قاتىستى پتر-زەرتتەۋ انىقتامالارىن قولدان جاساۋ جانە «ۇلتتىق مەديتسينالىق ورتالىق» اق زەرتحاناسىنىڭ جالعان بلانكىلەرىن جاساۋ فاكتىسى بويىنشا ۇكىم شىعاردى.
«سوتتالۋشى نىسانعا كىرۋگە قۇقىق بەرەتىن رەسمي قۇجاتتى ilovepdf.com سايتىنىڭ كومەگىمەن ءوز جشس قىزمەتكەرلەرىنە تەرىس ناتيجەسى بار پتر-تەست انىقتاماسىن قولدان جاساعان. سونداي-اق ول ءتيىستى ماتىندىك وزگەرىستەر ەنگىزىپ, «ۇلتتىق مەديتسينالىق ورتالىق» اق زەرتحانالارىنىڭ جالعان ەلەكتروندىق بلانكىلەرىن دە جاساعان», دەلىنگەن سوتتىڭ ءباسپاسوز قىزمەتىنىڭ حابارلاماسىندا.
جشس قىزمەتكەرلەرى جوندەۋ جۇمىستارىن ورىنداۋ ءۇشىن نىسانعا جالعان قۇجاتتار بويىنشا وتۋگە تىرىسقان, بىراق مەملەكەتتىك كۇزەت قىزمەتى بۇل ارەكەتتىڭ جولىن كەستى.
سوت شەشىمىمەن كومپانيا باسشىسىنا 50 اەك (145 850 تەڭگە) كولەمىندە ايىپپۇل سالىندى.
ۇكىم زاڭدى كۇشىنە ەنگەن جوق.
بوتاگوز امالبەك