كومەگى كوپ كوشپەلى ەمحانا

ماماندار قانت ديابەتى, جۇرەك تالماسى, قان قىسىمى سياقتى سىرقات بەلگىلەرى انىقتالعان ادامدارعا اۋرۋ­دىڭ الدىن الۋ تۋرالى اقىل-كەڭەستەرىن بەرىپ, ەكپە جاساتۋ كەرەك ەكەنىن قاداپ ەسكەرتتى. ۆاكتسينانى كوشپەلى مەدي­تسينالىق پۋنكتتەن 100 مەتردەي جەردەگى «بيزنەس ورتالىعىندا» قابىلداۋعا بولادى. ەڭسەلى عيماراتتىڭ ءبىر بول­مە­سىندە ءبىرازدان بەرى ارنايى جابدىق­تالعان ەكپە جاساتۋ كابينەتى اشىلعان. مۇنداعى دارىگەرلەر تۇرعىنداردىڭ ءوز قالاۋى بويىنشا سپۋتنيك V, QazVac نەمەسە Hayat-Vax ۆاكتسيناسىن ەگىپ جاتىر.

«دارىگەر قابىلداۋى» اكتسياسى­نىڭ باستى ماقساتى – قالا تۇرعىندارىنىڭ دەنساۋلىعىنا قاۋىپ ءتوندىرىپ تۇرعان سىرقات بەلگىلەرىن انىقتاۋ. ادەتتە كۇندەلىكتى كۇيبەڭ تىرشىلىككە كوبىرەك ءمان بەرىپ, جۇمىسباستى بولىپ كەتكەن ازاماتتاردىڭ كوبى ءوز دەنساۋلىعىنا قاراۋدى ەستەن شىعارىپ جىبەرەدى. اۋرۋىن ابدەن اسقىندىرىپ, سوسىن عانا ەمحاناعا كەلىپ جاتاتىن ادامدار ءجيى كەزدەسەدى. جامان ايتپاي, جاقسى جوق, دەرت اسقىنىپ كەتسە, ونىڭ ارتى جاقسىلىققا اپارمايدى. ەستەرىڭىزدە بولسا, بيىل 1 اقپاننان باستاپ تۇرعىن­دارعا ۆاكتسينا ەگۋ باستالعان. ءدال قا­زىرگى كەزەڭدە قوستاناي وبلىسىندا ۆاكتسينانىڭ ءۇش ءتۇرى بار», دەدى №1 قا­لالىق ەمحانانىڭ باس دارىگەرى جانات الماعامبەتوۆا.

باس دارىگەردىڭ سوزىنشە, بۇگىندە وڭىردە سovid-19-عا قارسى ۆاكتسينالاۋ شاراسى بەلسەندى ءجۇرىپ جاتىر. وبلىس ورتالىعىندا ەمحانالاردىڭ سىرتىندا, حالىق ءجيى باراتىن قوعامدىق ورىنداردا ۆاكتسينا ەگۋ كابينەتتەرى كوپتەپ اشىلۋدا. وبلىس تۇرعىندارىنا قازىر 31 مەديتسينالىق مەكەمە ەكپە جاساپ جاتىر, ونىڭ بەسەۋى – جەكەمەنشىك. مۇنىڭ سىرتىندا, 93 ستاتسيونارلىق جانە جىلجىمالى نىسان بەلسەندى جۇمىس ىستەۋدە. قاجەت بولعان جاعدايدا بۇلاردىڭ سانىن 150-گە دەيىن كوبەيتۋگە مۇمكىندىك بار. وڭىردە بارلىعى 426 مەديتسينا قىزمەتكەرى ەكپە جاساۋمەن اينالىسۋدا. ولاردىڭ ءبارى – ارنايى وقۋ كۋرستارىنان وتكەن بىلىكتى ماماندار.

قوستاناي وبلىسى