ادامداردى قاۋىپتەن قۇتقارعان پوليتسەيلەر ماراپاتتالدى

وبلىستىق پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي, بيىل اتىراۋلىق پوليتسەيلەر ءوز ومىرىنە قاۋىپ تونگەنىنە قاراماستان, ادامداردى قۇتقارۋدا باتىلدىق پەن جانقيارلىق كورسەتىپتى.

ماسەلەن, اتىراۋ قالاسىنداعى بالىقشى شاعىن اۋدانىندا 15 جاستاعى ەكى ءجاسوسپىرىم كەشكى ساعات 20:00 شاماسىندا جايىق وزەنىنىڭ مۇزىنا ءتۇسىپ كەتكەن. ولاردىڭ كومەككە شاقىرعان داۋسىن ەستىگەن پوليتسيا كاپيتانى اسقار قابدوللاەۆ جەدەل قۇتقارۋعا كىرىسىپ,  سۋدان الىپ شىققان. سودان سوڭ ولاردى ۇيىنە اپارىپ, جەدەل-جاردەم بريگاداسىن  شاقىرتقان. قۇتقارىلعان ۆلاديمير مەن ءدانيلدىڭ ءبىرى – كوللەدج ستۋدەنتى, ەكىنشىسى – 8-سىنىپ وقۋشىسى.

جەدەل جاردەم دارىگەرلەردىڭ ايتۋىنشا, سول ساتتە جاسوسپىرىمدەر سالقىن سۋعا تۇسكەندىكتەن دەنەسى توڭىپ قالعان. ولارعا ءتيىستى ەم-دوم جاسالدى. قۇتقارىلعان ءۆلاديميردىڭ اعاسى الەكساندر كريشنەۆسكي پوليتسيا كاپيتانى اسقار قابدوللاەۆقا ريزاشىلىعىن ءبىلدىرىپ, ونىڭ بۇل ارەكەتىن ۇلكەن ەرلىككە بالادى.

ال, 16 ناۋرىزدا ساعات 01:00 شاماسىندا قۇرمانعازى اۋدانىنىڭ ماقاش اۋىلدىق وكرۋگىنە قاراستى العا اۋىلىنداعى تۇرعىن ءۇيدىڭ بىرىندە ءورت تۇتانعان. جالىندى دەر كەزىندە بايقاعان ۋچاسكەلىك پوليتسيا ينسپەكتورلارى تالعان راحيموۆ پەن ءبىرجان ماحمۋدوۆ, پوليتسيا اعا سەرجانتى باقىتجان قادىربەۆ جانىپ جاتقان ۇيدەن 4 ەرەسەك ادام مەن 3 بالانى سىرتقا الىپ شىقتى. ءورت سوندىرۋشىلەر كەلگەنگە دەيىن وزدەرىنىڭ كاسىبي شەبەرلىگىن تانىتىپ, ءورتتىڭ بەتىن قايتاردى.

سونداي-اق 11 ساۋىردە ساعات 04:10 شاماسىندا قۇلسارى قالاسىندا كوپقاباتتى ۇيدەگى پاتەردىڭ ءبىرى ورتەنگەن. وقيعا ورنىنا قۇرامىندا پوليتسيا اعا لەيتەنانتى ا.شاحاەۆ, پوليتسيا كىشى لەيتەنانتى ا.تويعۇلوۆ, پوليتسيا كاپيتانى ج.تولەپوۆ, پوليتسيا اعا لەيتەنانتى ا.مارات بار «قايسار» تۇنگى توسقاۋىل قىزمەتكەرلەرى جەدەل جەتكەن. ەلەكتر جەلىسىنەن اقاۋ شىعىپ, ءبىرىنشى قاباتتاعى پاتەردىڭ ءىشىن قويۋ ءتۇتىن باسقان. پوليتسيا قىزمەتكەرلەرى جەدەل ارەكەت ەتىپ, ءورت شارپىعان, سونداي-اق, كورشىلەس پاتەرلەردەن 14 ادامدى, ونىڭ ىشىندە 10 ءجاسوسىپىرىمدى دالعا الىپ شىعىپ, قۇتقارىپ قالعان.     

اتىراۋ قالالىق پوليتسيا باسقارماسىنىڭ كامەلەتكە تولماعاندار ىستەرى جونىندەگى ۋچاسكەلىك پوليتسيا ينسپەكتورى, پوليتسيا اعا لەيتەنانتى ا.قايىرعاليەۆ 14 ساۋىردە ساعات 01:30 شاماسىندا كوپقاباتتى ۇيدەگى پاتەردەن ءجاسوسپىرىم قىزدى قۇتقارعان. پوليتسەيگە 4-قاباتتىڭ بالكونىنان 3-قاباتقا تۇسۋگە كەلدى. ويتكەنى, ءجاسوسپىرىم قىز جالعىز قالعان پاتەر كىلتتەنىپ قالعان. ءسويتىپ, كىلتتەۋلى پاتەرگە كىرىپ, وقىس وقيعانىڭ  الدىن الدى.

«قيىن ساتتە ادامداردى قۇتقارۋدا باتىرلىق بەن ەرلىك كورسەتتىڭىزدەر. بۇل – سىزدەردىڭ تاراپتارىڭىزدان انتقا بەرىكتىكتىڭ, اتقاراتىن قىزمەتكە ادالدىقتىڭ شىنايى كورىنىسى», دەدى دەپارتامەنت باستىعى, پوليتسيا پولكوۆنيگى قامزا ۇمبەتقاليەۆ.